សុវត្ថិឌី ធារិកា ៖ជួបទុក្ខសោកដូចសុខ ពិសី

ភ្នំពេញ៖សុវត្ថិឌី ធារិកា បានបាត់បង់ជីវិតឪពុកនិងម្ដាយភ្លាមៗក្រោយពី​រថយន្ដរបស់នាង​ម៉ាក​Lexus Rx300 ព័ណ​ទឹកប្រាក់ពាក់ស្លាកលេខភ្នំពេញ 2BJ -1672 បានក្រឡាប់ចូលប្រឡាយ​ទឹក កាលពី​ថ្ងៃទី​១៧ខែ​ឧសភា​ឆ្នាំ២០២២ វេ​លាម៉ោង៣និង៤៥នាទីរសៀល ឋិតនៅភូមិឆែប​ខាងកើត ឃុំឆែប១ ស្រុកឆែប ខេត្តព្រះវិហារ។លោកមាស សុវត្ថិឌី អាយុ៥៩ឆ្នាំដែលជា​ឪ​ពុក​ធារិកា ជាអ្នកបើកបរ និងម្ដាយរបស់នាងអ្នកស្រីពៅ សុទ្ធារី អាយុ៤៧ឆ្នាំបានស្លាប់ ខ​ណៈ​​​​​ដែលប្អូនប្រុសនាងឈ្មោះសុវត្ថិឌី ធារីរៈយុទ្ធ  និងលោកយាយទេព សាផាន ជាម្ដាយសពរួម​ទាំង​​ធារីកា ផ្ទា​ល់​​​រងរបួសស្រាល។តារាចម្រៀងធារិកា បានយំសោកបោកខ្លួនឡើងខ្សោះទឹក​ភ្នែក​ហើយសព​ម្ដាយ​និងឪពុក​របស់នាងត្រូវបានដឹកយកមកធ្វើបុណ្យនៅវត្ត​សង្រ្កាន្ដតាព្រហ្ម​ហៅវត្តស្ទឹងមានជ័យ និងបានបូជា​កាលពីវេលា​ម៉ោង៤រសៀលថ្ងៃទី១៩ខែឧសភាឆ្នាំ២០២២ ។ទុក្ខសោករបស់​ធា​រិកា នាពេលនេះ​គឺគ្មានអ្វីប្រៀបផ្ទឹមបាន​នោះទេ​ព្រោះ​នាងបានក្លាយទៅ​ជាតារា​ចម្រៀង​កំព្រា​ទាំង​ឪពុកនិងម្ដាយនៅអាយុ២៦ឆ្នាំនេះតទៅហើយ។

 អំឡុងពេលដែលសុវត្ថិឌី ធារិកា កំពុងតែកាន់ទុក្ខយ៉ាងក្រៀមក្រំជូនឪពុកម្ដាយ​របស់​នាងធ្វើឲ្យ​គេនឹក​ឃើញដល់​តារា​ចម្រៀងសាន់ដេសុខ ពិសី ដែលបានរងគ្រោះថ្នាក់ចរា​ចរណ៍​និងជួបទុក្ខសោកស្រដៀងទៅនិងធារិកា នៅ​ពេល​នេះដែរហើយពិសី រងទុក្ខនិង​ជួបវិបត្តិផ្លូវ​ចិត្តយ៉ាងធ្ងន់ធ្ងបំផុតអស់រយៈពេល១៤ឆ្នាំមកនេះ។កាលពីថ្ងៃ​ទី១៤​ខែមេសាឆ្នាំ២០០៨ សុខ ពិសី បានជួបគ្រោះថ្នាក់ចរាចរណ៍ក្រឡាប់រថយន្ដLexus Rx300 ព័ណខ្មៅដែលនាង​ជាអ្នក​បើកបរដោយផ្ទាល់នៅលើផ្លូវជាតិលេខ៤ ត្រង់ចំណុចស្រុកកំពង់សិលា ខេត្តព្រះសីហនុ ដែល​បណ្ដាល​ឲ្យអ្នក​រួម​ដំណើរជាមួយនាងមានដូចជាម្ដាយបង្កើត ជីដូន និងក្មួយរបស់នាងផ្ទាល់​បាន​បាត់​បង់ជីវិតនៅនិងកន្លែង ស្រប​ពេលដែលនាងរងរបួសបាក់ជើង ហើយសន្លប់​ស្ដូក។ទុក្ខ​សោក​ក្នុងជីវិតរបស់ពិសី កាលនោះ​និងរហូតមក​ដល់​បច្​ចុប្បន្នក៍មិនខុសពីធារិកា ដែរ តែនាង​មាន​សំណាងជាងតារាថោនត្រង់​ថាពិសី នៅមានឪពុកជាទីស្រលាញ់​របស់នាងដែលចាំជួយ​ផ្ដល់កំលាំងចិត្តឲ្យនាងគ្រប់ពេលវេលាទាំងអស់។គេចាំបានថាកាលនោះក្រោយពិសី ដឹង​ខ្លួន​និង​ដឹង​រឿង​ពិត​ថាមនុស្សជាទីស្រលាញ់របស់នាងបានស្លាប់ក្នុង​ហេតុការណ៍​គ្រោះ​ថ្នាក់​ចរា​ចរណ៍​ដ៍​សាហាវ​នោះនាងគិតតែពីយំ និងមិនចង់រស់នៅតទៅទៀតឡើយ។ប៉ុន្ដែ​ទាំងអ្នករួម​អាជីពនិង​ក្រុម​គ្រួសារ​របស់នាង​បាន​លើកទឹកចិត្តពិសី រហូតដល់នាងអាច​តាំងអារម្មណ៍ឡើង​វិញ​បាន​និង​សម្រាកពីសិល្បៈជាច្រើន​ឆ្នាំទើប​វិលមក​បន្ដអាជីពនៅ​សាន់ដេរហូតមក​ដល់បច្ចុ​ប្បន្ន។​ក្រោយ​ពិសី បានដឹងថាឪពុកម្ដាយសុវត្ថិឌី ធារិកា បានទទួល​មរ​ណភាព​ក្នុងឧបទ្ទហេតុ​គ្រោះ​ថ្នាក់ចរាចរណ៍នោះភ្លាមៗនាងបានចេញសារថា”បងសូមចូលរួមរំលែកទុក្ខផង ប្អូន​ស្រី រឹងមាំ​ណាអូន”។

 ចំពោះសុវត្ថិឌី ធារិកា ដែលជាអ្នកចម្រៀងច្រៀងនៅថោន វិញនាងមិនទាន់កំណត់​ពេ​ល​​វេលាជាក់​លាក់ក្នុង​ការ​វិលត្រឡប់ទៅចាប់អាជីពចម្រៀង​សារជាថ្មីនោះទេ។ប៉ុន្ដែសាច់ញាត្តិ​របស់ធារិកា ប្រាប់អ្នកយកព័ត​មាន​យើងថា​តារាកំពុងតែក្រៀមក្រំ​រូបនេះកាន់ទុក្ខរយៈពេលខ្លី​ពោល​គឺក្រោយធ្វើបុណ្យខួបជូនឪពុក​ម្ដាយនាងគម្រប់​៧ថ្ងៃ​​រួច​ធារិកា នឹងពិចារណា ចាប់ផ្ដើម​ការងារ​សិល្បៈ​ខ្លះៗឡើងវិញ។

  ក្រៅពីសុវត្ថិឌី ធារិកា និងសុខ ពិសី តារាចម្រៀងដែលជួបគ្រោះថ្នាក់ចរាចរណ៍គូ​ឲ្យ​រន្ធត់​​មានដូចជាលោកឧក​ញ៉ាខែម ប៊ុនថៃ អំឡុងពេលធ្វើដំណើរនៅលើផ្លូវជាតិលេខ៤ ឆ្ពោះ​ទៅកាន់ក្រុងកំពង់សោម កាលពី​ថ្ងៃទី៧ខែ​មីនា​ឆ្នាំ២០១៣ តាម​រថយន្ដ​ម៉ាក​ធុនដ្រាព័ណស ពាក់ស្លាកលេខ2N -7997 ត្រូវបានរថយន្ដកុងតឺណឺពាក់ស្លាកលេខ​ភ្នំពេញ3A -9723 បាន​បើកបុកក្នុងទិសដៅបញ្ច្រាសគ្នាបណ្ដាលឲ្យស្លាប់អ្នករួមតំណើរអស់៤នាក់ ខណៈមនុស្ស៤​នាក់​ផ្សេងទៀតដែលជិះក្នុងរថយន្ដនោះ​ដែរ​រួមទាំងសិរីមន្ដ ផងបានរងរបួស។​ដោយឡែក​កាល​ពីថ្ងៃ​ទី១៤ខែមីនា​ឆ្នាំ២០១៥ តារា​ចម្រៀង​​ស៊ិចស៊ីហ្វី ហ្វី ក៍បានជួបគ្រោះថ្នាក់ចរាចរណ៍​នៅឃុំចម្ការលួងស្រុកកំពង់សិលា ផ្លូវ​ជាតិ​លេខ៤ នៅពេលដែលនាងធ្វើតំណើរមកកាន់ភ្នំ​ពេញហើយក៍រេចង្កូតឡានបុក​ជាមួយ​ដើមឈើ តែមិនហេតុ​ការណ៍​នោះមិនបណ្ដាលឲ្យមាន​អ្នក​បាត់បង់ជីវិតឡើយ៕