ភ្នំពេញ៖អតីតតារាចម្រៀងហង្សមាសលោកនូ ស៊ឹប បានប្រាប់អ្នកយកព័តមានយើងតាមទូរស័ព្ទកាលពីរសៀលថ្ងៃទី៣ កក្កដា ថាក្រោយលោកបានដឹងរឿងរ៉ាវលោកបឺត សំរេច ហៅសាមុត ពីរ ចេញមុខអះអាងថាជាកូនបង្កើតអធិរាជសម្លេងមាសស៊ីន ស៊ីសាមុត នោះតាមការរៀបរាប់របស់សំរេច នោះលោកជឿរជាក់ដល់ទៅ៨០% ថារឿងមួយនេះគឺជាការពិត។លោកនូ ស៊ឹប ថាលោកសំរេច បានព្យាយាមលាក់រឿងនេះអស់រយៈពេល៤៦ឆ្នាំ ទៅហើយ ព្រោះតែខ្លួនគិតថាជាកូនឥតខាន់ស្លារ កូនលួចលាក់របស់លោកស៊ីន ស៊ីសាមុត ហើយគ្នាបានដឹងរឿងនេះពីបងស្រីម្ដាយដែលចិញ្ចឹមលោកតាំងពីតូច ដែលការចេញមុខរបស់សំរេច នាពេលនេះគ្នាក៍គ្មានចង់បានអ្វីក្រៅពីចង់ឲ្យទស្សនិកជនបានដឹងរឿងពិតមួយនេះដែរ។ក្រៅពីនេះលោកនូ ស៊ឹប នៅមានការសន្និដ្ឋានតាមរយៈ៥ចំណុច ផ្សេងទៀតដែលអាចបញ្ជាក់ថាបឺត សំរេច ជាកូនលោកស៊ីន ស៊ីសាមុត ក្នុងនោះទី១៖ត្រេមុខ,ទី២៖បបូរមាត់ ,ទី៣៖ធ្មេញ ,ទី៤៖ថ្ពាល់ និងទី៥ ៖ស្លឹកត្រចៀក ដែលលោកថាស្រដៀងគ្នាទៅនិងលោកសាមុត ដែរ។ដោយឡែកទាក់ទងទៅនិងសម្លេងរបស់បឺត សំរេច វិញលោកនូ ស៊ឹប ថាគេប្រើប្រាស់ចុងដង្ហើម ប្រអប់មាត់ និងដង្ហើម ច្រៀងត្រូវតាមបញ្ចេកទេស តែមិនមែនថាកូនត្រូវតែមានសម្លេងដូចឪពុកនោះទេ។
លោកនូ ស៊ឹប បានរំលឹកដែរថាកាលពីឆ្នាំ១៩៧៣ អំឡុងពេលដែលលោកធ្វើជាគ្រូពេទ្យម្នាក់នៅមន្ទីពេទ្យព្រះកេតុមាលា(បច្ចុប្បន្នពេទ្យ ១ ៧៩) នោះលោកក៍បានជួបលោកស៊ីន ស៊ីសាមុត ផ្ទាល់ផងដែរ ដែលពេលនោះលោកសាមុត ទើបតែឈប់ធ្វើពេទ្យនៅទីនោះហើយលោកកំពុងល្បីល្បាញក្នុងអាជីពចម្រៀងនិងមានវ័យជាង៤០ឆ្នាំ ។លោកថាពេលនិយាយគ្នានោះលោកសាមុត និយាយថ្នមសម្លេងណាស់ ហើយគាត់មានរូបរាងស្អាតសង្ហារសាច់សដូចស្រីនិងសាច់មើលទៅឡើងហាប់ណែនតែម្ដង។លោកបន្ថែមថាលោកស៊ីន ស៊ីសាមុត បានសរសើរពីសម្ថភាពលោកច្រើន ពេលដឹងថាលោកទៅប្រលងចម្រៀង ហើយក្រោយមកតាមកម្មវិធីផ្សេងៗទៀតលោកក៍បានជួបជាមួយលោកស៊ីន ស៊ីសាមុត ជាបន្ដបន្ទាប់ទៀតដែរ តែមិនសូវបាននិយាយគ្នាយូដូចជួបលើកដំបូងទេ។អតីតតារាចម្រៀងហង្សមាសរូបនេះបង្ហើបថាលោកបានដឹងថាលោកស៊ីន ស៊ីសាមុត មានស្រីស្រលាញ់ច្រើនព្រោះលោកសម្លេងពិរោះ និងសង្ហារ អីចឹងស្រីៗទាំងនោះភាគច្រើនគឺមករកលោកតែម្ដង។ប៉ុន្ដែទាក់ទងម្ដាយរបស់លោកប៉េត សំរេច ឈ្មោះធីម វិជ្ជរ៉ា ជាកូនកាត់៣សាសន៍(ខ្មែរ-ចិន និងឡាវ)នោះលោកថាមិនបានស្គាល់និងដឹងរឿងនេះទេ តែតាមរយៈរូបភាពលោកមើលឃើញថាលោកសំរេច ក៍កាត់ទៅតាមម្ដាយច្រើនដែរ។តារាវ័យ៧៦ឆ្នាំ រូបនេះថាក្រោយបែកពីលោកស៊ីន ស៊ីសាមុត អស់រយៈពេល៥០ឆ្នាំ ហើយបើគិតមកដលល់ពេលនេះលោកសាមុត បើនៅរស់មានអាយុ៩០ឆ្នាំ គឺបងលោកដល់ទៅ១៤ឆ្នាំ នោះថាលោកមិនដែលបានស្ដាប់និងឃើញថាមានតារាចម្រៀងរូបណាដែលអាចច្រៀងបានពិរោះដូចលោកស៊ីន ស៊ីសាមុត ទេ។ដោយសារតែលោកស៊ីន ស៊ីសាមុត មានសម្លេងពិរោះពេក គ្មានអ្នកអាចធ្វើបានដូចជាលោកនេះហើយ ទើបមានពេលខ្លះលោកនូ ស៊ឹប ថាលោកថែមទាំងគិតថាប្រហែលជាលោកសាមុត នេះទេវតាមកចាប់កំណើតទៀតផង ខណៈដែលសម័យនោះអធិរាជសម្លេងមាសតែងតែទៅថតសម្លេងនៅស្ទីឌីយូលេខ៥ និងវៀងច័ន្ទ។
ទាក់ទងរឿងភរិយាលោកស៊ីន ស៊ីសាមុត លោកយាយខាវ ថងយ៉ុត អាយុ៨៥ឆ្នាំ បានជំទាស់ទៅនិងការដែលមហាជនស្នើសុំឲ្យបឺត សំរេច ធ្វើDNA ជាមួយកូនស្រីលោកសាមុត ដើម្បីស្វែងរកការពិតនោះលោកនូ ស៊ឹប ថាទោះជាពេលនេះមិនទាន់បានធ្វើDNA ឬក៍មិនធ្វើក្ដី ប៉ុន្ដែរូបលោកនិងទស្សនិកជនភាគច្រើនជឿរជាក់ថាលោកសំរេច ពិតជាកូនលោកអធិរាជសម្លេងមាសស៊ីន ស៊ីសាមុត ហើយនេះមិនមែនជាលើកទី១ទេ ដែលរូបគេបាននិយាយប្រាប់គេតែគ្មានអ្នកណាជឿរនោះ គឺជាច្រើនលើកមកហើយដូចជានៅកន្លែងប្រដាល់ជាដើម ហើយគ្នាប្រឹងលាក់រឿងនេះព្រោះតែថាខ្លួនជាកូនឥតខាន់ស្លារហ្នឹងឯង ។លោកនូ ស៊ឹប ថាពេលនេះលោកមិនទាន់បានជួបលោកបឺត សំរេច ផ្ទាល់ទេ តែលោកថាលោកសំរេច ធ្លាប់ជាអ្នកប្រដាល់អីចឹងការងាកមកច្រៀងបទរបស់ឪពុកលោកបានប៉ុណ្ណោះ ចាត់ទុកថាគ្រាន់បើហើយព្រោះចេះប្រើសម្លេងអឿន និងដាក់មនោសញ្ចេតនាបាន ។លោកជឿរថានាពេលខាងមុខលោកសំរេច នឹងវិវត្តន៍ខ្លួនជាតារាចម្រៀងម្នាក់កាន់តែល្អជាងនេះថែមទៀតជាមិនខាននៅពេលដែលរូបគេស៊ាំនិងឆាក៕