លោកឌីមីទ្រី មេដវេដេវអតីតប្រធានាធិបតីរុស្ស៊ីបានអះអាងថា ប្រទេសលោកខាងលិចកំពុងបង្កគ្រោះថ្នាក់ដល់អត្ថិភាពនិងអរិយធម៌មនុស្សតាមរយៈការគំរាមកំហែងមកលើទីក្រុងម៉ូស្គូ។ លោកបានព្រមានថា ការបន្តគាំទ្រអ៊ុយក្រែនរបស់សហរដ្ឋអាមេរិក និងសម្ព័ន្ធមិត្តរបស់ខ្លួន អាចនឹងនាំឲ្យមាន ការផ្ទុះអាវុធនុយក្លេអ៊ែរ។នេះបើយោងតាមការចេញផ្សាយរបស់សារព័ត៌មានរដ្ឋរុស្ស៊ីRTកាលពីថ្ងៃចន្ទ ទី២៧ខែកុម្ភៈឆ្នាំ២០២៣។
លោកមេដវេដេវ បានលើកឡើង នៅក្នុងអត្ថបទមួយដែលត្រូវបានបោះពុម្ពនៅក្នុងកាសែត Izvestiaកាលពីថ្ងៃចន្ទថាសមិទ្ធិផលដ៏អស្ចារ្យមួយនៃការដឹកនាំរបស់សហភាព រុស្ស៊ីនៅដើមទសវត្សរ៍ឆ្នាំ ១៩៩០គឺថា អាចរក្សាសក្តានុពលនុយក្លេអ៊ែររបស់ប្រទេសបន្ទាប់ពីការដួលរលំនៃអតីតសហភាពសូវៀត។
លោក មេដវេដេវ អនុប្រធានក្រុមប្រឹក្សាសន្តិសុខរុស្ស៊ីបានបន្ថែមថាការបន្តបញ្ជូនអាវុធទៅអោយអ៊ុយក្រែនគឺជាការយល់ខុសដ៏គ្រោះថ្នាក់បំផុតរបស់អាមេរិកនិងលោកខាងលិច។
ការអត្ថាធិប្បាយចុងក្រោយបំផុតរបស់លោកបានកើតឡើងបន្ទាប់ពីមាន ការព្រមានប្រើប្រាស់នុយក្លេអ៊ែររបស់លោកពូទីនកាលពីសប្តាហ៍មុននិងការកត់សម្គាល់កាលពីថ្ងៃអាទិត្យរបស់លោកដែលបង្ហាញពីការប្រឈមមុខដាក់គ្នារបស់ទីក្រុងម៉ូស្គូជាមួយលោកខាងលិចថាជាសមរភូមិអត្ថិភាពសម្រាប់ការរស់រានមានជីវិតរបស់ប្រទេសរុស្ស៊ី និងប្រជាជនរុស្ស៊ី។
លោកបាននិយាយក្នុងសុន្ទរកថាដែលបានចេញផ្សាយក្នុងកាសែត Izvestia ប្រចាំថ្ងៃថាជាការពិត ប្រសិនបើការបញ្ជូនសព្វាវុធនៅតែបន្ត …. វានឹងបិទផ្លូវលទ្ធភាពនៃការចរចាឡើងវិញរវាងប្រទេសរុស្ស៊ីនិងអ៊ុយក្រែន។
ជាចុងក្រោយលោក មេដវេដេវបានសរសេរថា រុស្ស៊ីនឹងមិនអនុញ្ញាតឱ្យមានរឿងបែបនេះកើតឡើងនោះទេ។ លោកបានកត់សម្គាល់ថាលោកខាងលិចនិង ផ្កាយរណបរបស់ពួកគេតំណាងឱ្យ ១៥% នៃចំនួនប្រជាជនពិភពលោកខណៈចំនួនដែលនៅសេសសល់គឺមាន ចំនួនច្រើននិងខ្លាំងជាង។
លោកបានសន្និដ្ឋានថាអំណាចស្ងប់ស្ងាត់នៃប្រទេសដ៏អស្ចារ្យរបស់យើងនិងភាពជឿជាក់នៃដៃគូរបស់ខ្លួនគឺជាគន្លឹះក្នុងការរក្សាអនាគតសម្រាប់ពិភពលោកទាំងមូល។
អ៊ុយក្រែន៖ការផ្សះផ្សាជាមួយរុស្ស៊ីមិនអាចទៅរួចក្នុង១០០ឆ្នាំ
នាយករដ្ឋមន្ត្រីអ៊ុយក្រែន លោក Denys Shmyhal បាននិយាយកាលពីថ្ងៃអាទិត្យថា ការផ្សះផ្សារវាងទីក្រុងម៉ូស្គូ និងទីក្រុងគៀវមិនអាចធ្វើទៅរួចទេក្នុងរយៈពេល១០០ឆ្នាំទៅមុខទៀត។
លោកបាននិយាយនៅក្នុងបទសម្ភាសន៍មួយជាមួយកាសែតប្រចាំសប្តាហ៍របស់អាល្លឺម៉ង់ថា ការផ្សះផ្សា កិច្ចសហប្រតិបត្តិការ – គឺមិនមានទេ ក្នុងរយៈពេលមួយរយឆ្នាំខាងមុខនេះ។ ជាដំបូងរុស្ស៊ីត្រូវតែងាកមករកប្រជាធិបតេយ្យ រំសាយយោធា និងរំសាយអាវុធនុយក្លេអ៊ែរ។
លោក Shmyhal ក៏បាននិយាយផងដែរថា ការបញ្ឈប់ជម្លោះរវាងទីក្រុងម៉ូស្គូ និងទីក្រុងគៀវ ដើម្បីបញ្ឈប់ការបង្ហូរឈាមបន្ថែមទៀត គឺមិនអាចទទួលយកបានសម្រាប់ភាគីអ៊ុយក្រែនទេ ព្រោះវា ស្ថិតក្នុងដៃរបស់រុស្ស៊ីតែប៉ុណ្ណោះដែលនាំទៅរកសង្រ្គាមដ៏ធំមួយទៀត។
លោកShmyhalបានបដិសេធបន្ថែមទៀតនូវលទ្ធភាពដែលអ៊ុយក្រែនប្រគល់ទឹកដីរបស់ខ្លួនទៅឱ្យរុស្ស៊ីដោយនិយាយថា សង្គមអ៊ុយក្រែននឹងមិនអនុញ្ញាតឱ្យមានរឿងបែបនេះទេ។ មនុស្សល្អបំផុតរបស់យើងរាប់ពាន់នាក់បានស្លាប់មិនមែនសម្រាប់ពួកយើងដើម្បីស្វែងរកការសម្របសម្រួលជាមួយភេរវករបង្ហូរឈាមនិងអ្នកឈ្លានពានដែលបំផ្លាញពិភពលោកទាំងមូលនោះទេ៕