ប្រទេសចិនបានព្រមានប្រធានសភាអាមេរិកលោក Kevin McCarthy កាលពីថ្ងៃអង្គារ ទី ៤មេសាកុំឱ្យ សាងកំហុសអតីតកាលដ៏មហន្តរាយម្តងទៀតជាមួយនឹងគម្រោងជួបជាមួយប្រធានាធិបតីតៃវ៉ាន់លោកស្រីធីសៃអ៊ីងវេន ដោយនិយាយថាវានឹងមិនជួយសន្តិភាព និងស្ថិរភាពក្នុងតំបន់ទេប៉ុន្តែផ្ទុយទៅវិញវាគ្រាន់តែបង្រួបបង្រួមប្រជាជនចិននៅពីក្រោយសត្រូវរួម។
លោក McCarthy មកពីគណបក្សសាធារណរដ្ឋ ដែលជាមេដឹកនាំជាន់ខ្ពស់បំផុតទីបីរបស់សហរដ្ឋអាមេរិកបន្ទាប់ពីប្រធានាធិបតីនិងអនុប្រធានាធិបតីអាចនឹងធ្វើជាម្ចាស់ផ្ទះកិច្ចប្រជុំនៅរដ្ឋកាលីហ្វ័រញ៉ានៅថ្ងៃពុធ(នៅអាមេរិកត្រូវនឹងថ្ងៃព្រហស្បតិ៍នៅកម្ពុជា)ជាមួយលោកស្រី ធីសៃក្នុងអំឡុងពេលឈប់សម្រាកដ៏រសើបនៅសហរដ្ឋអាមេរិកដែលបានជំរុញឱ្យមានការគំរាមកំហែងរបស់ចិនក្នុងការសងសឹក។
លោកស្រីធីសៃនឹងឆ្លងកាត់រដ្ឋ Los Angeles ក្នុងដំណើរត្រឡប់ទៅតៃប៉ិវិញបន្ទាប់ពីធ្វើដំណើរទៅប្រទេសអាមេរិកកណ្តាលចំនួន២។ សហរដ្ឋអាមេរិកនិយាយថា ការឈប់សម្រាកបែបនេះជាទម្លាប់ធម្មតា ហើយមិនចាំបាច់ឲ្យចិនមានប្រតិកម្មខ្លាំងពេកនោះទេ។
ស្ថានកុងស៊ុលរបស់ចិននៅទីក្រុង Los Angeles បាននិយាយថាវាជារឿងមិនពិតក្នុងការអះអាងថាវាជាការឆ្លងកាត់ ដោយបន្ថែមថា លោកស្រីកំពុងចូលរួមក្នុងការផ្លាស់ប្តូរជាផ្លូវការដើម្បី បង្ហាញនយោបាយ។ស្ថានកុងស៊ុលបានបន្ថែមថា វាមិនអំណោយផលដល់សន្តិភាព សន្តិសុខ និងស្ថិរភាពក្នុងតំបន់ ហើយវាក៏មិនមែនជាផលប្រយោជន៍រួមរបស់ប្រជាជនចិន និងសហរដ្ឋអាមេរិកនោះដែរ។
ប្រទេសចិនដែលទាមទារតៃវ៉ាន់ជាទឹកដីរបស់ខ្លួនបានរៀបចំល្បែងសង្គ្រាមជុំវិញកោះនេះកាលពីខែសីហាឆ្នាំមុនបន្ទាប់ពីអតីតប្រធានសភា លោកស្រី Nancy Pelosi មកពីគណបក្សប្រជាធិបតេយ្យបានធ្វើទស្សនកិច្ចនៅទីក្រុងតៃប៉ិ។ ជុំវិញបញ្ហានេះដែរថ្លែងទៅកាន់អ្នកសារព័ត៌មាននៅទីក្រុងប៉េកាំង កាលពីថ្ងៃអង្គារ អ្នកនាំពាក្យក្រសួងការបរទេសចិន លោកស្រី Mao Ning បាននិយាយថា ប្រទេសចិននឹងតាមដានយ៉ាងជិតស្និទ្ធនូវការអភិវឌ្ឍន៍ និងការពារយ៉ាងម៉ឺងម៉ាត់ ចំពោះអធិបតេយ្យភាព និងបូរណភាពទឹកដីរបស់ខ្លួន តែមិនផ្តល់ព័ត៌មានលម្អិតពីអ្វីដែលខ្លួននឹងចាត់វិធានការប្រឆាំងនឹងជំនួបនេះ៕