ក្រុមហ៊ុន ខេមប្រ៊ូវ និងគណៈកម្មាធិការជាតិវាយ​តម្លៃ​ទីក្រុងស្អាត បានសហការរៀបចំចលនាសម្អាតធ្នេរ ក្រោមប្រធានបទ «កម្ពុជាស្អាត កម្ពុជាបៃតង» នៅ​ខេត្ត​​ព្រះសីហនុ

ខេត្តព្រះសីហនុ ថ្ងៃទី១០ ខែកក្កដា ឆ្នាំ២០២២៖ ក្រុមហ៊ុន ខេមប្រ៊ូវ រួមជាមួយនឹងគណៈកម្មាធិការជាតិវាយតម្លៃ​ទីក្រុងស្អាត និងរដ្ឋបាលខេត្តព្រះសីហនុ បានសហការជាមួយដៃគូពាក់ព័ន្ធ រៀបចំយុទ្ធនាការសម្អាតឆ្នេរ ក្រោម​ប្រធានបទ «កម្ពុជាស្អាត កម្ពុជាបៃតង» ដែលស្ថិតនៅឆ្នេរអូរឈើទាល ១ ខេត្តព្រះសីហនុ។ កម្មវិធីនេះមានការ​អញ្ជើញ​ចូល​រួមជាគណៈអធិបតីពី ឯកឧត្តម ឡុង ឌីម៉ង់ អភិបាលរងនៃគណៈអភិបាលខេត្តព្រះសីហនុ និងឯក​ឧត្តម ហ៊ួត រិទ្ធី អគ្គលេខាធិការរងនៃគណៈកម្មាធិការជាតិវាយតម្លៃទីក្រុងស្អាត ក្រសួងទេសចរណ៍។ ចលនា​សម្អាត​នេះ ធ្វើឡើងក្នុងគោលបំណង ដើម្បីអបអរទិវាជាតិសម្អាតឆ្នេរ ក៏ដូចជាចូលរួមលើកកម្ពស់ការ​យល់ដឹងពី​ការការពារបរិស្ថាន និងលើកទឹកចិត្តឲ្យមានការចូលរួមឲ្យកាន់តែច្រើនពីប្រជាពល​រដ្ឋក្នុងការធ្វើឲ្យបរិស្ថាន​កាន់​តែ​​ប្រសើរ។

ក្នុងពិធីនេះដែរ លោក Bruce Kidner អគ្គនាយកគ្រប់គ្រងស្តីទី & ជានាយកជាន់ខ្ពស់ផ្នែកហិរញ្ញវត្ថុ បានសម្ដែង​នូវក្ដីរីក​រាយ និងពេញចិត្តជាខ្លាំង ដែលក្រុមហ៊ុន ខេមប្រ៊ូវ បានក្លាយជាចំណែកមួយក្នុងគំនិតផ្ដួចផ្ដើមមួយនេះ។   លោកបានថ្លែងថា «នៅខេមប្រ៊ូវ យើងមានក្តីសោមនស្សរីករាយដែលបានចូលរួមជាចំណែកមួយក្នុងចលនានេះ ដែលជាសកម្មភាពបំផុសស្មារតីអំពីការគ្រប់គ្រងកាកសំណល់ប្រចាំថ្ងៃ ក៏ដូចជាជួយដឹកនាំឲ្យមានការផ្លាស់ប្តូរ​ជាវិជ្ជមាននូវទម្លាប់នៃការចោលសំរាម»។ លោកបានបន្តទៀតថា «ការចូលរួមនេះ បានឆ្លុះបញ្ចាំងអំពី​សាមគ្គី​ភាព​ក្នុងកិច្ចការពារបរិស្ថាន។ យើងទាំងអស់គ្នាសុទ្ធតែមានកាលវិភាគ និងកាតព្វកិច្ចរៀងៗខ្លួន ប៉ុន្ដែពួកយើង​មាន​ទំ​នួល​ខុសត្រូវរួមគ្នាមួយ គឺការចូលរួមដើម្បីសង្គមកាន់តែប្រសើរ»។ លោកជឿជាក់ថា ការចូលរួមរបស់​យើង​​ទាំងអស់គ្នាក្នុងសកម្មភាពបរិស្ថាន នឹងនាំមកឲ្យមានការផ្លាស់ប្ដូរជាវិជ្ជមាន មិនថាតិច ឬច្រើន»។

ឯកឧត្តម ឡុង ឌីម៉ង់ អភិបាលរងនៃគណៈអភិបាលខេត្តព្រះសីហនុ ក៏បានមានប្រសាសន៍ក្នុងពិធីថា «ផ្អែក​លើបរិបទនេះ ទាមទារឲ្យយើងទាំងអស់គ្នាមានការយកចិត្តទុកដាក់ខ្ពស់ ក្នុងការពិចារណាគិតគូរឲ្យបានដិត​ដល់អំពីទិដ្ឋភាព សណ្តាប់ធ្នាប់ បរិស្ថាន ភាពស្អាត សន្តិសុខ សុវត្ថិភាព ការអភិវឌ្ឍ និងការគ្រប់គ្រងទី​ក្រុង​របស់យើង ដើម្បីផ្តល់នូវផាសុខភាព និងភាពរីករាយដល់ប្រជាពលរដ្ឋ និងភ្ញៀវទេសចរណ៍ដែលមកទស្សនា និងសម្រាកកំសាន្តនៅខេត្តព្រះសីហនុ»។ ឯកឧត្តមក៏បានបន្តទៀតថា «ដើម្បីសម្រេចឲ្យបាននូវគោលដៅ និងគោលបំណងខាងលើ យើងទាំងអស់គ្នាចាំបាច់ត្រូវយកចិត្តទុកដាក់ខ្ពស់ និងមានកិច្ចសហការល្អពីគ្រប់​ស្ថាប័នពាក់ព័ន្ធគ្រប់លំដាប់ថ្នាក់ រួមទាំងម្ចាស់អាជីវកម្មសេវាកម្មទេសចរណ៍  និងប្រជាពលរដ្ឋ ជាពិសេស​យុវជនដែលជាទំពាំងស្នងឬស្សី ក្នុងការឈានមុខចូលរួមចំណែកអនុវត្ត និងផ្សព្វផ្សាយបន្តទៅដល់ញាតិមិត្ត ក្រុមគ្រួសារ និងសង្គមជាតិរបស់យើងឲ្យបានកាន់តែទូលំទូលាយ»។

ឯកឧត្តម ហ៊ួត រិទ្ធី អគ្គលេខាធិការរងនៃគណៈកម្មាធិការជាតិវាយតម្លៃទីក្រុងស្អាត ក្រសួងទេសចរណ៍ ក៏បាន​ថ្លែងក្នុងកម្មវិធីថា «យុទ្ធនាការកម្ពុជាស្អាត កម្ពុជាបៃតង នៅធ្នេរក្នុងថ្ងៃនេះ គឺធ្វើឡើងក្នុងគោលបំណងធ្វើឲ្យឆ្នេរ​យើងស្អាត ដើម្បីទាក់ទាញភ្ញៀវទេសចរណ៍ជាតិ និងអន្តរជាតិឲ្យកាន់តែច្រើនមកលេងកំសាន្តនៅធ្នេរ ក៏ដូចជា​ដើម្បី​កម្ពុជាត្រៀម​ខ្លួនទទួលរៀបចំបុណ្យសមុទ្រ និងធ្វើជាម្ចាស់ផ្ទះក្លឹបឆ្នេរសមុទ្រដែលស្អាតជាង​គេលើពិភព​លោក ក្នុងខែធ្នូ ខាងមុខនេះ»។ ឯកឧត្តមបានបន្តទៀតថា «ការចូលរួមទាំងអស់គ្នា ទាំងវិស័យសាធារណៈ វិស័​យ​ឯកជន ដៃគូអភិវឌ្ឍន៍ និងប្រជាពលរដ្ឋ មានសារសំខាន់ណាស់ ក្នុងការចូលរួមធ្វើឲ្យឆ្នេរស្អាត កម្ពុជា​ស្អាត»។

ក្រុមហ៊ុន ខេមប្រ៊ូវ បានបញ្ជាក់បន្ថែមទៀតថា ក្រោមកិច្ចសហការដ៏ស្អិតរមួតជាមួយដៃគូពាក់ព័ន្ធ ក្រុមហ៊ុននឹង​រៀប​ចំ​ចលនាសម្អាតចំនួនពីរលើក ក្នុងឆ្នាំ២០២២នេះ  ដែលលើកទី២ នឹងរៀបចំធ្វើឡើងនៅរាជធានីភ្នំពេញក្នុង​ខែកញ្ញា ដើម្បីអបអរទិវាសម្អាតពិភពលោក។ ក្នុងនាមជាក្រុមហ៊ុនឈានមុខគេមួយនៅកម្ពុជា ក្រុមហ៊ុន ខេមប្រ៊ូវ ប្ដេជ្ញាដឹកនាំ និងប្រតិបត្តិអាជីវកម្មប្រកបដោយការទទួលខុសត្រូវ &ចីរភាព និងបន្ដចូលរួមចំណែកដើម្បីសង្គម​កាន់តែប្រសើរទាំងថ្ងៃនេះ &ថ្ងៃស្អែក៕