ភ្នំពេញ ៖ កម្លាំងជំនាញព្រហ្មទណ្ឌ ស្នងការដ្ឋាននគរបាលរាជធានីភ្នំពេញ កាលពីវេលាម៉ោង២និង១០នាទីរសៀល នៅថ្ងៃទី១៥ ខែតុលា ឆ្នាំ២០២២ បានសហការជាមួយកម្លាំងប៉ុស្តិ៍នគរបាលរដ្ឋបាលបឹងកេងកងទី១ បានធ្វើការឃាត់ខ្លួនស្ត្រីសង្ស័យម្នាក់ ពាក់ព័ន្ធករណីលួច (វះកាបូបយកសម្ភារៈ) នៅចំណុចក្នុងផ្សារបឹងកេងកង ផ្លូវលេខ៣៨០ ភូមិ៩ សង្កាត់បឹងកេងកងទី១ ខណ្ឌបឹងកេងកង។
ស្ត្រីសង្ស័យដែលត្រូវបានសមត្ថកិច្ចចាប់ឃាត់ខ្លួន មានឈ្មោះសែម បញ្ញា អាយុ២៧ឆ្នាំ មុខរបរមិនិពិតប្រាកដ ស្នាក់នៅផ្ទះជួល ផ្លូវបេតុង សង្កាត់ទឹកល្អក់១ ខណ្ឌទួលគោក។ រីឯវត្ថុតាងចាប់យក រួមមាន កាបូបក្រណាត់ស្ពាយចំហៀងពណ៌ស ចំនួន១ កូនកាបូបម៉ាក MK ចំនួន១ ជារបស់ជនរងគ្រោះ ទូរស័ព្ទម៉ាក iPhone 11Pro Max ជារបស់ជនសង្ស័យ។
តាមប្រភពពីសមត្ថកិច្ច បានឱ្យដឹងថា មុនពេលកើតហេតុ ស្ត្រីសង្ស័យខាងលើ បានចូលទៅធ្វើសកម្មភាពវះកាបូប នៅក្នុងផ្សារបឹងកេងកង លុះក្រោយពីវះកាបូបរបស់ជនរងគ្រោះ បានសម្រេច តែត្រូវជនរងគ្រាះដឹងខ្លួនទាន់ ក៏ស្រែកឆោឡោ និងចាប់ក្របួចស្ត្រីសង្ស័យជាប់តែម្តង រួចរាយការណ៍ប្រាប់សមត្ថកិច្ច ចុះមកនាំខ្លួនស្ត្រីសង្ស័យ យកទៅចាត់ការតាមច្បាប់។
ស្ត្រីសង្ស័យ ត្រូវបានឃាត់ខ្លួននៅអធិការដ្ឋាននគរបាលខណ្ឌបឹងកេងកង ជាបណ្តោះអាសន្ន ដើម្បីកសាងសំណុំរឿង បញ្ជូនទៅសាលាដំបូងរាជធានីភ្នំពេញ ចាត់ការបន្តតាមនីតិវិធី៕