ភ្នំពេញ៖ បុរសម្នាក់សង្ស័យបែកថ្នាំ ភ្ញាក់ពីដំណេកសួររកលេខទូរសព្ទ័បងថ្លៃតែសង្សារឆ្លើយថាមិនស្គាល់ពេលឃើញបងថ្លៃមកដល់បានយកកាំបិតបុ័ងតោដេញកាប់ផ្អើលពេញហាងហើយ យកអង្រែបុកគ្រឿងទៅវាយកំទេចអស់ម៉ូតូមួយគ្រឿង បង្កឲ្យមានការភ្ញាក់ផ្អើលកាលពីវេលាម៉ោង៣និង៣០នាទីរសៀលថ្ងៃទី៥ខែធ្នូឆ្នាំ២០១៦ ត្រង់ចំនុចផ្ទះជួល ផ្លូវ២០០២ ភូមិត្រពាំងល្វា សង្កាត់ទឹកថ្លា ខណ្ឌសែនសុខ ។
ជនបង្កមានឈ្មោះ មួន ទូច ហៅរ៉ា ភេទប្រុស អាយុ២៧ឆ្នាំ មុខរបរចុងភៅ ស្នាក់នៅផ្ទះជួលលេខ០១ ផ្លូវ២០០១ ភូមិត្រពាំងល្វា សង្កាត់ទឹកថ្លា ខណ្ឌសែនសុខ ។
តាមប្រភពព័តមានពីសង្សារជនបង្កមានឈ្មោះ ស៊ឹម សេងហ៊ាង ភេទស្រី អាយុ២៦ឆ្នាំ មុខរបរបើកហាងលក់សាច់អាំង២០០២ ស្នាកនៅជាមួយគ្នា បានប្រាប់អោយដឹងថា រូបគាត់និងសង្សារជាជនបង្កបានស្គាល់គ្នា៧ឆ្នាំមកហើយ ក្រោយមករូបនាងបានជួលផ្ទះខាងលើដើម្បីបើកហាងលក់គុយទាវ និងលក់សាច់អាំងជាមួយគ្នា ។ ស្រ្តីខាងលើបានបន្តទៀតថា ជនបង្កជាកូនកំព្រានិងជាមនុស្សស្លូតបូត ទើបតែថ្មីកន្លងមកនេះ ជនបង្កបានប្រើប្រាស់ថ្នាំញៀនរហូតញៀនថ្នាំក្លាយជាមនុស្សកាចសាហាវ ។ មុនពេលកើតហេតុជនបង្កបានទាញកាំបិតបុ័ងតោដេញកាប់បងប្រុសរបស់នាងថែមទាំងយកអង្រែបុកគ្រឿងទៅវ៉ៃម៉ូតូរបស់បងប្រុសនាងបណ្ដាលអោយខ្ទេចអស់មួយគ្រឿងគឺម៉ូតូម៉ាកគុបជ្រុងសេ៥០ពណ៌បៃតងពាក់ស្លាកលេខភ្នំពេញ ១AR 1780 ។ ហេតុការណ៍ខាងលើនេះធ្វើឲ្យភ្ញៀវដែល កំពុងតែអង្គុយផឹកស៊ីនៅក្នុងហាងភ័យប៉ះសក់បាននាំគ្នារត់ចេញបាត់អស់ទាំងមិនទាន់គិតលុយផងដែរ ។
បើតាមសម្ដីរបស់ជនបង្កបានប្រាប់អោយដឹងថាមុនពេលកើតហេតុរូបគាត់បានហៅសង្សាររបស់ខ្លួនទៅសួររកលេខទូរសព្ទ័របស់បងថ្លៃតែនាងឆ្លើយថានាងមិនដឹងនោះទេដែលជាហេតុធ្វើអោយរូបគេខឹងសប្បារជាខ្លាំងហើយពេលនោះគេបានបោកតុកៅអីស្របពេលជាមួយគ្នានោះដែរបងថ្លៃប្រុសបានចុះពីលើផ្ទះជាន់ទីមួយមកបានស្ទុះទៅវាយរូបគាត់ដែលជាហេតុធ្វើអោយគាត់ទាញកាំបិតបុ័ងតោដេញកាប់បងប្រុសសង្សារបស់នាងតែម្តង ។
ក្រោយពេលកើតហេតុជនបង្កបានត្រូវសមត្ថកិច្ចនាំខ្លួនយកមកកាន់មូលដ្ឋានដើម្បីកសាងសំណុំរឿងបញ្ជូនទៅអធិការដ្ឋានខណ្ឌសែនសុខរងចាំការចាត់ការទៅតាមនីតិវិធី ៕
ដោយ៖ សោល វណ្ណៈ
