រដ្ឋមន្ត្រីការពារជាតិតៃវ៉ាន់ លោក Chiu Kuo-cheng បានព្រមានកាលពីថ្ងៃចន្ទ ទី៦ ខែមីនា ថា ទីក្រុងតៃប៉ិត្រូវតែ មានការប្រុងប្រយ័ត្នក្នុងឆ្នាំនេះ សម្រាប់ ការចូលភ្លាមៗដោយយោធាចិន មកជិតទឹកដីរបស់ខ្លួន ចំពេលមានភាព តានតឹងផ្នែកយោធាកើនឡើងនៅទូទាំងច្រកសមុទ្រតៃវ៉ាន់។
ប្រទេសចិនបានបង្កើនសកម្មភាពយោធារបស់ខ្លួននៅជុំវិញកោះតៃវ៉ាន់ក្នុងរយៈពេលប៉ុន្មានឆ្នាំចុងក្រោយនេះ រួម ទាំងការលុកលុយរបស់កងទ័ពអាកាសស្ទើរតែរាល់ថ្ងៃចូលទៅក្នុងតំបន់កំណត់អត្តសញ្ញាណការពារដែនអាកាសរបស់កោះនេះ។
ទោះជាយ៉ាងណាក៏ដោយតៃវ៉ាន់មិនបានរាយការណ៍ពីឧប្បត្តិហេតុណាមួយនៃកងកម្លាំងចិនចូលក្នុងតំបន់ជាប់គ្នារបស់ខ្លួនដែលមានចម្ងាយ៤៤,៤គីឡូម៉ែត្រពីឆ្នេរសមុទ្រ ប៉ុន្តែបានបាញ់ទម្លាក់យន្តហោះគ្មាន មនុស្សបើកដែល បានចូលដែនអាកាសរបស់ខ្លួននៅជិតកោះមួយនៅឆ្នេរសមុទ្រចិនកាលពីឆ្នាំមុន។
ឆ្លើយសំណួររបស់សមាជិកសភា លោក Chiu បាននិយាយថា កងទ័ពរំដោះប្រជាជនចិន (PLA) អាចនឹងរកលេស ដើម្បីចូលទៅកាន់តំបន់ជិតដែនអាកាស និងដែនសមុទ្ររបស់កោះតៃវ៉ាន់ នៅពេលដែលកោះនេះបង្កើនការ ផ្លាស់ប្តូរយោធារបស់ខ្លួនជាមួយសហរដ្ឋអាមេរិកដែលធ្វើអោយទីក្រុងប៉េកាំងកាន់តែខឹងសម្បារ។
លោកបាននិយាយថាPLAអាចនឹងចូលភ្លាមៗមកក្នុងតំបន់ជាប់គ្នាជាមួយតៃវ៉ាន់ និងចូលទៅជិតដែនទឹកដីរបស់ ខ្លួន ដែល មានចម្ងាយជាង២២គីឡូម៉ែត្រពីឆ្នេរសមុទ្រ។
តៃវ៉ាន់បានប្ដេជ្ញាប្រើសិទ្ធិការពារខ្លួននិងការវាយបកវិញ ប្រសិនបើកងកម្លាំងប្រដាប់អាវុធចិនចូលក្នុងទឹកដីខ្លួន។
ប្រទេសចិនកាលពីឆ្នាំមុនបានធ្វើសមយុទ្ធយោធាដែលមិនធ្លាប់មានពីមុនមកនៅជុំវិញកោះតៃវ៉ាន់ដែលជាប្រតិកម្មចំពោះដំណើរទស្សនកិច្ចទៅកាន់កោះនេះដោយប្រធានសភាអាមេរិកលោកស្រីណាន់ស៊ី ផេលូស៊ី៕