ភ្នំពេញ៖អ្នកនាងគង់ សុជាតិ បានដឹកដៃប្ដីលោកជា វិបុល និយាយយ៉ាងខ្លីនៅចំពោះមុខអ្នកសារព័តមានកាលពីពេលថ្មីៗនេះថាហាមសួរនាំរឿងយកកូនភ្លោះនៅរដូវហ្នឹង…។អ្នកនាងថារវល់ស្ទើតែភ្លេចដកដង្ហើមអីចឹងមានពេលឯណាទៅយកកូនថែមនោះ។សុជាតិ ថានៅរដូវក្ដៅនេះអ្នកនាងនិងស្វាមីមានខែខ្លះត្រូវគេកក់ពេញអស់តែម្ដង អីចឹងរឿងយកកូនទុកមួយឡែកសិន ។ប៉ុន្ដែនៅពេលដែលអ្នកយកព័តមានយើងសួរថាតើសុជាតិ និងប្ដី ធ្វើMC រួមគ្នាម្ដងតម្លៃប៉ុន្មាននោះប្ដីប្រពន្ធតារា១គូនេះមិនព្រមប្រាប់តម្លៃខ្លួនឡើយដោយសម្អាងថានិយាយទៅខ្លាចគេថាអួតអាងនាំតែពិបាក តែសុជាតិ និយាយថាមិនមែនថោកទេ…។
គង់ សុជាតិ បានខកចិត្តអស់២ឆ្នាំដោយសារតែផ្ទុះកូវីដទើបនាងនិងស្វាមីមិនបានចេញកើបលុយពីអាជីពអត្ថាធិប្បាយនេះបានឡើយគឺមានតែការងារនៅស្ទីតឌីយោហង្សមាសប៉ុណ្ណោះ។យ៉ាងណានៅឆ្នាំ២០២១-២០២២ សុជាតិ និងប្ដីអាចចេញរកលុយបានរួមគ្នាវិញដោយសារតែកូវីដហាក់ថមថយបន្ដិច ស្របពេលដែលចំណងស្នេហាគូស្នេហ៍តារា១គូនេះបានវិលមករកភាពផ្អែមល្ហែមសារជាថ្មីឡើងវិញដែលសកម្មភាពរបស់ពួកគេដូចប្ដីប្រពន្ធទើបរៀបការហើយថ្មោងថ្មីអីចឹង ក្រោយពីសុជាតិ ជួបទុក្ខធំកាលពីពាក់កណ្ដាលឆ្នាំ២០២០ ព្រោះតែរឿងប្ដីនាងជាមួយដៃគូចាន់ កែវនិមល បានផ្ទុះពេញផ្ទៃប្រទេសនោះ។ទោះជាយ៉ាងណាការមិនព្រមពពោះកូនភ្លោះតាមសំណើរប្ដីរបស់សុជាតិ នៅពេលនេះអាចធ្វើឲ្យលោកវិបុល មិនសូវសប្បាយចិត្ត ប៉ុន្ដែសុជាតិ ហាក់គ្មានការគិតច្រើនថាខ្លាចរឿងពន្យាពេលយកកូននេះក្លាយទៅជារឿងធំឡើយ ព្រោះថាពេលនេះនាងត្រូវក្ដាប់ឱកាសចេញកើបលុយសិន។
គង់ សុជាតិ មេម៉ាយកូន២បានរៀបការជាមួយលោកជា វិបុល កាលពីថ្ងៃទី៩ខែវិច្ឆិការឆ្នាំ២០១៣ ដែលពេលនេះទទួលបានចំណងដៃកូនស្រីម្នាក់ឈ្មោះជា សុជាតិនារី ហៅដូរី អាយុជាង៥ឆ្នាំ។បើទោះជាសុជាតិ មិនទាន់ធ្វើឲ្យស្វាមីក្មេងញញឹមតាមរយៈនាងពពោះកូនភ្លោះក្ដី ប៉ុន្ដែជាញឹកញាប់នាងតែងតែបណ្ដើរប្ដីទៅសាសងស្នេហ៍នៅជាយក្រុងដើម្បីកុំឲ្យស្នេហា ប្រែទៅជាភាពសោះកក្រោះ ហើយលោកវិបុល បានធ្វើឲ្យភរិយាមានទំនុកចិត្តដូចដើមឡើងវិញហើយ បន្ទាប់ពីលោកបានទៅសាងផ្នួសជាសាមណេរ(នេន)រយៈពេល១០ថ្ងៃនៅវត្តនិគ្រោធវ័ន ហៅវត្តគល់ទទឹង៕
