ខេត្តកំពង់ធំ ៖ យុវជនជាជាងដែក ២នាក់ ជិះម៉ូតូចេញពីកន្លែងធ្វើការ សំដៅទៅផ្ទះវិញ ស្រាប់តែជ្រុលចង្កូតម៉ូតូទៅបុកបង្កាន់ដៃស្ពាន យ៉ាងពេញទំហឹង បណ្តាលឱ្យស្លាប់នៅនឹងកន្លែងទាំង២នាក់។
ហេតុការណ៍គ្រោះថ្នាក់ចរាចរណ៍ដ៏រន្ធត់ខាងលើនេះ បានកើតឡើង កាលពីវេលាម៉ោង ៤និង៣០នាទីរសៀល ថ្ងៃទី២៦ ខែមេសា ឆ្នាំ២០២២ នៅត្រង់ចំណុចផ្លូវលំក្រាលកៅស៊ូ ស្ថិតនៅភូមិរូង ឃុំក្រវា ស្រុកបារាយណ៍។
ជនរងគ្រោះទាំង២នាក់ ទី១-ឈ្មោះស៊ុន ហេង ភេទប្រុស អាយុ២០ឆ្នាំ មុខរបរជាងផ្សារដែក មានលំនៅភូមិដូង ឃុំបល្ល័ង្ក ស្រុកបារាយណ៍ និងទី២-ឈ្មោះលាភ ភេទប្រុស អាយុ២១ឆ្នាំ មុខរបរជាងផ្សារដែក មានលំនៅក្នុងភូមិជាមួយគ្នា។
យោងតាមប្រភពព័ត៌មានពីកន្លែងកើតហេតុ បានឱ្យដឹងថា យុវជនទាំង២នាក់នេះ មានមុខរបរជាជាងផ្សារដែក មុនពេលកើតហេតុ អ្នកទាំងពីរចេញពីកន្លែងធ្វើការ នៅឯភូមិបាក់ស្នា ក្នុងគោលបំណងវិលត្រឡប់មកផ្ទះវិញ។ ស្រាប់តែអកុសល ពេលធ្វើដំណើរមកដល់ត្រង់ចំណុចកើតហេតុ ក៏ជ្រុលចង្កូតម៉ូតូបុកបង្កាន់ដៃស្ពាន យ៉ាងពេញទំហឹង បណ្តាលឱ្យស្លាប់ទាំង២នាក់យ៉ាងអាណោចអធ័មតែម្តង។
ក្រោយកើតហេតុ សមត្ថកិច្ចជំនាញបានចុះធ្វើការវាស់វែង រួចប្រគល់សពយុវជនរងគ្រោះទាំង២នាក់ ឱ្យក្រុមគ្រួសារ ដើម្បីរៀបចំធ្វើបុណ្យរៀងៗខ្លួន៕
អ៊ុង សំអាត