តន់ ច័ន្ទសីម៉ា ៖លែងហ៊ានជិះសេះលែងដៃ

ភ្នំពេញ៖រយៈពេលជិត៣ឆ្នាំមកហើយដែលនាងតន់ ច័ន្ទសីម៉ា បានជិះសេះលែងដៃពោលគឺជា​តួឯកដែល​គ្មាន​គូប្រជែងឡើយ ខណៈដែលតារាចម្រៀងជើងខ្លាំងលោកឧកញ៉ាព្រាប សុវត្ថិ និងខេម នោះក៍គ្មានជម្រើស​ច្រៀ​ងជាដៃគូជាមួយតារាផ្សេងដែរគឺមានតែប្រឹងរុញនាងសីម៉ា ឲ្យ​ទៅមុខដូចគ្នា។ប៉ុន្ដែចាប់ពីពេលនេះតទៅ​នាង​ច័ន្ទ​សីម៉ា បានជួបគូប្រជែងថ្មីក្រោយការ​មក​ដល់​​របស់នាងហ៊ិន លីដា អតីតបេក្ខភាពCambodian Idol ឈានដល់​វគ្គផ្ដាច់​ព្រ័ត្រ​រដូវកាល​ទី២ ដែលត្រូវគេមើលឃើញថាសម្ថភាពរបស់អ្នកចម្រៀងទាំងពីរប្រហាក់ប្រហែលគ្នា ហើ​យ​​លីដា ថែមទាំងអាចច្រៀងបទខ្ពស់ៗបានទៀតផង។គេថាទោះជាសីម៉ា ជាតារាស្រីឈាន​មុខ​គេនៅ​Galaxy ដែលធ្វើឲ្យអ្នកចម្រៀងមានគីឡូប្រហាក់ប្រហែលគ្នានៅ​ផលិតកម្មផ្សេងៗ​ពិបាក​ទប់​ទល់​​ក្ដី ប៉ុន្ដែពេលនេះបើ​អតីត​អ្នកស្មូតលេខ១ប្រចាំខេត្តតាកែវរូបនេះប្រហែស​នោះអាច​នឹង​ស្រឡះ​ដៃ​ធេង​ជាមិនខាន។

  គូរកត់សម្គាល់ថាការដែលតន់ ច័ន្ទសីម៉ា ក្លាយជាតារាស្រីទោលអត់តារារួមទ្រនុំប្រជែង បែបនេះក្រោយមាន​ព័ត​មានថាផលិតកម្មGalaxy ចាប់អារម្មណ៍ចង់ទិញមាស សុខសោភា និង​ពេជ្រ សោភា ទៅធ្វើជាដៃគូលោកឧកញ៉ា​សុវត្ថិ និងលោកខេម តែចុងក្រោយតារា​ទាំងពីរបែ​ជា​​ផាត់ចោលទ្រនុំថ្មីចាយលុយធំនេះទៅវិញ ទើបនាំឲ្យសីម៉ា អត់គូប្រជែង។កាល​ពីឆ្នាំ​២០​២០ មានព័តមានថាស្រីស្រស់ដែលបានកែសម្រស់៣ផ្នែកគឺធ្វើច្រមុះ,ចាក់ចង្កា និង​ពត់​ធ្មេញ​រូប​នេះ​ត្រូវបានថៅកែកំណត់ថ្លៃច្រៀងកម្មវិធីធំម្ដងស៊ីថ្លៃដល់ទៅ៥ពាន់ដុល្លារ ដែលតម្លៃនេះ​នាំមុខ​តា​រាចម្រៀងល្បីល្បាញលំដាប់ជូរមុខជាច្រើនឆ្នាំមកហើយនោះទៀតផង។

កាលនោះអ្នកតំណាងGalaxy ថែមទាំង​ថាបើអ្នកណាថាសីម៉ា ថ្លៃពេកអស់ហ៊ានជួលក៍មិនអីដែរ ព្រោះ​ផលិត​កម្ម​មាន​សម្ថភាពចិញ្ចឹមតារារបស់ខ្លួន​ឲ្យ​រស់នៅបានសុខស្រួលបាន ទើបក្រោយការ​ថ្លែង​បែបនេះ​តារា​តូច​ច្រឡឹង​បានបាត់មុខពីឆាកតន្រ្ដី​តាម​ប៉ុស្ដិ៍ទូរ​ទស្សន៍ជាច្រើនខែ ដោយ​សារតែអ្នកដឹកនាំកម្ម​វិធី​ប្រគុំ​តន្ត្រីមួយ​ចំនួនបាន​ថ្ងូរដូចព្រាប ថាពួកគេគ្មាន​លទ្ធភាព​ជួលសីម៉ា ឡើងឆាកឡើយ ព្រោះ​ហៅនាងម្នាក់ស្មើ​តារាល្បីៗផ្សេង​ទៀត១០​នាក់។

 សូមបញ្ជាក់ថាតន់ ច័ន្ទសីម៉ា ជាតារាដែលប្រជែងទីផ្សារយុវវ័យនា​ពេលបច្ចុប្បន្នជាមួយ​នាងរ៉េត ស៊ូហ្សាណា និងយូរី ជាដើម។តារាវ័យ២៥ឆ្នាំរូបនេះធ្លាប់មានព័តមាន​ថានាងត្រូវ​លោ​ក​​ឧកញ៉ាពោះម៉ាយម្នាក់តាមស្នេហា តែរាល់លើកនាងប្រាប់អ្នកកាសែតនិងFan ថាអត់ដែល​មាន​សង្សា​រដូចគេទៅវិញ៕