ភ្នំពេញ៖តារាចម្រៀងឃីន ស្រីនាថ ហៅអ៊ីវ៉ា នៅតែបង្ហាញភាពស្និតស្នាលជាមួយប្អូនប្រុសលោកមាស សាលី ឈ្មោះវេហាស៍ ដដែលក្រោយនាងប្រកែកស្នេហ៍ដៃគូម្នាក់នេះដែលគេមើលឃើញថាពួកគេមានទំនាក់ទំនងគ្នាហាក់លើសពីធម្មតានោះថាមិនអាចក្លាយជាគូសង្សារបាននោះ ដោយថ្មីៗនេះស្រីនាថ បានដឹកដៃប្អូនលោកសាលី រូបនេះច្រៀងសម្ដែងបទថ្មីៗសម្រាប់ពិធីបុណ្យចូលឆ្នាំខ្មែរដោយបង្ហាញសកម្មភាពស្អិតល្មូតគ្នាដូចមុន។ទោះជាយ៉ាងណាកាលពីដើមខែមីនាឆ្នាំ២០២២ អ៊ីវ៉ា បានបិតផ្លូវលោកវេហាស៍ ទៅហើយតាមរយៈនាងបង្ហើបថាអនាគតស្វាមីរបស់នាងគឺជាអ្នកដែលធ្វើការពាក់ព័ន្ធវិស័យកីឡារ។ស្រីស្រស់រូបនេះថែមទាំងថាតាមពិតនាងស្រលាញ់ផ្នែកកីឡារទេ ប៉ុន្ដែឪពុកឲ្យចូលច្រៀងទើបបំពេញបំណងលោកប៉ានាង។ការទម្លាយរឿងបេះដូងរបស់អ៊ីវ៉ា នោះហាក់បានធ្វើឲ្យបុរស២នាក់បានព្យាយាមដកស្នេហ៍ចេញពីអ៊ីវ៉ា វិញព្រោះថាពួកគេមិនស្ថិតក្នុងផែនការណ៍ដែលតារាសាច់សខ្ចីជ្រើសយកធ្វើប្ដីឡើយនោះគឺលោកវេហាស៍ និងលោក”ប”ដែលជាប្អូនប្រុសលោកផ្កាយ៣ម្នាក់ធ្លាប់តាមស្នេហាស្រីនាថ ជិត១០ឆ្នាំមកហើយ។តែយ៉ាងណាអ៊ីវ៉ា មិនបង្ហាញមុខគូស្នេហ៍ឲ្យដឹងថាជាបុរសណាឡើយ រហូតមានFan របស់នាងដាស់តឿន ស្រីស្អាតរូបនេះទៀតផងថាប្រយ័ត្នយកប្ដីអ្នកធ្វើការពាក់ព័ន្ធផ្នែកកីឡារនោះមិនមែនជាកីឡាករបាល់ទាត់ ,ម្ចាស់ក្លឹប តែបែជាប៉ៈចំអ្នកចាក់បាល់ទៅវិញនោះប្រាកដជាធ្វើឲ្យអ៊ីវ៉ា គ្មានពាក្យវាចាថ្លែងតែម្ដង។
អ៊ីវ៉ា បានបន្ដច្រៀងនៅផលិតកម្មសាន់ដេដោយគ្មាការកុងត្រានោះទេ ក្រោយនាងត្រូវបានផលិតកម្មដល់ទៅ៣ចាប់អារម្មណ៍ចង់បានធ្វើជាសមាជិករបស់ពួកគេក្នុងនោះគឺហង្សមាស,ថោន និងGalaxy ។តារាវ័យ២៨ឆ្នាំរូបនេះត្រូវថៅកែសាន់ដេផ្ដល់សិទ្ធិជាពិសេសព្រោះនាងអាចថតសម្ដែងតែបទចម្រៀងណាដែលនាងពេញចិត្តឬស្រលាញ់ តែបើបទណានាងមិនចូលចិត្តអាចមិនថតបាន ។ការផ្ដល់ល័ក្ខខណ្ឌល្អជាងតារាផ្សេងបែបនេះហើយទើបឪពុករបស់អ៊ីវ៉ា លោកអ៊ូ វ៉ាវ បានអះអាងថាស្រីនាថ បានចាត់ទុកសាន់ដេជាឪពុកម្ដាយទី២ ហើយថៅកែផលិតកម្មនេះជាមនុស្សល្អ អត់ចេះកាត់ភាគរយពីតារាចម្រៀងនោះទេព្រោះគាត់ចង់ឲ្យកូនចៅមានបាន។
ប៉ុន្ដែលោកវ៉ាវ ហាក់ខកចិត្តបន្ដិចនៅពេលដែលលោកចង់ឲ្យអ៊ីវ៉ា រៀបការប្ដីឆាប់ៗនិងអាលបានកូនប្រសារមកបើកឡានជូននាងទៅច្រៀងជំនួសលោក តែស្រីនាថ ថានាងនឹងរៀបការនៅអាយុ៣០ឆ្នាំពោលគឺឆ្នាំ២០២៤ ខាងមុខនេះ ទើបលោកវ៉ាវ ដាស់តឿន កូនស្រីថាកុំទុកភាពនៅលីវយូពេក វាមិនល្អនោះទេ អត់ប្រយោជន៍។លោកវ៉ាវ ថាលោកចង់បានកូនប្រសារជាបុរសវ័យចំណាស់បន្ដិច អត់ចង់ឲ្យកូនយកប្ដីប្រុសក្មេងទេ។ដោយឡែកអ៊ីវ៉ា ថានាងត្រូវការស្វែងយល់ចិត្តពីបុរសម្នាក់ឲ្យបានច្បាស់លាស់ទើបព្រមរៀបការ៕