ភ្នំពេញ៖អតីតតារាចម្រៀងRock និងត្រូវបានគេចាត់ទុកថាជាកំពូលតារាOnline ម្នាក់នាពេលបច្ចុប្បន្ននោះកាលពីព្រឹកថ្ងៃទី២៥ តុលា នាងបានទិញរថយន្ដទំនើបម៉ាកMercedes ព័ណខ្មៅ១គ្រឿងថែមទៀតហើយត្រូវឡានខាងក្រុមហ៊ុនដឹកយកទៅឲ្យនាងដល់ផ្ទះវីឡារនៅបុរីវារីណា សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ តាំងពីម៉ោង ៤,១៥នាទីព្រឹក។
អ្នកយកព័តមានយើងបានសាកសួរម៉ូលីកា តាមទូរស័ព្ទនៅថ្ងៃរសៀលថ្ងៃទី២៥ តុលា តែនាងមិនប្រាប់ពីតម្លៃរថយន្ដនោះទេ ដោយគ្រាន់តែបង្ហើបយ៉ាងខ្លីថាMercedes ជាប្រភេទរថយន្ដ១ដែលនាងស្រលាញ់ក្នុងចំណោមឡានក្នុងក្ដីស្រម៉ៃរបស់នាង។ប៉ុន្ដែតាមតារាដែលនិយមជិះរថយន្ដប្រភេទMercedes នោះបង្ហើបឲ្យដឹងថារថយន្ដរបស់ម៉ូលីកា ដែលនាងទើបបញ្ជារទិញនោះមានតម្លៃជិត១៦ម៉ឺនដុល្លារឯណ្ណោះ។
សូមបញ្ជាក់ថាត្រឹមតែរយៈពេល២ខែចុងក្រោយនេះប៉ុណ្ណោះដែលម៉ូលីកា បានទិញរថយន្ដទំនើបដល់ទៅ៤គ្រឿងក្នុងពេលកៀកៗគ្នាក្នុងនោះកាលពីចុងខែកញ្ញា នាងបានទិញរថយន្ដទំនើបម៉ាកEscalade ព័ណខ្មៅ១គ្រឿងតម្លៃជិតកន្លះលានដុល្លារ,ហើយនៅខែតុលា នាងបានទិញរថយន្ដទំនើបដល់ទៅ៣គ្រឿងម៉ាកខុសៗគ្នា ក្នុងនោះគឺមានរថយន្ដម៉ាកFerrari-488GTB ព័ណក្រហមតម្លៃ៣៥ម៉ឺនដុល្លារ,រថយន្ដម៉ាកBMW តម្លៃ៨ម៉ឺនដុល្លារ និងរថយន្ដចុងក្រោយម៉ាកMercedes ព័ណខ្មៅថ្លៃជិត១៦ម៉ឺនដុល្លារនេះ ដែលគ្រាន់តែសរុបពីតម្លៃរថយន្ដខាងលើនេះនាងចំណាយដល់ទៅខ្ទង់ជាង១លានដុល្លារទៅហើយ។ដោយឡែកសម្រាប់រថយន្ដដែលម៉ូលីកា និងស្វាមីនាងលោកហុង មានុណ ជិះជាប្រចាំពីមុនទិញរថយន្ដទាំង៤គ្រឿងនោះមានដូចជាម៉ាកFord Raptor ,Jaguar និងRange Rover ជាដើម។
តាមរយៈការចំណាយលុយលេងម៉ូដរថយន្ដខាងលើនេះបញ្ជាក់ថាម៉ូលីកា ស្ថិតនៅលំដាប់ជូរមុខគេក្នុងការជិះរថយន្ដប្រណិតដែលមានតម្លៃខ្ពស់នាពេលបច្ចុប្បន្ន ខណៈដែលរយៈពេលចុងក្រោយនេះទស្សនិកជនសង្កេតឃើញថាអ្នកលក់Online ល្បីៗមួយចំនួនហាក់ស្ងប់ស្ងាត់សកម្មភាពទៅវិញ ពោលគឺមានតែម៉ូលីកា ដែលមានសកម្មភាពលេចធ្លោជាងគេទាំងការលេងម៉ូដរថយន្ដនិងសកម្មភាពសប្បុរសធ័មរបស់នាងជាបន្ដបន្ទាប់តាំងពីមុនផ្ទុះកូវីដរហូតមកដល់បច្ចុប្បន្ន។
គូរកត់សម្គាល់ថាម៉ូលីកា ក្រោយផ្អាកពីអាជីពចម្រៀងមួយអន្លើនាងបានក្លាយទៅជាអគ្គនាយិកាក្រុមហ៊ុនអិនខេ ម៉ូលីកា ប៊ីយូធី ត្រេឌីង ឯ.ក(Nk Molika Beauty Trending Co.Ltd) ដែលពេលនេះការរកស៊ីរបស់នាងកាន់តែរីកធំឡើងៗទើបធ្វើឲ្យមានមានជីវភាពផ្លាស់ប្ដូរស្ទើតែ៣៦០ដឺក្រេ បើប្រៀបធៀបពីមុន។ម៉ូលីកា មានផ្ទះវីឡារ២ផ្សេងគ្នា និងរថយន្ដទំនើបៗសរុបច្រើនជាង៦គ្រឿង ខណៈដែលការឡើងមកដល់ចំណុចនេះម៉ូលីកា ថានាងមិនដែលភ្លេចប្រវត្តិមានដើមទុនផ្ដើមចេញត្រឹមតែ៣០០ដុល្លារ ពីការលក់ជ្រក់ជើងមាន់តាមOnline នោះទេ ហើយនាងថាដោយសារតែមហាជនគាំទ្រអាជីវកម្មរបស់នាងកន្លងមកទើបនាងមានថ្ងៃនេះ ហេតុនេះនាងត្រូវតែបន្ដការងារសប្បុរសធ័មទៅមុខទៀតតាមលទ្ធភាពដែលអាចធ្វើបាន។
អតីតតារាចម្រៀងម៉ូលីកា ដែលបានចាប់ដៃគ្នាជាមួយតារាសម្ដែងលោកហុង មានុណ ជាង២ឆ្នាំនិងទទួលបានចំណងដៃកូនស្រី១ឈ្មោះនុណ ច័ន្ទម៉ូនីតា អាយុជាង២ឆ្នាំ នោះថាដើម្បីការពារក្រុមហ៊ុននាងឲ្យនាងភាពរឹងមាំថែមទៀតនាងក៍បានចុះបានចុះហត្ថលេខាសហការណ៍ជាមួយ ក្រុមហ៊ុនមេធាវី អេជ អេន អេស (HSN law Group) កាលពីថ្ងៃសុក្រទី២២ខែកក្កដាឆ្នាំ២០២២ រយៈពេល១ឆ្នាំ ផងដែរ។ប៉ុន្ដែទាក់ទងគម្រោងយកកូនថែម និងពេលវេលានៃការឡើងឆាកតន្រ្ដីសារជាថ្មីនោះម៉ូលីកា ថានាងមិនទាន់ត្រៀមខ្លួនពពោះកូនទី២នោះទេ ខណៈដែលអាជីពចម្រៀងនាងនៅតែស្រលាញ់ហើយនៅពេលវេលាសមស្របនាងនឹងផលិតបទចម្រៀងផ្ទាល់ខ្លួនចេញនៅលើផេករបស់នាង៕