រដ្ឋមន្ត្រីការបរទេសឥណ្ឌាបាននិយាយថា ជម្លោះរុស្ស៊ី-អ៊ុយក្រែននឹងក្លាយជារបៀបវារៈដ៏សំខាន់នៃការពិភាក្សានៅឯកិច្ចប្រជុំរដ្ឋមន្ត្រីការបរទេសនៃក្រុមប្រទេសG20 ប៉ុន្តែម្ចាស់ផ្ទះឥណ្ឌាមានទំនុកចិត្តថាបញ្ហាប្រឈមផ្នែកសេដ្ឋកិច្ចដែលបង្កឡើងដោយសង្រ្គាមនឹងទទួលបានការយកចិត្តទុកដាក់ស្មើគ្នា។
មន្ត្រីក្រសួងការបរទេសឥណ្ឌាម្នាក់ទៀតក្នុងលក្ខខណ្ឌសុំមិនបញ្ចេញឈ្មោះបាននិយាយថា ឥណ្ឌាមិនចង់ឱ្យបញ្ហាអ៊ុយក្រែនគ្រប់គ្រងព្រឹត្តិការណ៍នៃកិច្ចប្រជុំនេះទេ ប៉ុន្តែវានឹងក្លាយជារបៀបវារៈកំពូល។
G20 រួមបញ្ចូលប្រទេស G7 ដែលមានទ្រព្យសម្បត្តិ ក៏ដូចជារុស្ស៊ី ចិន ឥណ្ឌា ប្រេស៊ីល អូស្ត្រាលី និងអារ៉ាប៊ីសាអូឌីត ក្នុងចំណោមប្រទេសផ្សេងទៀត ដែលតំណាងឱ្យប្រហែល៨៥ភាគរយនៃសេដ្ឋកិច្ចពិភពលោកនិងពីរភាគបីនៃចំនួនប្រជាជនរបស់ខ្លួន។
លោក Vinay Kwatra អ្នកការទូតកំពូលរបស់ប្រទេសឥណ្ឌាបានប្រាប់អ្នកយកព័ត៌មានកាលពីថ្ងៃពុធ ខណៈដែលរដ្ឋមន្ត្រីការបរទេសបានមកដល់ទីក្រុងញ៉ូដេលី សម្រាប់កិច្ចប្រជុំថានិយាយដោយត្រង់ទៅស្ថានភាពដែលកំពុងអភិវឌ្ឍនៅក្នុងជម្លោះរុស្ស៊ី-អ៊ុយក្រែន វានឹងក្លាយជាចំណុចសំខាន់នៃការពិភាក្សា។
លោកKwatra បានបន្ថែមថាបញ្ហាទាក់ទងនឹងសន្តិសុខស្បៀង ថាមពល និងជី ផលប៉ះពាល់របស់ជម្លោះមកលើសេដ្ឋកិច្ចទាំងនេះដែលយើងប្រឈមមុខ” ស្ថិតក្នុងចំណោមបញ្ហាផ្សេងទៀត ក៏នឹងទទួលបាន ការផ្តោតសំខាន់ដែរ។ ។
កិច្ចប្រជុំនេះនឹងមានការចូលរួមពីគណៈប្រតិភូចំនួន៤០ រួមទាំងរដ្ឋមន្ត្រីការបរទេសរុស្ស៊ីលោក Sergey Lavrov រដ្ឋមន្ត្រីការបរទេសអាមេរិកលោក Antony Blinken និងរដ្ឋមន្ត្រីការបរទេសចិន Qin Gang ៕