កូរ៉េខាងជើង ៖ កូរ៉េខាងជើង បានបាញ់សាកល្បងមីសស៊ីលនាវា ជាច្រើនគ្រាប់ ខណៈលោកគីម ជុងអ៊ុន បានចុះពិនិត្យកន្លែងផលិតនាវាកងទ័ពជើងទឹក និងបញ្ជាមន្ត្រី ឱ្យបង្កើនការត្រៀមធ្វើសង្គ្រាម។
តាមប្រភពទីភ្នាក់ងារព័ត៌មានបរទេស បានរាយការណ៍ថា ប្រធានាធិបតីកូរ៉េខាងជើង លោក គីម ជុងអ៊ុន បានចាប់ផ្តើមត្រៀមលក្ខណៈយោធាកាន់តែខ្លាំង នៅឆ្នាំនេះ ដោយប្រកាសថា កូរ៉េខាងត្បូង ជា “សត្រូវសំខាន់” របស់ប្រទេសគាត់ និងគំរាមផ្ទុះសង្រ្គាម បើកូរ៉េខាងត្បូង ហ៊ានរំលោភទឹកដី សូម្បីតែ ០.០០០១មិល្លីម៉ែត្រ។
ទីក្រុងព្យុងយ៉ាង បានធ្វើតេស្តអាវុធបន្ថែមទៀត រួមទាំងការបាញ់កាំជ្រួច Cruise ជាច្រើន ការធ្វើតេស្តប្រព័ន្ធអាវុធនុយក្លេអ៊ែរក្រោមទឹក រួមទាំងការបាញ់មីសស៊ីលផ្លោងល្បឿនលឿនជាងសំឡេង។
ក្រុមអ្នកវិភាគ បានព្រមានថា កូរ៉េខាងជើង អាចនឹងសាកល្បងកាំជ្រួច Cruise មុនពេលបញ្ជូនពួកគេទៅរុស្ស៊ី សម្រាប់ប្រើប្រាស់ក្នុងប្រទេសអ៊ុយក្រែន ដោយទីក្រុងវ៉ាស៊ីងតោន និងទីក្រុងសេអ៊ូល បានអះអាងថា លោក គីម ជុងអ៊ុន បានដឹកជញ្ជូនសព្វាវុធ ទៅកាន់ទីក្រុងមូស្គូ ទោះបីជាមានការដាក់ទណ្ឌកម្មរបស់អង្គការសហ ប្រជាជាតិ ហាមឃាត់សកម្មភាពបែបនេះក៏ដោយ។
លោកហាន ក្វុន-ហ៊ី (Han Kwon-hee) មកពីសមាគមសិក្សាឧស្សាហកម្មការពារជាតិកូរ៉េ បាននិយាយថា “កូរ៉េខាងជើង អាចកំពុងប្រើប្រាស់ការបាញ់បង្ហោះនាពេលថ្មីៗនេះ ជាមធ្យោបាយដើម្បីបង្ហាញដល់ប្រជាជនរុស្ស៊ី នូវសមត្ថភាពនៃមីសស៊ីលរបស់ពួកគេ មុនពេលបញ្ជូនពួកគេទៅកាន់ទីក្រុងម៉ូស្គូ” ។
លោកបាននិយាយបន្តថា “តម្រូវការដើម្បីធ្វើវា អាចមានលក្ខណៈស្រួចស្រាល់ ជាពិសេសដោយសាររបាយការណ៍ថ្មីៗនេះ អំពីគ្រាប់ផ្លោងរបស់កូរ៉េខាងជើង នឹងមានភាពខុសឆ្គងនៅពេលប្រើប្រាស់ដោយកងទ័ពរុស្ស៊ី”។លោកហាន ក្វុន-ហ៊ី បាននិយាយថា ទោះបីជាលោកគីម ជុងអ៊ុន បង្កើនការគំរាមកំហែងដោយវោហារសាស្ត្រប្រឆាំងនឹងកូរ៉េខាងត្បូង ក៏ដោយ ការធ្វើតេស្តសាកល្បង បូករួមទាំងការសង្ស័យថា កិច្ចព្រមព្រៀងអាវុធរុស្ស៊ី បង្ហាញពី “ឆ្កែព្រុស មិនដែលខាំ”។ ប្រសិនបើគាត់ពិតជាសង្កត់ធ្ងន់អំពីសង្រ្គាម គាត់នឹងមិនបាននិយាយទេ ប៉ុន្តែបានរក្សាទុកវានៅក្នុងទីងងឹត សម្រាប់ការវាយប្រហារដ៏គួរឱ្យភ្ញាក់ផ្អើលមួយ។ គាត់ក៏នឹងមិនលក់អាវុធទៅឲ្យរុស្ស៊ី ដែរ ប្រសិនបើគាត់ពិតជាចង់ធ្វើសង្រ្គាមជាមួយកូរ៉េខាងត្បូង។
ប្រព័ន្ធផ្សព្វផ្សាយរដ្ឋ បានផ្សាយនៅថ្ងៃសុក្រ ទី០២ ខែកុម្ភ: ឆ្នាំ២០២៤ ថា ការបាញ់បង្ហោះចុងក្រោយនេះ ធ្វើឡើងបន្ទាប់ពីលោក គីម ជុងអ៊ុន ត្រួតពិនិត្យនាវាចម្បាំងនៅឯកន្លែងផលិតកប៉ាល់កងទ័ពជើងទឹក ខណៈដែលគាត់សម្លឹងមើលការពង្រឹងកងកម្លាំងដែនសមុទ្ររបស់គាត់ដែលជាផ្នែកនៃ “ការត្រៀមធ្វើសង្គ្រាម” ។យោងតាមទីភ្នាក់ងារសារព័ត៌មានកណ្តាលកូរ៉េ បានឲ្យដឹងថា លោក គីម ជុងអ៊ុន បាននិយាយនៅឯកំពង់ផែណាមផូ (Nampho) ថា “ការពង្រឹងកម្លាំងទ័ពជើងទឹក បង្ហាញខ្លួនឯងថាជាបញ្ហាសំខាន់បំផុតក្នុងការការពារអធិបតេយ្យដែនសមុទ្រប្រកបដោយភាពជឿជាក់របស់ប្រទេស និងការបង្កើនការត្រៀមរៀបចំសង្រ្គាម នាពេលបច្ចុប្បន្ន” ។
ប្រទេសកូរ៉េខាងជើង កាលពីឆ្នាំមុន បានចាប់ផ្តើមនូវអ្វីដែលខ្លួនហៅថា “នាវាមុជទឹកវាយប្រហារនុយក្លេអ៊ែរយុទ្ធសាស្ត្រ” ដំបូងរបស់ខ្លួន ដែលយោធារបស់ទីក្រុងសេអ៊ូល នៅពេលនោះ បាននិយាយថា មើលទៅមិនដំណើរការទេ។
ក្រុមអ្នកវិភាគបាននិយាយថា នាវានេះហាក់ដូចជាត្រូវបានកែប្រែពីនាវាមុជទឹកប្រើម៉ាស៊ូត-អគ្គិសនី ដែលមានស្រាប់ ដែលត្រូវបានរចនាឡើងដំបូងក្នុងទសវត្សរ៍ឆ្នាំ១៩៥០ ហើយបានចោទជាសំណួរអំពីដែនកំណត់និងភាព ងាយរងគ្រោះរបស់វា។
តាមប្រភពទីភ្នាក់ងារព័ត៌មានបរទេស បានរាយការណ៍ថា សហរដ្ឋអាមេរិក បានដាក់ពង្រាយទាហានប្រហែល ៣០ ០០០នាក់ នៅកូរ៉េខាងត្បូង ដើម្បីជួយខ្លួនទប់ទល់នឹងការគំរាមកំហែងផ្នែកយោធាពីទីក្រុងព្យុងយ៉ាង (កូរ៉េខាងជើង)៕
