ភ្នំពេញ ៖ បន្ទាប់ពីប្រជាពលរដ្ឋរស់ក្នុងភូមិសាស្ត្ររាជធានីភ្នំពេញ នៅតំបន់មួយចំនួន បានត្អូញត្ងែរ រអ៊ូរទាំយ៉ាងខ្លាំង ចំពោះការខ្វះខាតទឹកស្អាតប្រើប្រាស់ ដោយពេលខ្លះទឹកចេញតិចៗច្រូចៗដូចនោមទាស់ ពេលខ្លះដាច់តែម្តងមកនោះ រដ្ឋាករទឹកស្វយ័តក្រុងភ្នំពេញ បានចេញសេចក្តីជូនដំណឹង សុំការយោគយល់និងអធ្យាស្រ័យពីអតិថិជនដែលខ្វះខាតទឹកប្រើប្រាស់ នៅរដូវប្រាំង ដោយសារនៅឆ្នាំ២០២៣ នេះ តម្រូវការទឹកប្រើប្រាស់ បានកើនឡើងជាង ៨៩ម៉ឺនម៉ែត្រគូប ក្នុងមួយថ្ងៃ ឯសមត្ថភាពផលិតទឹក មានប្រមាណតែ ៦៤ម៉ឺនម៉ែត្រគូប ក្នុងមួយថ្ងៃ គឺមានន័យថា ខ្វះទឹកផ្គត់ផ្គង់ ចំនួន ២៥ម៉ឺនម៉ែត្រគូប ក្នុងមួយថ្ងៃ។ រដ្ឋាករទឹកស្វយ័តក្រុងភ្នំពេញ អំពាវនាវដល់អតិថិជនទាំងអស់ទាំង ក្នុងរាជធានីភ្នំពេញ និងក្រុងតាខ្មៅ មេត្តាជួយសន្សំសំចៃទឹកស្អាត ដោយសារតម្រូវការទឹក នៅឆ្នាំ២០២៣ បានកើនឡើង។ យ៉ាងណា រដ្ឋាករទឹកស្វយ័តក្រុងភ្នំពេញ បានអះអាងថា ចាប់ពីឆ្នាំ២០២៤ តទៅ នឹងលែងមានការខ្វះខាតទឹកស្អាតប្រើប្រាស់ទៀតហើយ។
សេចក្តីជូនដំណឹងស្តីពីស្ថានភាពផ្គត់ផ្គង់ទឹកក្នុងរដូវប្រាំង ឆ្នាំ២០២៣ និងដំណោះស្រាយ របស់រដ្ឋាករទឹកស្វយ័តក្រុងភ្នំពេញ ចុះថ្ងៃទី២៣ ខែមីនា ឆ្នាំ២០២៣ មានខ្លឹមសារទាំងស្រុងដូចខាងក្រោម ៖
ចាប់ពីដើមខែកុម្ភៈ ដល់ខែមីនា ឆ្នាំ២០២៣នេះ រដ្ឋាករទឹកស្វយ័តក្រុងភ្នំពេញ (រ.ទ.ស.ភ) បានទទួល ព័ត៌មានអំពីការមិនពេញចិត្តរបស់អតិថិជន ពាក់ព័ន្ធនឹងបញ្ហាខ្វះទឹកប្រើប្រាស់ ទឹកមានសម្ពាធខ្សោយ និងគ្មានទឹកក្នុងបណ្តាញទឹក ជាដើម។ បញ្ហាទឹកមានសម្ពាធខ្សោយ ភាគច្រើនកើតឡើងនៅក្នុងសង្កាត់ ៣១ លើ ១១៥ ជាយរាជធានីភ្នំពេញ ដែលមានជាអាទិ៍ សង្កាត់ស្វាយប៉ាក ៦សង្កាត់ នៃខណ្ឌសែនសុខ សង្កាត់គោករកា សង្កាត់ក្រាំងធ្នង់ សង្កាត់សំរោងក្រោម សង្កាត់ស្នោ សង្កាត់ភ្លើងឆេះរទេះ សង្កាត់ពងទឹក សង្កាត់កន្ទោក សង្កាត់កំបូល សង្កាត់ចោមចៅ១, ២, និង៣ សង្កាត់កាកាប១ និង២ សង្កាត់ព្រៃវែង សង្កាត់ព្រៃស សង្កាត់ជើងឯក សង្កាត់ស្ទឹងមានជ័យ១, ២ និង៣ សង្កាត់ព្រែកកំពឹស សង្កាត់ព្រែកហូរ សង្កាត់ស្វាយរលំ សង្កាត់ព្រែកថ្មី សង្កាត់ក្បាលកោះ។
រ.ទ.ស.ភ ចាត់ទុកកង្វល់របស់អតិថិជន គឺជាកង្វល់និងការទទួលខុសត្រូវរបស់ខ្លួន និងសូមអតិថិជនដែលជួបបញ្ហាទឹកស្អាតទាំងអស់ មេត្តាយោគយល់ អធ្យាស្រ័យ ខន្តីអភ័យទោស និងសូមមេត្តាជឿជាក់ថា រ.ទ.ស.ភ នឹងធ្វើការដោះស្រាយបញ្ហាខ្វះទឹកស្អាតប្រើប្រាស់បាន ក្នុងលក្ខណៈជាប្រព័ន្ធ និងជាជំហានៗ ចាប់ពីខែឧសភា ឆ្នាំ២០២៣ តទៅ។ ដើម្បីដោះស្រាយបញ្ហាទឹកស្អាត សម្រាប់ទាំងអស់គ្នាបាន រ.ទ.ស.ភ សូមជូនព័ត៌មានត្រឡប់ វិធានការដោះស្រាយ និងសំណូមពរជូនអតិថិជនទាំងអស់ មេត្តាចូលរួមសហការដូចខាងក្រោម ៖
យោងតាមរបាយការណ៍សិក្សា តម្រូវការទឹករបស់ រ.ទ.ស.ភ ឆ្នាំ២០១៦-២០៣០ បានបង្ហាញថា រាជធានីភ្នំពេញ មាននិន្នាការខ្វះទឹកស្អាតប្រើប្រាស់ នាឆ្នាំ២០១៦ និងឆ្នាំ២០១៧ និងចាប់ផ្តើមខ្វះទឹកប្រើប្រាស់ ចាប់ពីឆ្នាំ២០១៨ រហូតដល់ឆ្នាំ២០២៣។ ជាក់ស្តែងនៅឆ្នាំ២០២៣ នេះ តម្រូវការទឹកប្រើប្រាស់ បានកើនឡើង ជាង ៨៩ម៉ឺនម៉ែត្រគូប ក្នុងមួយថ្ងៃ នៅពេលដែលសមត្ថភាពផលិតទឹកជាក់ស្តែងរបស់ រ.ទ.ស.ភ មាន ប្រមាណតែ ៦៤ម៉ឺនម៉ែត្រគូប ក្នុងមួយថ្ងៃតែប៉ុណ្ណោះ។ មានន័យថា រ.ទ.ស.ភ ខ្វះទឹកផ្គត់ផ្គង់ ចំនួន ២៥ម៉ឺនម៉ែត្រគូប ក្នុងមួយថ្ងៃ។
ស្ថិតក្នុងបរិការណ៍នេះ រាជរដ្ឋាភិបាល ក្រសួងអាណាព្យាបាល ក្រុមប្រឹក្សាភិបាល បានយល់អំពីសភាពការណ៍ខ្វះទឹកស្អាតប្រើប្រាស់ និងបានជួយគាំទ្រ រ.ទ.ស.ភ យ៉ាងពេញទំហឹងក្នុងការផ្តល់ទុនវិនិយោគ ដើម្បីឱ្យ រ.ទ.ស.ភ មានលទ្ធភាពសាងសង់រោងចក្រផលិតទឹកថ្មី ដែលមានសមត្ថភាពអាចផលិតទឹកស្អាតបាន ក្នុងបរិមាណ ៤០ម៉ឺនម៉ែត្រគូប ក្នុងមួយថ្ងៃ និងបំពង់ចែកទឹកថ្មី ជិត ១ពាន់គីឡូម៉ែត្រ ដើម្បីដោះស្រាយបញ្ហាខ្វះទឹក ជាជំហានៗ ឱ្យខាងតែបានចាប់ពីឆមាសទី១ ឆ្នាំ២០២៣ នេះតទៅ។
រ.ទ.ស.ភ សង្ឃឹមជឿជាក់ថា នៅដើមខែឧសភា ឆ្នាំ២០២៣នេះ រោងចក្រផលិតទឹកស្អាតថ្មី នឹងផលិត ចែកចាយទឹកស្អាតបានក្នុងបរិមាណ ២០ម៉ឺនម៉ែត្រគូប ក្នុងមួយថ្ងៃ បន្ថែមលើសមត្ថភាពផលិតបច្ចុប្បន្ន ៦៤ម៉ឺនម៉ែត្រគូប ក្នុងមួយថ្ងៃ។ ពោលគឺ រ.ទ.ស.ភ មានសមត្ថភាពផលិត ៨៤ម៉ឺនម៉ែត្រគូប ក្នុងមួយថ្ងៃ ធៀបនឹងតម្រូវការទឹកស្អាត ៨៩ម៉ឺនម៉ែត្រគូប ក្នុងមួយថ្ងៃ និងមានន័យថា រ.ទ.ស.ភ បានដោះស្រាយបញ្ហាខ្វះទឹកស្អាត បានជាង៩០ភាគរយហើយ។ ដោយឡែក ចាប់ពីដើមឆ្នាំ២០២៤ រ.ទ.ស.ភ នឹងអាចផលិតទឹកស្អាតបាន ២០ម៉ឺនម៉ែត្រគូប ក្នុងមួយថ្ងៃ បន្ថែមទៀត ដែលធ្វើឱ្យសមត្ថភាពសរុបរបស់ រ.ទ.ស.ភ មានរហូតដល់ជាង ១លានម៉ែត្រគូប ក្នុងមួយថ្ងៃ។
សរុបសេចក្តីមក ចាប់ពីដើមឆ្នាំ២០២៤ តទៅ សមត្ថភាពផលិតទឹកស្អាត របស់ រ.ទ.ស.ភ មានជាង១លានម៉ែត្រគូប ក្នុងមួយថ្ងៃ ធៀបនឹងការព្យាករតម្រូវការទឹកដែលមានប្រមាណ ៩០ម៉ឺនម៉ែត្រគូប ក្នុងមួយថ្ងៃ។ មានន័យថា អតិថិជនរស់នៅរាជធានីភ្នំពេញ និងក្រុងតាខ្មៅ ទាំងអស់ មានទឹកប្រើប្រាស់គ្រប់គ្រាន់។
សេចក្តីដូចបានជម្រាបជូនខាងលើ គឺជាវិធានការរបស់ រ.ទ.ស.ភ ក្រោមការជួយឧបត្ថម្ភគាំទ្រ ពីរាជរដ្ឋាភិបាល ក្រសួងអាណាព្យាបាល ក្រុមប្រឹក្សាភិបាល អាជ្ញាធរដែនដី ទាំងរាជធានីភ្នំពេញ និងក្រុងតាខ្មៅ។ ដោយឡែក ការចូលរួមដោះស្រាយបញ្ហាខ្វះទឹក ពីសំណាក់អតិថិជន ក៏ជាកត្តាគន្លឹះមួយដែរ ដែល រ.ទ.ស.ភ សូមអំពាវនាវដល់អតិថិជនទាំងអស់ ទាំងក្នុងរាជធានីភ្នំពេញ និងក្រុងតាខ្មៅ មេត្តាជួយសន្សំសំចៃទឹកស្អាត ដើម្បីផ្តល់ក្តីករុណា និងចែករំលែកទឹកទៅដល់អតិថិជនផ្សេងទៀត ជាពិសេសអតិថិជនរស់នៅក្នុងតំបន់ជាយក្រុង និងសូមមេត្តាចូលរួមផ្តល់ព័ត៌មាន ឬសាកសួរអំពីកង្វះទឹកស្អាត មកកាន់ រ.ទ.ស.ភ ដោយផ្ទាល់ តាមរយៈលេខទូរស័ព្ទ ០៩៧ ៧៧ ១១១ ៦៧ លោក សោម សុវណ្ណ ឬលេខទូរស័ព្ទ ០៩៧ ៧៧ ១១១ ៧៩ លោកផេង ទី ឬហ្វេសប៊ុកផេក របស់ រ.ទ.ស.ភ …៕ ខៀវទុំ
