តាកែវ ៖ បុរសម្នាក់ ខឹងនារីជាសង្សារសុំបែក បានផឹកស្រាបៀរ រហូតស្រវឹង រួចឡើងបើករថយន្តសំដៅ ទៅផ្ទះ ស្រីស្នេហ៍ បើករថយន្តបំបុករានទេវតាបាក់រំលំខ្ទេចខ្ទី រួចបន្តបំបុកចូលផ្ទះ ធ្វើឱ្យបាក់របងទ្វារផ្ទះស្រីស្នេហ៍ចំនួន ២ផ្ទាំងថែមទៀត បង្កឱ្យមានការភ្ញាក់ផ្អើលដល់សមត្ថកិច្ចចុះអន្តរាគមន៍ នាំខ្លួនយកទៅសាកសួរ។
ហេតុការណ៍ខាងលើនេះ បានកើតឡើង កាលពីរសៀលថ្ងៃទី២៨ ខែមេសា ឆ្នាំ២០២៣ នៅចំណុចភូមិយាយឡ ឃុំត្រាំកក់ ស្រុកត្រាំកក់។
ជនបង្កដែលបើករថយន្តបំបុកផ្ទះស្រីស្នេហ៍ និងត្រូវសមត្ថកិច្ចចាប់ឃាត់ខ្លួន មានឈ្មោះឈុន នី ភេទប្រុស អាយុ ៤០ឆ្នាំ មុខរបរបើករថយន្តដើរលក់គ្រឿងសង្ហារិម មានលំនៅ ភូមិស្អាង ឃុំស្អាង ស្រុកជ័យសែន ខេត្តព្រះវិហារ។ ចំណែកជនរងគ្រោះជាម្ចាស់ផ្ទះ និងត្រូវជាអតីត សង្សាររបស់ជនបង្ក មានឈ្មោះជ័យ ចន្ធូ ភេទស្រី អាយុ៤០ឆ្នាំ មុខរបរលក់ដូរ មានលំនៅ ផ្ទះកើតហេតុខាងលើ។
តាមប្រភពពីកន្លែងកើតហេតុ បានឱ្យដឹងថា មុនពេលកើតហេតុ ជនសង្ស័យបានចូលទៅផឹកស៊ី នៅហាងលក់ ដូររបស់ឈ្មោះជ័យ ចន្ធូ ដែលជាអតីតសង្សាររបស់ខ្លួន រួចបានបង្កការអុកឡុក ជេរប្រមាថ រករឿងដេញវ៉ៃអតីត សង្សារដែលជាម្ចាស់ហាង និងអ្នកបម្រើ តែមិនបណ្តាលឱ្យមានអ្នករងរបួសទេ។ ពេលនោះដោយមាន អន្តរា គមន៍ពីសំណាក់សមត្ថកិច្ចនគរបាលមូលដ្ឋាន ជនបង្កហេតុបានបើករថយន្តចេញទៅបាត់។ ប៉ុន្តែមួយសន្ទុះ ក្រោយមកបុរសខាងលើ បានបើករថយន្តចូលទៅផឹកស៊ីនៅក្នុងហាងរបស់ឈ្មោះគឹម យ៉ាត ម្តង ដែលស្ថិតនៅ ភូមិជាមួយគ្នា។
ប្រភពដដែល បន្តថា ក្រោយពីបុរសនោះបានផឹកស្រាបៀរ អស់២-៣កំប៉ុង រហូតស្រវឹង និងមិនទាន់ទូទាត់ប្រាក់ ឱ្យទៅម្ចាស់ហាងនៅឡើយ ស្រាប់តែបង្កជម្លោះ ជេរបញ្ចោរម្ចាស់ហាង រួចបានបើករថយន្តបុករានទេវតានៅមុខ ផ្ទះ បណ្តាលឱ្យបាក់រលំដល់ដី និងខូចខាតទាំងស្រុង ថែមទាំងបន្តបើករថយន្តត្រឡប់ទៅបុកទ្វាររបងផ្ទះអតីត សង្សារ បណ្តាលឱ្យបាក់អស់ចំនួនពីរផ្ទាំងទៀត។
តាមប្រភពពព័ត៌មាន បានឱ្យដឹងថា មូលហេតុដែលនាំឱ្យកើតមានរឿងរ៉ាវមួយនេះ គឺដោយសារតែជនបង្កហេតុ ខឹងនឹងឈ្មោះជ័យ ចន្ធូ ជាអតីតសង្សារ ដែលបានលែងយករូបគេធ្វើជាសង្សារតទៅទៀត។
ក្រោយកើតមានករណីខាងលើ ជនរងគ្រោះ បានដាក់ពាក្យបណ្តឹង សុំអន្តរាគមន៍ពីសមត្ថកិច្ចភ្លាមៗ និងត្រូវបាន សមត្ថកិច្ចជំនាញ ក្រោមការបញ្ជាផ្ទាល់ពីលោកឧត្តមសេនីយ៍ទោស្នងការនគរបាលខេត្តតាកែវ និងមានការ សម្របសម្រួលពីលោកព្រះរាជអាជ្ញាអមសាលាដំបូងខេត្ត បានធ្វើការឃាត់ខ្លួនជនសង្ស័យភ្លាមៗ ព្រមទាំងដក ហូតវត្ថុតាង រថយន្ត ១គ្រឿង និងសម្ភារៈលើរថយន្ត នាំទៅកាន់អធិការដ្ឋាននគរបាលស្រុកត្រាំកក់ ដើម្បីធ្វើការ សាកសួរ និងចាត់ការបន្តតាមនីតិវិធី៕
