ភ្នំពេញ៖ស៊ឹម ស្រីនិច្ច បានបញ្ចប់ភាពយន្ដភាគដល់ទៅ៣រឿងជាតំណែងតួឯកដូចគ្នាកាលពីពេលថ្មីៗនេះក្នុងនោះមានដូចជារឿង”ឈាមបាប”,”ដង្កូវក្នុងសាច់”របស់ទូរទស្សន៍ហង្សមាស និងរឿង”សង្រ្គាមស្នេហ៍លោហិត”របស់ប៉ុស្ដិ៍បាយ័ន ខណៈនៅចុងឆ្នាំ២០២២ នេះនាងត្រៀមថតភាពយន្ដផ្នែកបុរាណមួយទៀតឲ្យហង្សមាសដែលជាស្នាដៃរបស់លោកហ្វៃ សំអាង តែនាងថាមិនអាចប្រាប់ចំណងជើងនិងពីតួនាងត្រូវសម្ដែងនោះជាមុនបានឡើយ។ស្រីស្រស់រូបនេះថាដោយសារតែមានភាពមមាញឹកច្រើនទៅលើការថតភាពយន្ដទើបនាងមិនទាន់បានទៅវត្តកាន់បិណ្ឌក្នុងពិធីបុណ្យភ្ជុំនេះទេ ប៉ុន្ដែនៅថ្ងៃភ្ជុំបិណ្ឌធំនាងនឹងទៅសម្រុកយកតែម្ដង។
គេកត់សម្គាល់ថានេះជាការវិវត្តន៍ដ៍ល្អមួយក្នុងអាជីពសិល្បៈរបស់កញ្ញាស៊ឹម ស្រីនិច្ច ក្រោយនាងផ្អាកការសម្ដែងរយៈពេលខ្លីហើយទើបចាប់ផ្ដើមវិលវិញក្រោយស្ថានភាពកូវីដថមថយនេះ ប៉ុន្ដែការងារសិល្បៈរបស់នាងកាន់តែត្រូវប៉ាន់ពិសេសគឺទទួលបានតំណែងជាតួឯកក្នុងភាពយន្ដធំៗជាបន្ដបន្ទាប់ទើបធ្វើឲ្យនាងក្លាយទៅជាតារាលេចធ្លោម្នាក់ក្នុងចំណោមអ្នកសម្ដែងនាពេលបច្ចុប្បន្ន។ប៉ុន្ដែទន្ទឹមនិងកំពុងតែមានយ៊ីអ៊ុនល្អនេះដែរស្រីនិច្ច ថ្មីៗនេះដែរនាងបានបង្ហាញខ្លួនក្នុងឈុតកូនក្រមុំដ៍ស្រស់សោភា ជាបន្ដបន្ទាប់ទើបធ្វើឲ្យមានការសង្ស័យថាស្រីស្អាតកំពុងតែសមឬលឈុតកូនក្រមុំទុកជាមុនសម្រាប់ខ្លួនឯងហើយ ហេតុនេះមិនយូទេនាងនឹងមានដំណឹងល្អឆាប់ៗជាមិនខាន ព្រោះមុននេះនាង ធ្លាប់បង្ហើបថាបេះដូងនាងកំពុងតែសង្កេតមើលបុរសម្នាក់ហើយ។
យ៉ាងណាទាក់ទងរឿងការពូកែតុបតែងជាកូនក្រមុំដ៍ស្អាតផូផង់នេះកញ្ញាស្រីនិច្ច ថានោះមិនមែនជាការតេស្ដដើម្បីត្រៀមខ្លួនលាភាពនៅលីវក្នុងពេលដ៍ខ្លីនេះទេ។តារាបង្ហាញម៉ូដក្លាយទៅជាជាអ្នកសម្ដែងភាពយន្ដដ៍គូឲ្យទាក់ទាញរូបនេះថាឈុតដែលនាងគ្រងជាសម្លៀកបំពាក់កូនក្រមុំទាំងនោះគឺគ្រាន់តែនាងធ្វើជាម៉ូឌែលឲ្យហាងទាំងនោះ មិនមែននៅសុខៗនាងទៅលទុកប្រើកម្មវិធីខ្លួនឯងឡើយ។ស្រីនិច្ច នៅតែបង្ហើបថានាងនិងបុរសម្នាក់ដែលស្និតស្នាលគ្នានោះរហូតមកដល់ពេលនេះ គឺនៅតែស្ថិតក្នុងតំណាក់កាលមើលចិត្តគ្នាតទៅទៀតនៅឡើយ ហេតុនេះមិនទាន់ឈានដល់ការគិតគូរឿងថ្ងៃពិសេសនោះទេ។
សូមបញ្ជាក់ថាស៊ឹម ស្រីនិច្ច ដែលកំពុងតែធ្វើឲ្យគេចាប់អារម្មណ៍ទាំងការលេចមុខតាមភាពយន្ដ,ខារ៉ាអូខេ និងស្ពតពាណិជ្ជកម្មនោះស្រាប់តែមុននេះនាងបានផ្អាកពីអាជីពសិល្បៈអស់រយៈពេល១ឆ្នាំដើម្បីងាកទៅរកស៊ីផ្នែកអចលនទ្រព្យ ហើយនៅពេលដែលនាងវិលវិញនេះនាងថាអាជីវកម្មរបស់នាងខាងក្រៅសិល្បៈនៅតែតណើរការធម្មតាដោយសារតែនាងមានក្រុមការងារធ្វើជំនួស។តារាសម្ដែងដែលមានរូបសម្រស់ស្រស់សោភា រូបនេះត្រូវបានមហាជនចាប់អារម្មណ៍ខ្លាំងតាមរយៈការលេចមុខក្នុងភាពយន្ដក្នុងតំណែងតួឯកជាបន្ដបន្ទាប់ដែលនាងអះអាងថាតាំងពីចាប់អាជីពសិល្បៈមកនាងធ្លាប់បានថតភាពយន្ដដល់ទៅជាង៥០រឿងទៅហើយ។
ប៉ុន្ដែអ្វីដែលស្រីនិច្ច នឹងទទួលបានអារម្មណ៍កាន់តែប្លែកហើយមានការរំពឹងខ្ពស់ជាងមុនៗទៅទៀតនោះគឺនាងក្លាយជាតួឯកក្នុងភាពយន្ដខ្នាតធំរបស់អ្នកដឹកនាំសម្ដែងល្បីឈ្មោះលោកហ្វៃ សំអាង នៅចុងឆ្នាំ២០២២នេះដែលគេអាចព្យាករណ៍បានថាក្រោយរឿងនេះដាក់បញ្ចាំងស្រីនិច្ច នឹងត្រូវទស្សនិកជនកាន់តែស្គាល់នឹងបានឃើញនូវស្នាដៃនឹងទេពកោសល្យរបស់នាងច្បាស់ថែមទៀតជាមិនខាន។ប៉ុន្ដែសំណួរដែលមហាជនចង់ដឹងថាតើនារីដែលមានសម្រស់គូរឲ្យក្នក់ក្នាញ់បែបនេះបុរសណាទៅដែលនាងនឹងប្រគល់បេះដូងឲ្យឃុំគ្រង?
