ប្រទេសចិនបានសងសឹកចំពោះកិច្ចប្រជុំរបស់ប្រធានសភាសហរដ្ឋអាមេរិកជាមួយប្រធានាធិបតីតៃវ៉ាន់ដោយការប្រកាសដាក់ទណ្ឌកម្មកាលប្រឆាំងទៅនឹងបណ្ណាល័យប្រធានាធិបតី RonaldReagan និងអង្គការផ្សេងទៀតដែលពាក់ព័ន្ធនឹងដំណើរទស្សនកិច្ចរបស់លោកស្រីធីសៃ។
ប្រធានសភាមកពីគណបក្សសាធារណរដ្ឋ លោក Kevin McCarthy បានជួបពិភាក្សាកាលពីថ្ងៃពុធជាមួយប្រធានាធិបតី ធីសៃអ៊ីងវេននៅបណ្ណាល័យ Reagan ក្នុងទីក្រុង Simi Valley រដ្ឋកាលីហ្វ័រញ៉ា ប្រឆាំងទៅនឹងការព្រមានរបស់ចិន។ លោកខេវីន ម៉ាក់ខាធីបានចូលរួមជាមួយ
សមាជិកសភាបរទេសជាបន្តបន្ទាប់ និងបានជួបលោកស្រី ធីសៃក្នុងការបង្ហាញការគាំទ្រចំពោះតៃវ៉ាន់ដែលប្រឈមមុខនឹងការបំភិតបំភ័យជាញឹកញាប់ពីសំណាក់ប្រទេសចិន។
ក្រសួងការបរទេសរបស់ប្រទេសចិនបានប្រកាសថាបណ្ណាល័យ Reagan និងវិទ្យាស្ថាន Hudson ,វិទ្យាស្ថាននយោបាយThink Tank របស់ទីក្រុងវ៉ាស៊ីនតោន ត្រូវបានដាក់ទណ្ឌកម្មសម្រាប់ ការផ្តល់វេទិកា និងភាពងាយស្រួលដល់សកម្មភាពផ្តាច់ខ្លួនរបស់តៃវ៉ាន់។
លោកស្រីធីសៃបានទទួលយកពានរង្វាន់ភាពជាអ្នកដឹកនាំពីវិទ្យាស្ថានHudsonជាផ្នែកនៃដំណើរទៅសហរដ្ឋអាមេរិករបស់នាងហើយបានថ្លែងសុន្ទរកថាអំពីបញ្ហាប្រឈមរបស់តៃវ៉ាន់ក្នុងសន្តិសុខក្នុងតំបន់។
ជាមួយគ្នានេះចិនក៏បានដាក់ទណ្ឌកម្មទៅលើបុគ្គលមួយចំនួនដូចជាលោកស្រី Sarah May Stern ប្រធានក្រុមប្រឹក្សានាយកវិទ្យាស្ថាន Hudson ។ លោកJohn P. Walters នាយកវិទ្យាស្ថាន; លោក John Heubusch អតីតនាយកប្រតិបត្តិនៃមូលនិធិ Reagan និង Joanne M. Drake ដែលជានាយកប្រតិបត្តិរបស់មូលនិធិ។
ក្រសួងបាននិយាយថាពួកគេត្រូវបានហាមឃាត់មិនឱ្យទៅទស្សនាប្រទេសចិនហើយទ្រព្យសម្បត្តិឬហិរញ្ញវត្ថុណាមួយដែលជាកម្មសិទ្ធិរបស់ពួកគេនៅក្នុងប្រទេសចិននឹងត្រូវបង្កក។
ការិយាល័យកិច្ចការតៃវ៉ាន់របស់គណៈរដ្ឋមន្ត្រីចិនបាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា យើងនឹងចាត់វិធានការយ៉ាងម៉ឺងម៉ាត់ដើម្បីដាក់ទណ្ឌកម្មកងកម្លាំងបំបែកខ្លួន ឯករាជ្យតៃវ៉ាន់និងសកម្មភាពរបស់ពួកគេ និងការពារយ៉ាងម៉ឺងម៉ាត់នូវអធិបតេយ្យភាព និងបូរណភាពទឹកដីរបស់ប្រទេសយើង៕