អតីតគណៈកម្មការរៀបចំការបោះឆ្នោតលោក Somchai Srisutthiyakorn បាននិយាយថា គណបក្សរួមថៃសាងជាតិ Ruam Thai Sang Chart (United Thai Nation/UTN) របស់នាយករដ្ឋមន្ត្រីប្រាយុទ្ធចាន់អូចាអាចមានបញ្ហាជុំវិញសុន្ទរកថាដែលធ្វើឡើងដោយអនុប្រធានគណបក្សលោកTrairong Suwannakhiri កាលពីថ្ងៃសៅរ៍សប្តាហ៍មុន។
លោកSrisutthiyakornដែលធ្លាប់បម្រើការនៅគណៈកម្មាធិការរៀបចំការបោះឆ្នោត (EC) ពីឆ្នាំ ២០១៣ដល់ឆ្នាំ ២០១៨បាននិយាយថា សុន្ទរកថារបស់លោក Trairong នៅខេត្ត Nakhon Ratchasima បានបំពានលើមាត្រាទី៤របស់ច្បាប់បោះឆ្នោតដែលហាមមិនអោយឃោសនាពាក់ព័ន្ធជាមួយសែរាជវង្ស។លោកបានចង្អុលបង្ហាញថា មាត្រា ១៧ ផ្នែកទី ៤ ហាមគណបក្សនយោបាយមិនឲ្យភ្ជាប់របបរាជានិយមទៅនឹងយុទ្ធនាការឃោសនារបស់ខ្លួន។
ក្នុងអំឡុងពេលថ្លែងសុន្ទរកថាឃោសនានៅខេត្តភាគឦសានកាលពីថ្ងៃសៅរ៍ លោក Trairong បានប្រាប់អ្នកស្រុក Korat ថា ស្តេចរាមាទី៩( Rama IX) ធ្លាប់មានព្រះរាជបន្ទូលថា ប្រជាជនថៃគួរតែជ្រើសរើស មនុស្សល្អដឹកនាំរដ្ឋាភិបាល ដោយបន្ថែមថាគ្មាននរណាម្នាក់ល្អជាងលោកពូ Tuដែលសំដៅទៅលើឈ្មោះហៅក្រៅរបស់លោកប្រាយុទ្ធ។
បន្ទាប់មកអនុប្រធានUTNបានដោយធ្វើឱ្យមានការភាន់ច្រឡំដ៏អាម៉ាស់មួយ។លោក Trairong បានប្រាប់អ្នកគាំទ្ររបស់លោកថា ប្រសិនបើពួកគេចង់បានរដ្ឋាភិបាលល្អ ស្របតាមព្រះរាជបន្ទូលរបស់ព្រះមហាក្សត្រ រាមាទី ៩ ពួកគេគួរតែបោះឆ្នោតឱ្យ ថៃ រ៉ាក់ថៃ (Thai Rak Thai )ដែលជាគណបក្សផុតអាណត្តិរបស់អតីតនាយករដ្ឋមន្ត្រីថាក់ស៊ីន ស៊ីណាវ៉ាត្រា។
លោកSomchaiច្រានចោលពាក្យសម្ដីមិនល្អរបស់អ្នកឃោសនា ប៉ុន្តែថាការលើកឡើងពាក់ព័ន្ធជាមួយស្ដេចចុងក្រោយអាចបង្កបញ្ហាដល់គណបក្ស UTN។
លោកបន្តថានេះមិនមែនជារឿងលេងសើចទេ។ លោក Trairong ប្រហែលជាបានបំពានបទប្បញ្ញត្តិរបស់ EC ដែលអាចនាំឱ្យមានការរំលាយ UTN ប្រសិនបើនរណាម្នាក់ដាក់ពាក្យបណ្តឹងទៅគណៈកម្មការ។
លោក Trairong បានលាឈប់ពីគណបក្សប្រជាធិបតេយ្យ ដែលលោកធ្លាប់ធ្វើជាអនុប្រធាន ដើម្បីចូលរួមជាមួយ UTN កាលពីខែតុលាឆ្នាំមុន។ UTN ត្រូវបានដឹកនាំដោយអតីតសមាជិកសភាគណបក្សប្រជាធិបតេយ្យម្នាក់ទៀតគឺ Pirapan Salirathavibhaga ។
នាយករដ្ឋមន្ត្រី ប្រាយុទ្ធ ចាន់អូចា នៅខែធ្នូ ត្រូវបានតែងតាំងជាបេក្ខជននាយករដ្ឋមន្ត្រីរបស់ UTN សម្រាប់ការបោះឆ្នោតសកលនាពេលខាងមុខ ដែលគ្រោងធ្វើនៅថ្ងៃទី ៧ ឧសភា៕