សឿ សុធារ៉ា ៖ឲ្យកូនស្រីស្នងតំណែងភាពយន្ដ

ភ្នំពេញ៖អ្នកនាងសឿ សុធារ៉ា បានឲ្យកូនស្រីទី១របស់នាងឈ្មោះសាពួន តារាពិមាន អាយុជាង​១០ឆ្នាំឈាន​ចូល​​ថត​សម្ដែងភាពយន្ដជាលើកដំបូងនូវរឿងបុរាណមួយដែលដឹកនាំ​ដោយ​លោក​កៅ សីហា របស់ផលិតកម្មរស្មី​ហង្សមាស។នេះជាការបង្ហាញថាសុធារ៉ា ចង់ឲ្យកូនស្រី​នាង ស្នងអាជីព​ភាព​​យន្ដពី​នាង នាពេលអនាគត។

 លោកកៅ សីហា បានថ្លែងថាលោកបានឲ្យកូនស្រីចុ្បងរបស់អ្នកនាងសឿ សុធារ៉ា ថត​ភាពយន្ដភាគខ្នាត​ធំជា​តួឯក​កាលនៅក្មេងនាសម័យលង្វែក​ហើយលោកជឿរថា​នោះជា​ចំណី​ចក្ខុរបស់ទស្សនិក​ជន​បាន​​ប្លែកភ្នែកទៀត​ជាមិនខាន។ក្រោយមានការលើក​ឡើងរបស់​អ្នកដឹក​នាំសម្ដែងរឿងល្បី​ឈ្មោះ ពីការបណ្ដុះកូនស្រីរបស់សុធារ៉ា ឲ្យលេងសិល្បៈបែបនេះ មានតារា​សិល្បករ​រួមអាជីព​ជា​ច្រើន​បានអរគុណលោកសីហា ដែលជួយដល់គ្រួសារ​សុធារ៉ា ដែលកំពុង​តែពិបាកខ្លាំងនោះ ដោយពួកគេខ្លះថាតារាពិមាន មានត្រេមុខស្រដៀងសុធារ៉ា តែម្ដង។

  សូមរំលឹកថាអ្នកនាងសឿ សុធារ៉ា ក៍ធ្លាប់ថតភាពយន្ដតាំងពីតូចផងដែរហើយមុន​នាង​រៀបការជាមួយលោក​សាពួន មីដាដា កាលពីថ្ងៃទី៩ខែវិច្ឆិកា ឆ្នាំ២០០៩ នោះនាងជាតារា​ភាព​យន្ដ​ដ៍លេចធ្លោលំដាប់ជូរមុខម្នាក់។ប៉ុន្ដែ​ក្រោយបែកបាក់ស្វាមី​ហើយម្ដាយទទួលមរណ​ភាព​កាល​ពីថ្ងៃទី២៨ តុលា ២០២២ នោះពេលនេះសុធារ៉ា ដែល​ទទួ​លបានកូនប្រុសស្រីទាំងពីរមក​គ្រប់គ្រង ក្រោយចែកផ្លូវលោកមីដាដា នោះនាងបានវង្វេងស្មារតី ភ្លេច​ភ្លាំងច្រើន រហូតស្ទើតែ​បាត់​បង់​ការ​ចងចាំទៀតផង។យ៉ាងណាមុននេះលោកគួច ខេវិន អ្នកផលិតកម្មវិធីទូរ​ទស្ស​ន៍​​ជាន់​ខ្ពស់​ម្នាក់បានលើកទឹកចិត្តឲ្យនាងវិលមករកភាពល្បីល្បាញក្នុងអាជីពសិល្បៈសារជាថ្មី ខណៈ​ដែល​លោក​កៅ សីហា វិញមិនមែនត្រឹមតែផ្ដល់ឲ្យកូនស្រីនាង​បានសម្ដែង​ភាពយន្ដ​នោះ​ទេ ប៉ុន្ដែ​លោក​ក៍ធ្លាប់ហៅធារ៉ា ថត​រឿងនៅ​ហង្ស​មាសជាបន្ដបន្ទាប់ ហើយពេលនេះក៍​ត្រៀម​ថត​រឿងថ្មី​ដែលមានធារ៉ា ចូលរួមសម្ដែងទៀតផងដែរ។

 ក្រៅពីសឿ សុធារ៉ា តារាដែលឲ្យកូនស្នងតំណែងពីអាជីពសិល្បៈមានដូច​ជាអ្នកនាង​ចន ច័ន្ទ,ម៉េង កែវពេជ្ជតា​,លោកព្រាប សុវត្ថិ និងហួ ឡាវី ជាដើម៕