ព្រះសីហនុ ៖ ស្ត្រីម្នាក់ មានផ្ទៃពោះគ្រប់ខែ កំពុងរស់នៅលើកោះរ៉ុងសន្លឹម បានមានអាការឈឺពោះសម្រាល ប៉ុន្តែគ្មានលទ្ធភាពនិងមធ្យោបាយមកសម្រាលកូននៅលើដីគោក ត្រូវបានលោកឧកញ៉ា ទៀ វិចិត្រ ប្រធាន គណៈកម្មាធិការគណបក្សមូលដ្ឋានភ្នាក់ងារដឹកជញ្ជូន ទេសចរណ៍ជលយាន ខេត្តព្រះសីហនុ បានបញ្ជូន អូប័រពេទ្យល្បឿនលឿនរបស់ក្រុមហ៊ុន GTVC ទៅទទួលយកស្ត្រីមានផ្ទៃពោះរូបនោះ ឆ្លងកាត់សមុទ្រ ដើម្បី មកសម្រាលនៅមន្ទីរពេទ្យខេត្តព្រះសីហនុ។
ស្ត្រីរូបនោះ មានឈ្មោះដាញ់ ឌី អាយុ២៩ឆ្នាំ មានលំនៅក្នុងភូមិកោះតូច សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ។
ក្នុងហេតុការណ៍ខាងលើ បន្ទាប់ពីទទួលដំណឹងភ្លាមៗ លោកឧកញ៉ា ទៀ វិចិត្រ បានបញ្ជូនអូប័រពេទ្យ របស់ ក្រុមហ៊ុន GTVC ទៅទទួលយកស្ត្រីរូបនោះភ្លាមៗ ដើម្បីយកមកមន្ទីរពេទ្យខេត្ត។បច្ចុប្បន្ន ស្ត្រីខាងលើ កំពុង សម្រាកនៅមន្ទីរពេទ្យបង្អែកខេត្តព្រះសីហនុ ដើម្បីត្រៀមសម្រាលបុត្រ។
គួរបញ្ជាក់ថា ជារឿយៗ លោកឧកញ៉ា ទៀ វិចិត្រ តែងអន្តរាគមន៍ជួយប្រជាពលរដ្ឋនៅតាមកោះបែបនេះ ហើយ លោកក៏ទទួលបានការថ្លែងអំណរគុណ និងគោរពស្រឡាញ់ពីសំណាក់ប្រជាពលរដ្ឋផងដែរ៕
