ភ្នំពេញ៖ព្រាប សុវត្ថិ បានជ្រកនៅហង្សមាសអស់រយៈពេល២៣ឆ្នាំ(១៩៩៧-២០២០) ហើយកាលពីឆ្នាំ២០១៧ លោកធ្លាប់បានត្រួសត្រាយផ្លូវឲ្យកូនទាំង៣ស្នងតំណែងលោកនៅផលិតកម្មធំនេះ ហើយក្នុងនោះអ្នកជំនាញសិល្បៈបានមើលឃើញថាកូនទី២របស់លោកសុវត្ថិ ឈ្មោះសុវត្ថិ មុនីនាគ មានភាគរយខ្ពស់ក្នុងការទៅជំនួសឪពុករបស់គេនាពេលអនាគត ខណៈដែលកូនទី១សុវត្ថិ មុនីវណ្ណ និងកូនទី៣ សុវត្ថិ សិរីវុឌ្ឍ មានស្ទីលនៃការច្រៀងសម្ដែងម្យាងៗម្នាក់។ប៉ុន្ដែចាប់តាំងពីលោកព្រាប សុវត្ថិ បានដើរចេញពីហង្សមាសកាលពីខែសីហា ឆ្នាំ២០២០ ដោយទៅចូលរួមជាមួយGalaxy នោះកូនៗរបស់លោកបានចាកចេញពីផលិតកម្មធំនោះជាបន្ដបន្ទាប់ហើយនៅឆ្នាំ២០២៣ នេះគេអាចមើលឃើញថាមិនទាន់មានកូនម្នាក់ណារបស់លោកសុវត្ថិ អាចជំនួសតំណែងរបស់ឪពុកគេបាននៅហង្សមាសឡើយ ខណៈដែលកូនប្រុសច្បងលោកក្លាយជាតារាGalaxy ,កូនទី២ មិនទាន់ចូលផលិតកម្មថ្មី និងកូនទី៣ធ្វើបទចម្រៀងច្រៀងដោយខ្លួនឯង។នៅដើមឆ្នាំ២០២៣ នេះដែរលោកព្រាប សុវត្ថិ បានចេញច្រៀងសម្ដែងជាមួយកូនទី១របស់លោកឡើងវិញដែលមើលទៅឪពុកកូនដូចជាបងប្អូន ព្រោះលោកសុវត្ថិ នៅតែមានសម្រស់ក្មេងជាងវ័យទោះជាឆ្នាំនេះឈានចូលអាយុ៤៨ឆ្នាំទៅហើយក្ដី។
ប៉ុន្ដែព្រាប សុវត្ថិ បានផ្អឹបកូនទី១ និងទី៣ មិនទាន់ឲ្យពួកគេចេញច្រៀងសម្ដែងឡើងវិញ ឬចាប់ដៃជាមួយលោកម្ដងទៀតឡើយ។ដោយឡែកក្នុងជំនួបជាមួយអ្នកសារព័តមានកន្លងមកលោកសុវត្ថិ ថាកូនៗរបស់លោកមិនអាចបោះបង់អាជីពចម្រៀងបានទេ ព្រោះពួកគេសុទ្ធតែមានទេពកោសល្យ ហើយអ្វីៗបានត្រៀមរួចអស់ហើយ ពោលគឺរងចាំតែពេលវេលាត្រូវចេញប៉ុណ្ណោះ។ប្រភពបានឲ្យដឹងថាលោកសុវត្ថិ ហាក់ស្ទាក់ស្ទើចិត្តក្នុងការយកកូន២នាក់ទៀតមករួមទ្រនុំ ប៉ុន្ដែបើលោកចង់ឲ្យទី២និង៣ មកច្រៀងនៅផលិតកម្មជាមួយលោកនោះពេលណាក៍បានដែរ ព្រោះថៅកែផលិតកម្មនេះបានសម្របខ្លួនតាមលោកគ្រប់ពេលវេលាតែម្ដង។ដោយឡែកហង្សមាសដែលមានតារាឡើងគជើងគ្នានោះតាំងពីព្រាប សុវត្ថិ និងកូនៗលោកចាកចេញបន្ដគ្នាមកថៅកែធំលោកឧកញ៉ាអ៊ឹង ឆៃងួន រក្សារភាពស្ងៀមស្ងាត់ គ្មានប្រតិកម្មជាសាធារណៈនោះទេ។
ទាក់ទងរឿងនេះដែរគ្រូភ្លេង(Composer)ម្នាក់នៅហង្សមាសបាននិយាយក្នុងល័ក្ខខណ្ឌមិនបញ្ចេញឈ្មោះថាពីមុនព្រាប សុវត្ថិ ហាក់ដូចជាតំណាងឲ្យហង្សមាសហើយពេលលោកចាកចេញបញ្ជាក់ថាការគ្រប់គ្រងរបស់ហង្សមាសមិនទាន់ល្អឥតខ្ចោះនោះទេ។ប៉ុន្ដែលោកថាហង្សមាសមិនបានដេញលោកសុវត្ថិ ចេញនោះទេគឺលោកចេញខ្លួនឯង ហើយមុនទៅGalaxy នោះកាលពីឆ្នាំមុនក៍ធ្លាប់មានព័តមានថាព្រាប សុវត្ថិ ជិតចូលថោន ម្ដងដែរ។លោកថាទោះជាហង្សមាសអត់ព្រាប សុវត្ថិ និងកូនៗលោកក៍ការប្រគុំតន្រ្ដីទាំងឡាយរបស់ក្រុមហ៊ុននេះនៅតំណើរការធម្មតា ព្រោះក្នុងកម្មវិធីប្រលងចម្រៀង១រដូវកាលក្រៅពីគេជ្រើសបានតារាម្ចាស់ពានថ្មី១ គេក៍អាចយកអ្នកចម្រៀងដែលមានសម្ថភាពល្អ៥នាក់ទៀតដែលអត់បានពានមកចូលបានដែរ។
មជ្ឈដ្ឋានមហាជនមើលឃើញថាជុំវិញការទៅជ្រកនៅGalaxy រយៈពេល៥ឆ្នាំ របស់លោកព្រាប សុវត្ថិ នេះ ក្រៅពីស្វែងរកបទពិសោធន៍ថ្មីនោះទិសដៅរបស់លោកក៍ដើម្បីវិវត្តន៍ខ្លួនមួយជំហ៊ានទៀតគឺការឡើងជាឧកញ៉ានេះតែម្ដងដើម្បីលោកងាយស្រួលធ្វើជំនួញ ព្រោះវ័យរបស់លោកក៍ជ្រេបន្ដិចដែរ។តែលោកសុវត្ថិ ថាទោះជាលោកក្លាយទៅជាអ្វីក៍ដោយគឺនៅតែបន្ដអាជីពចម្រៀងនិងធ្វើជំនួញឲ្យស្មើគ្នាតែម្ដង ព្រោះលោកថាបើមិនរកស៊ីទេគឺអត់ទៅមុខរួចឡើយ។
ក្រៅពីព្រាប សុវត្ថិ តារាដែលកំពុងឲ្យកូនដើរតាមគន្លងនិងស្នងតំណែងរបស់ខ្លួននោះមានដូចជាលោកហួ ឡាវី,ខាន់ ជេសម៍ ,អ្នកនាងម៉េង កែវពេជ្ជតា និងចន ច័ន្ទ ជាដើម។សម្រាប់ឧកញ៉ាព្រាប សុវត្ថិ ដែលទើបនាំកូនទី១ចូលGalaxy នេះវិញលោកគាំទ្រកូនប្ដូរយុទ្ធសាស្រ្ដថ្មីមកច្រៀងរ៉េប បើទោះជានៅលើបណ្ដាញសង្គមមានការជជែកគ្នាច្រើនពីសម្ថភាពមុនីវណ្ណ ក្ដី តែគេឃើញថាលោកសុវត្ថិ ប្រឹងយឹតយោងកូនឲ្យលេចធ្លោជាងនៅផលិតកម្មចាស់នោះគឺការច្រៀងដៃគូជាមួយកូនទី១ គ្រប់ឆាកតន្រ្ដីឡើងវិញ ហើយFan យុវវ័យមួយចំនួនពេញចិត្តរូបរាងសង្ហាររបស់សុវត្ថិ មុនីវណ្ណ ជាងទឹកដមសម្លេង ហេតុនេះហើយទើបនៅឆ្នាំ២០២៣ នេះគេនៅតែមិនអាចវាយតម្លៃបានដដែលថាតើក្នុងចំណោមកូនប្រុសទាំង៣របស់លោកព្រាប សុវត្ថិ នោះម្នាក់ណាដែលសាកសមបំផុតអាចស្នងតំណែងពេលលោកឧកញ៉ាព្រាប សុវត្ថិ បាននៅពេលដែលលោកឈប់ច្រៀង ៕