វណ្ណដា -ដេវីត ៖ប៉ៈគ្នាលើកដំបូង ក្រោយផ្ទុះ​កម្ដៅ​មួយប្រាវ

ភ្នំពេញ៖សង្រ្គាមពាក្យសំដីឌឺដង ដៀមដាមដាក់គ្នារវាងតារាចម្រៀងរ៉េប Hip Hop  ២ដួងគឺ​លោ​ក​ម៉ាន់ វណ្ណដា និងងួន ចាន់ដេវីត បានធ្វើឲ្យFan ទាំងសងខាងខ្លះមើលមុខគ្នាមិនចំឡើយ និង​កាន់ជើងIdol រៀងៗខ្លួន​ពិសេស​ក្រោយវណ្ណដា ច្រៀងបទ”” ”J+O II ” វាយប្រហារចំៗទៅ​លើ​ដេវីត ឡើងស្ពឹកមុខក្រោយក្ដៅចិត្តរឿង​បទរបស់​ខ្លួន​បែកធ្លាយ ខណៈដែលដេវីត វិញបាន​វាយ​បកទៅវណ្ណដា ភ្លាមៗដែរតាមរយៈបទ” ”ចុមអាអូនអត់ដេក” ដែលការ​ស៊ក​ប៉ារ៉ូលចម្រៀងផ្កែផ្កា​ដាក់គ្នានេះធ្វើឲ្យអ្នកតាមដានតារាចម្រៀងទាំងពីរយល់​ថាពួកគេមិនអាចវិលមក​ត្រូវរ៉ូវ​គ្នាវិញបាន​ជាដាច់ខាត ព្រោះក្លាយជាគូបដិបក្សគ្នាទៅហើយ។យ៉ាងណាអ្វីដែល​គូរឲ្យភ្ញាក់ផ្អើល​នៅ​ថ្ងៃ​ការប្រ​គុំ​តន្រ្ដីថ្ងៃទី៣០ ខែវិច្ឆិកា ឆ្នាំ២០២២ ខាងមុខនេះក្នុងពិធីបិទកីឡាជាតិលើកទី៣ នោះ​តារាចម្រៀងម៉ាន់ វណ្ណដា និង​ងួន ចាន់ដេវីត ត្រូវប៉ៈគ្នាលើឆាកតន្រ្ដីតែមួយជាលើកដំបូងតាំង​ពីពួគគេចេញបទវ៉ៃគ្នាទៅវិញទៅមកនេះ​ហើយ​បើតាមអ្នកដឹកនាំកម្មវិធីបានទម្លាយថាតារាចម្រៀងវណ្ណដា នឹងច្រៀងបទ”Time To Rise “ ខណៈដែលងួន ចាន់​ដេវីត ដែលជា​តារាចម្រៀង​ម្នាក់​នោះ​បែរ​ជាត្រូវសម្ដែងជាទស្សនីយភាពបទ”វីរនារី” ដែលជាចម្រៀងរបស់គូ​ស្នេ​ហ៍​​លោក​នាង​ទេព បូព្រឹក្ស ដែលឡើងឆាកមិនកើតព្រោះតែនាងកំពុងតែមានផ្ទៃពោះ​នឹងត្រៀម​សម្រា​ល​​កូន​នោះទៅវិញ។

នៅមិនទាន់មានការបញ្ជាក់ពីអ្នក​រៀបចំកម្មវិធីខាងលើនេះថា​ហេតុអ្វីបាន​ជា​ដេវីត មិនច្រៀងបទ​ផ្ទាល់ខ្លួនតែ​លោ​ក​បែជាគ្រាន់តែសម្ដែង​បទភរិយារបស់លោក​នាងបូ​ព្រឹក្ស នោះ​ទេ ខណៈដែលថ្ងៃបើកកីឡាជាតិលើកទី៣ គេ​ឃើ​ញ​អតីតតារាចម្រៀងហង្ស​មាស​រូប​​​នេះ​ក៍បានច្រៀងសម្ដែងជាច្រើនបទផងដែរ តែអ្វីដែលធ្វើឲ្យទស្សនិក​ជនខ្លះ​ខក​ចិត្តនោះ​គឺដេវីត បែជាលើកយកបទចម្រៀងមួយចំនួនទៅច្រៀងហាក់មិនសាក​សមជាមួយ​ប្រភេទកម្ម​វិធី​ទា​ល់តែសោះដូចជាបទអួតពីទ្រព្យខ្លួន និងសួរគេថាមានដូចខ្លួន​ដែរឬអត់?ខណៈដែលកម្ម​វិធី​​នោះមានជនពិការ​ជា​ច្រើននៅចំពោះមុខ។ទោះជាយ៉ាងការឆ្គាំឆ្គងរបស់ដេវីត នាពេលនោះ​ត្រូវបានអ្នកលេង​បណ្ដា​ញសង្គមលើក​ឡើង​ថាអ្នកដឹកនាំកម្មវិធីនោះខុស​ធ្ងន់ជាងតារាចម្រៀង​ទៅទៀត ព្រោះថាមិន​បានត្រួតពិនិត្យឲ្យច្បាស់លាស់ពី​អ្នកចម្រៀងសដែលលើក​យកបទបែប​Diss Track  ទៅ​ច្រៀ​ង​​លើ​វេទិការថ្នាក់ជាតិបែបនេះ ខណៈដែល​បទប្រ​ភេទ​នេះគេ​ធ្លាប់តែ​ឃើ​ញតារា​ចម្រៀងទាំង​នោះច្រៀងនៅតាមក្លឹប ឬ​​Concerts ស្រាបៀរជាដើម។

  សម្រាប់ការជួបគ្នាជាលើកទី១លើឆាកតន្រ្ដីរវាងវវណ្ណដា -ដេវីត ក្រោយពីតារាទាំង​ពីរ​ផ្ទុះ​ជម្លោះសំដីតាមប៉ារ៉ូល​ចម្រៀងដៀមដាមគ្នានោះ ទស្សនិកជនពិតជាអាចមើលឃើញច្បាស់​ផ្ទាល់ភ្នែកជាមិនខានថាតើ​រវាងអ្នក​ចម្រៀង​Hip Hop ទាំងពីរ១ណា នឹងមានសន្ទុះខ្លាំងជាង​ពេ​ល​នៅ​ឆាកតែ១បែបនេះ?ដោយឡែកសម្រាប់លោកនូ ស៊ឹប និងពេជ្រ សោភា ដែលអ្នកយក​ព័ត​មាន​យើងបានសាកសួរមុននេះថាតើវណ្ណដា និងដេវីត ម្នាក់ណាខ្លាំងជាង​នៅ​ឆ្នាំ២០២២ នេះតារាចម្រៀងពីរបាននិយាយស្របគ្នាថាល្អ ម្យាងៗម្នាក់ តែមិនហ៊ានបែងចែក​ថា១ណា​ខ្លាំងជាង​ឡើ​យ ។

 ទស្សនិកជនរងចាំមើលថាតើវណ្ណដា និងដេវីត ពេលប៉ៈគ្នាលើឆាកតែមួយបែបនេះ​ពួក​គេអាចនឹងធ្វើឲ្យFan ទាំង​សងខាងលែងពាក់មុខយក្សដាក់គ្នាទៀតតាមរយៈ​ការបង្ហាញពីការ​បញ្ចប់វិវាទ ឬមួយក៍អ្នកចម្រៀងរ៉េប ទាំងពីរ​ដួងធ្វើឲ្យអ្នកគាំទ្រកាន់តែឡើងកំដៅថែមទៀត ព្រោះ​តែ​នៅថ្ងៃនោះនឹងដឹងថាអ្នកណាជាអ្នក​ខ្លាំង​ជាង​ពិតប្រា​កដ​?​​សម្រាប់អ្នកជំនាញ​សិល្បៈ​បាន​លើកឡើងថាតាំងពីវណ្ណដា និងដេវីត ឌឺគ្នាគ្នាខ្លាំងរយៈ​ពេលចុង​ក្រោយនេះធ្វើ​ឲ្យទី​ផ្សារ​ចម្រៀងរ៉េប មានសន្ទុះឡើងវិញ ស្របពេលដែលតារាល្បីៗមានដូចជាកំពូលតារា​ចម្រៀ​ង​ព្រាប សុវត្ថិ និងតារាចម្រៀងរហ័ស្សនាមឈ្នះអស់មាសត្រូវលោកអ៊ីណូ ក៍ងាកមកចេញបទ​រ៉េប ផងដែរ ។

ទស្សនិកជនចង់ឃើញវណ្ណដា-ដេវីត បញ្ចប់ជម្លោះពាក្យសំដីដាក់គ្នាតាមរយៈ​បទចម្រៀង​ ហើយងាមកចាប់​ដៃគ្នា​ធ្វើការងារសិល្បៈរួមគ្នា ប៉ុន្ដែរឿងនេះអាចទៅរួចឬយ៉ាង​ណានោះ​គឺមានតែរងចាំសង្កេតថានៅថ្ងៃដែលតារាលេង​ម៉ូដសាក់ទាំងពីរបុកគ្នា​នោះតើនឹង​កាន់តែឡើងកម្ដៅថែមទៀត ឬមួយក៍ពួកគេធ្វើឲ្យត្រជាក់ទៅវិញ?