ខេត្តសៀមរាប ៖ ក្រោយកើតមានអំពើហិង្សាពីសំណាក់ព្រះចៅអធិការវត្តវេឡុវ័នដោកពោយគោកក្រោល ទៅលើសាមណេរតូច ២អង្គ បណ្តាលរងរបួស កាលពីថ្ងៃទី២១ ខែតុលា ឆ្នាំ២០២៣ ក្រោមហេតុផលវាយ ព្រមាននោះ ព្រះចៅអធិការវត្ត បានផ្តិតមេដៃធ្វើកិច្ចសន្យាឈប់បន្តប្រើអំពើហិង្សាតទៅទៀតហើយ ក្នុងករណីមានលើកក្រោយទៀត ព្រះអង្គនឹងលាចាកសិក្ខាបទ ហើយព្រមទទួលទោសចំពោះមុខច្បាប់។
សូមរំលឹកថា អំពើហិង្សាខាងលើ បានកើតឡើង កាលពីវេលាម៉ោង ១១និង២០នាទីព្រឹក ថ្ងៃទី២១ ខែតុលា ឆ្នាំ២០២៣ នៅចំណុចសាលាឆាន់ក្នុងវត្តវេឡុវ័នដោកពោយ គោកក្រោល ស្ថិតក្នុងភូមិឫស្សីសាញ់ ឃុំជ្រោយ នាងងូន ស្រុកស្រីស្នំ ដោយព្រះចៅអធិការវត្ត បានវាយសាមណេរ ២អង្គ ក្នុងចំណោម ២៨អង្គ បណ្តាល ឱ្យរងរបួសព្រះកេស ជាច្រើនថ្នេរ។
ព្រះចៅអធិការវត្ត ដែលវាយសាមណេរទាំង ២អង្គ រងរបួសនោះ ព្រះនាមបឿត សុម៉ៅសុវណ្ណារ៉ា ។ ចំណែកសាមណេររងគ្រោះ ទាំង ២អង្គ ទី១-សាមណេរ អុក ទីណា ព្រះជន្ម ៩វស្សា មានលំនៅ ភូមិជើងទៀន ស្រុកចុងកាល់ ខេត្តឧត្តរមានជ័យ រងរបួសបែកថ្ងាស ១កន្លែង ដេរ៥ថ្នេរ សម្រាកព្យាបាលនៅមណ្ឌលសុខភាព និងទី២-សាមណេរ ហៅ លីហៀង ព្រះជន្ម៨វស្សា រងរបួសស្រាល ហើមព្រះសិរ ដើមដៃខាងស្តាំ ស្មាឆ្វេង ប្រអប់ដៃខាងឆ្វេង។
ជុំវិញករណីខាងលើនេះ ព្រះចៅអធិការព្រះនាម បឿត សុម៉ៅសុវណ្ណារ៉ា ចៅអធិការវត្តវេឡុងវ័នដោកពួយ គោកក្រោល បានមានថេរដីកាថា ព្រះអង្គពិតជាបានជ្រុលដៃប្រើអំពើហិង្សាទៅលើសាមណេរទាំងពីរអង្គ ឱ្យរងរបួសប្រាកដមែន ដែលការធ្វើនេះ គឺជាការប្រៀនប្រដៅ ចំពោះសាមណេរគ្រប់អង្គ ដែលបានប្រព្រឹត្តខុស លួចលុយ លួចឆាន់ចង្ហាន់ខុសកាលវេលា និមន្តចេញពីវត្តដោយសេរីគ្មានការអនុញ្ញាត និងទៅលេងទឹក វាលស្រែ ប៉ះពាល់ផលដំណាំពុទ្ធបរិស័ទ ជាដើម។
ព្រះអង្គចៅអធិការអង្គនេះ បន្តថា ព្រះអង្គមានការសោកស្តាយនូវកំហឹងមួយឆាវរបស់ព្រះអង្គ ចំពោះសាមណេរ ហើយព្រះអង្គក៏សូមខន្តីអភ័យទោសពីសំណាក់ថ្នាក់ដឹកនាំគ្រប់ជាន់ថ្នាក់ គ្រប់ស្ថាប័ន មន្ត្រីរាជការគ្រប់អង្គភាព ពុទ្ធបរិស័ទចំណុះជើងវត្ត ចំពោះកំហុសឆ្គងដោយអចេតនានោះ។
ព្រះចៅអធិការ ក៏បានធ្វើលិខិតកិច្ចសន្យា ឈប់បន្តប្រើអំពើហិង្សាតទៅទៀត បើសិនជាទៅថ្ងៃមុខ ព្រះអង្គនៅ តែប្រើអំពើហិង្សាម្តងទៀត ព្រះអង្គនឹងលាចាកសិក្ខាបទ ហើយព្រមទទួលទោសចំពោះមុខច្បាប់ជាធរមាន។លិខិតសន្យានេះ បានធ្វើចំពោះមុខសាក្សីជាច្រើននាក់ ក្នុងចំណោមនោះ មានព្រះវត្តមានព្រះអនុគណស្រុក ស្រីស្នំ ព្រះអង្គកិន ស្មឿន និងលោកហ៊ន់ ឫទ្ធិ អភិបាលស្រុកស្រីស្នំ ផងដែរ៕