ភ្នំពេញ ៖ គូសង្សារមួយគូ បានជិះម៉ូតូដឹកគ្នាទៅអង្គុយញ៉ាំខ្យង សាសងស្នេហ៍នៅចំណុចតូបលក់ខ្យង មួយកន្លែង លុះក្រោយមក លេចមុខជនសង្ស័យចំនួន៣នាក់ ប្រដាប់ដោយកាំបិតផ្គាក់ ជិះម៉ូតូ ១គ្រឿង ទៅឈប់នៅពីមុខតូបលក់ខ្យង រួចដើរចូលទៅកាប់ប្រហារជនរងគ្រោះ បណ្តាលឱ្យរងរបួសចំចង្កេះ ១កាំបិត ប្លន់យកម៉ូតូ ជិះគេចខ្លួនបានរយៈពេល ២ថ្ងៃ ក៏ត្រូវសមត្ថកិច្ចជំនាញ ស្រាវជ្រាវតាមក្របួចជាប់ម្នាក់ ខណៈបក្ខពួក២នាក់ទៀត កំពុងរត់គេចខ្លួន។
ករណីកាប់ប្លន់ម៉ូតូគូស្នេហ៍នេះ បានកើតឡើង កាលពីវេលាម៉ោង ៨និង៣០នាទីយប់ ថ្ងៃទី១៨ ខែធ្នូ ឆ្នាំ២០២២ នៅចំណុចតូបលក់ខ្យង ១កន្លែង ស្ថិតនៅភូមិទឹកថ្លា សង្កាត់ក្រាំងពង្រ ខណ្ឌដង្កោ។ រហូតមកដល់វេលាម៉ោង៣រសៀល ថ្ងៃទី២០ ខែធ្នូ ឆ្នាំ២០២២ ទើបសមត្ថកិច្ចស្រាវជ្រាវឃាត់ខ្លួនជនសង្ស័យបានម្នាក់ នាំយកទៅចាត់ការតាមច្បាប់។
ជនរងគ្រោះដែលត្រូវក្រុមជនសង្ស័យកាប់ប្លន់ម៉ូតូ មានឈ្មោះប៉ាល់ ដាយដែន ភេទប្រុស អាយុ២៥ឆ្នាំ មុខរបរជាងរថយន្ត រស់នៅភូមិដំណាក់ សង្កាត់ភ្នំពេញថ្មី ខណ្ឌសែនសុខ។ ចំណែកជនសង្ស័យដែលត្រូវបានសមត្ថកិច្ចចាប់ឃាត់ខ្លួន មានឈ្មោះ ផល តារា ភេទប្រុស អាយុ២៧ឆ្នាំ មុខរបរមិនពិតប្រាកដ រស់នៅភូមិក្រាំងស្វាយ សង្កាត់ក្រាំងពង្រ ខណ្ឌដង្កោ (មានសារធាតុញៀន)។ រីឯបក្ខពួក២នាក់ទៀត ដែលកំពុងរត់គេចខ្លួន នៅមិនទាន់ស្គាល់អត្តសញ្ញាណនៅឡើយ។ ដោយឡែកវត្ថុតាងដែលសមត្ថកិច្ចដកហូតបាន រួមមាន ម៉ូតូ ១គ្រឿងម៉ាកស៊ុយស៊ូគី និច ពណ៌ទឹកប្រាក់ (ម៉ូតូកញ្ចាស់) ជាម៉ូតូដែលក្រុមជនសង្ស័យជិះធ្វើសកម្មភាព និងកាំបិតផ្គាក់ដងដែក ប្រវែង០,៥០ម៉ែត្រ ចំនួន១ដើម។
តាមប្រភពពីសមត្ថកិច្ច បានឱ្យដឹងថា មុនពេលកើតហេតុ កាលពីវេលាម៉ោង៧យប់ ថ្ងៃទី១៨ ខែធ្នូ ឆ្នាំ២០២២ ជនរងគ្រោះខាងលើ បានជិះម៉ូតូ ១គ្រឿង ម៉ាកហុងដា ស្គូបពីអាយ ពណ៌ស ស៊េរីឆ្នាំ២០១៨ ពាក់ស្លាកលេខ កំពង់ធំ 1K-9967 មកជួបសង្សារនៅម្តុំវត្តស្លែង ផ្លូវជាតិលេខ៣ សង្កាត់ពងទឹក ខណ្ឌដង្កោ ហើយក៏បានដឹកសង្សាទៅអង្គុយលេងនៅតូបលក់ខ្យង ស្ថិតនៅភូមិទឹកថ្លា សង្កាត់ក្រាំងពង្រ ខណ្ឌដង្កោ ពេលទៅដល់ ក៏បានទុកម៉ូតូនៅខាងមុខតូប រួចក៏បាននាំគ្នាចូលទៅអង្គុយហូបខ្យង សាងសងគ្នា។
ប្រភពដដែល បន្តថា លុះដល់វេលាម៉ោង ៨និង៣០នាទីយប់ ថ្ងៃដដែល ស្រាប់តែលេចមុខជនសង្ស័យចំនួន៣នាក់ (ឈ្មោះផល តារា និងបក្ខពួក២នាក់ទៀត) បានជិះម៉ូតូ ១គ្រឿង ម៉ាកស៊ូយស៊ូគី និច ពណ៌ទឹកប្រាក់ (ម៉ូតូកញ្ចាស់) មកឈប់ពីមុខតូបលក់ខ្យង ក្បែរម៉ូតូរបស់ជនរងគ្រោះ បន្ទាប់មក ជនសង្ស័យម្នាក់ បានចុះពីលើម៉ូតូ ដៃកាន់កាំបិតផ្គាក់ ប្រវែង០,៥០ម៉ែត្រ ដើរចូលមកកាប់ជនរងគ្រោះ ចំចង្កេះខាងឆ្វេង បណ្តាលឱ្យរងរបួសស្រាល ហើយជនសង្ស័យបានបោះកាំបិតចោល រួចឆក់យកសោម៉ូតូរបស់ជនរងគ្រោះ រត់ទៅយកម៉ូតូរបស់ជនរងគ្រោះ ជិះគេចខ្លួនបាត់ភ្លាមៗតែម្តង។
បន្ទាប់ពីកើតហេតុ ជនរងគ្រោះបានមករាយការណ៍ប្រាប់សមត្ថកិច្ច និងមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលក្រាំងពង្រ ដើម្បីឱ្យសមត្ថកិច្ចជួយអន្តរាគមន៍ស្រាវជ្រាវឃាត់ខ្លួនជនសង្ស័យខាងលើ យកចាត់ការតាមផ្លូវច្បាប់។
រហូតដល់វេលាម៉ោង ៣រសៀល ថ្ងៃទី២០ ខែធ្នូ ឆ្នាំ២០២២ សមត្ថកិច្ចបានធ្វើការស្រាវជ្រាវ រហូតឈានដល់ការឃាត់ខ្លួនជនសង្ស័យបានម្នាក់ ឈ្មោះ ផល តារា រួមនិងវត្ថុតាងខាងលើ បន្ទាប់មកក៏នាំខ្លួនជនសង្ស័យ មកធ្វើការសាកសួរនៅអធិការដ្ឋាននគរបាលខណ្ឌដង្កោ។
ជនសង្ស័យ ត្រូវបានសមត្ថកិច្ចជំនាញរៀបចំកសាងសំណុំរឿង បញ្ជូនទៅចាត់ការបន្តតាមនីតិវិធី។ ចំណែកជនសង្ស័យជាបក្ខពួក ចំនួន២នាក់ទៀត ដែលកំពូងរត់គេចខ្លួន សមត្ថកិច្ចកំពុងតាមចាប់ខ្លួន ដើម្បីនាំយកមកចាត់ការតាមច្បាប់ ឱ្យខាងតែបាន៕
