អាមេរិកបានសម្លាប់លោកMaher al-Agal មេដឹកនាំក្រុមភេរវកររដ្ឋឥស្លាម(ISIS) នៅក្នុងប្រទេសស៊ីរី នៅក្នុងការវាយប្រហារដោយយន្តហោះគ្មានមនុស្សបើក(ដ្រូន)កាលពីថ្ងៃអង្គារ។លោក Al-Agal គឺជាមេដឹកនាំកំពូលម្នាក់ក្នុងចំណោមមេដឹកនាំកំពូលៗទាំងបួនរបស់ក្រុមនេះ។ នេះបើយោងតាមការចេញផ្សាយរបស់AFP កាលពីថ្ងៃពុធទី១៣ កក្កដា ២០២២។
លោកMaher al-Agal ត្រូវបានសម្លាប់ពេលកំពុងជិះម៉ូតូនៅជិត តំបន់Jindayrisក្នុងប្រទេសស៊ីរីហើយជំនួយការកំពូលរបស់គាត់ម្នាក់ទៀតបានរងរបួសយ៉ាងធ្ងន់ធ្ងរ។នេះបើតាមអ្នកនាំពាក្យទីបញ្ជាការកណ្តាលរបស់មន្ទីរបញ្ចកោណលោកវរសេនីយ៍ទោDave Eastburn បានប្រាប់ AFP ។
អ្នកនាំពាក្យបញ្ជាការកណ្តាលរបស់មន្ទីរបញ្ចកោណ (CENTCOM) លោក Col. Joe Buccino បាននិយាយថា ការសម្លាប់មេដឹកនាំISISនឹងរំខានដល់សមត្ថភាពរបស់អង្គការភេរវករក្នុងការគ្រោងនិងការវាយប្រហារបន្ថែមទៀត។ ISIS បន្តតំណាងឱ្យការគំរាមកំហែងដល់សហរដ្ឋអាមេរិក និងដៃគូក្នុងតំបន់។
មន្ត្រីម្នាក់ដែលនិយាយក្នុងលក្ខខណ្ឌសុំមិនបញ្ចេញឈ្មោះបានបដិសេធមិនផ្តល់ព័ត៌មានលម្អិតទេ។ការសម្លាប់នេះនឹងក្លាយជាការវាយប្រហារថ្មីមួយទៀតចំពោះកិច្ចខិតខំប្រឹងប្រែងរបស់ក្រុមសកម្មប្រយុទ្ធជ្រុលនិយមក្នុងការរៀបចំឡើងវិញជាកងកម្លាំងទ័ពព្រៃ បន្ទាប់ពីបាត់បង់ទឹកដីដ៏ច្រើនសន្ធឹកសន្ធាប់។
អង្គការឃ្លាំមើលសិទ្ធិមនុស្សស៊ីរីបានបញ្ជាក់ថាAgal ត្រូវបានសម្លាប់ក្នុងការវាយប្រហារដោយយន្តហោះដ្រូន។
កងកម្លាំងការពារជនស៊ីវិលស៊ីរីបាននិយាយថា មនុស្សម្នាក់បានស្លាប់ និងម្នាក់ទៀតរងរបួស នៅក្នុងការវាយប្រហារមួយដែលសំដៅលើម៉ូតូនៅខាងក្រៅទីក្រុងAleppoប៉ុន្តែមិនបានកំណត់អត្តសញ្ញាណជនរងគ្រោះនោះទេ។
សហរដ្ឋអាមេរិកបានធ្វើការវាយប្រហារនិងការវាយឆ្មក់ជាច្រើនទៅលើបុគ្គលិកជាន់ខ្ពស់របស់ISនៅភាគពាយព្យនៃ ប្រទេសស៊ីរីក្នុងរយៈពេលប៉ុន្មានខែថ្មីៗនេះ។ មេដឹកនាំកំពូលនៃក្រុមនេះត្រូវបានចាប់ខ្លួនដោយកងកម្លាំងសហរដ្ឋអាមេរិក ក្នុងការវាយឆ្មក់មួយកាលពីខែមុនខណៈដែលមេបញ្ជាការ IS លោក Abu Ibrahim al-Hashimi al-Qurashi បានសម្លាប់ខ្លួនជាមួយនឹងអាវកាក់អំឡុងពេលការវាយឆ្មក់ដោយកងកម្លាំងពិសេសរបស់សហរដ្ឋអាមេរិកនៅក្នុងតំបន់កាលពីខែកុម្ភៈ។
អ្នកនាំពាក្យនៃកងកម្លាំងប្រជាធិបតេយ្យស៊ីរី ដែលជាក្រុមគាំទ្រដោយសហរដ្ឋអាមេរិកនៅក្នុងសង្គ្រាមស៊ីវិលពហុភាគីរបស់ប្រទេសស៊ីរី បានអះអាងកាលពីថ្ងៃអង្គារថា អ្នកប្រយុទ្ធISរាប់រយនាក់នៅតែលាក់ខ្លួននៅក្នុងតំបន់ដែលគ្រប់គ្រងដោយតួកគីនៃភាគខាងជើងស៊ីរី៕
