បារាំង៖តារាចម្រៀងថោន លោកករុណា ពេជ្រ បានចេញទៅបារាំងជាថ្មីម្ដងទៀតដើម្បីជួបនិងមើលថែម្ដាយលោកនៅទីនោះដែលមានជំងឺត្បៀតសសៃឈាម ខណៈម្ដាយលោកទើបតែវិលទៅបារាំងវិញកាលពីខែមិថុនា បន្ទាប់ពីលោកស្រីបានមកលេងលោកនិងស្នាក់នៅខ្មែររយៈពេលដល់ទៅ៣ខែ។លោកករុណា ពេជ្រ បានប្រាប់អ្នកយកព័តមានយើងតាមទូរស័ព្ទកាលពីព្រឹកថ្ងៃទី៧កញ្ញា មុនលោកឈានជើងឡើងយន្ដហោះថាសម្រាប់ដំណើរទៅបារាំងរបស់លោកជើងនេះតាមគម្រោងមានរយៈពេលតែ២សប្ដាហ៍ប៉ុណ្ណោះលោកនឹងវិលត្រឡប់មកខ្មែរវិញដើម្បីឲ្យទាន់រៀបចំធ្វើបុណ្យគម្រប់ខួប១ឆ្នាំជូនឪពុករបស់លោកឧបាសកម៉ុក សាខន នៅថ្ងៃទី១៤និង១៥ខែតុលាឆ្នាំ២០២២ ខាងមុខនេះ។លោកថាមុនចេញទៅបារាំងលើកនេះរូបលោកក៍បានចេញចម្រៀងថ្មី១បទដែរទាក់ទងតំបន់ទេសចរណ៍នៅខេត្តបាត់ដំបងនោះគឺបទ”ភ្នំព្រឹក នឹកភ្នំពេញ”។តែទាក់ទងចម្រៀងសម្រាប់ពិធីបុណ្យភ្ជុំបិណ្ឌវិញលោកថាឆ្នាំនេះរៀបចំមិនទាន់ទេ។
សូមបញ្ជាក់ថាកាលពីចុងឆ្នាំ២០២១ លោកករុណា ពេជ្រ ទទួលបានVisa ពីស្ថានទូតបារាំងដល់ទៅ១ឆ្នាំដើម្បីឲ្យលោកមានសិទ្ធិចេញចូលជួបមិនមើលថែម្ដាយដែលរស់នៅទីនោះហេតុនេះហើយបានជាលោកចង់ទៅឬមកពេលណាក៍បាន អំឡុងពេលវីសា នៅមានសុពលភាពនេះ។គេកត់សម្គាល់ដែរតារាចម្រៀងថោនរូបនេះស្ថិតក្នុងចំណោមតារាដែលងាកមករកស៊ីវិស័យអចលនទ្រព្យម្នាក់នាពេលបច្ចុប្បន្នហើយលោកពេជ្រ ធ្លាប់បង្ហើបថាលោកមានផ្ទះនៅទីក្រុងភ្នំពេញសរុបចំនួនដល់ទៅ៧ទីតាំងផ្សេងៗគ្នាទៀតផង។
ប៉ុន្ដែកាលពីដើមខែធ្នូឆ្នាំ២០២១ លោកពេជ្រ បានដាក់លក់ផ្ទះវីឡារធំ១នៅខណ្ឌសែនសុខ នូវតម្លៃជិត២លានដុល្លារ ដើម្បីបង្វិលលុយរកស៊ី តែរហូតមកដល់ពេលនេះផ្ទះវីឡារស្កឹមស្កៃនោះលក់មិនទាន់ដាច់ឡើយ ព្រោះលោកថាបើលក់ដាច់ក៍លក់ទៅ បើលក់មិនដាច់ទុកនៅធម្មតា ខណៈដែលគម្រោងសាងសង់Resort របស់លោកនៅខេត្តមណ្ឌុលគិរីក៍ត្រូវបានផ្អឹបទុកមួយអន្លើសិនដែរ។លោកកុរណា ពេជ្រ ធ្លាប់បង្ហើបប្រាប់ថាទោះជាលោកមមាញឹកការងារខាងក្រៅសិល្បៈកាន់តែច្រើនក្ដី ប៉ុន្ដែអាជីពចម្រៀងលោកមិនចោលទេ គឺនៅតែឆ្លៀតចេញបទថ្មីៗជាហូហែ ពិសេសលោកមានផែនការការណ៍ចេញចម្រៀងលើកស្ទួយវិស័យទេសចរណ៍ក្នុងស្រុកឲ្យបានគ្រប់២៥ខេត្តក្រុង បន្ទាប់ពីបានចេញបទ”មន្ដស្នេហ៍កំពង់ស្ពឺ”និងបទ”ភ្នំព្រឹក នឹកភ្នំពេញ”៕
