ភ្នំពេញ ៖ បុរសម្នាក់ ត្រូវសមត្ថកិច្ចឃាត់ខ្លួនបន្ទាប់ពីខឹងស្រ្តីម្នាក់ ដែលរាប់អានគ្នាជាបងប្អូនធម៌និយាយបរិហារកេរ្តិ៍តាមហ្វេសប៊ុក បង្កឲ្យមានអំពើហិង្សា រហូតយកកូនកាំបិតបម្រុងចាក់សម្លាប់ បង្កឲ្យមានការភ្ញាក់ផ្អើលកាលពីវេលាម៉ោង១០នាទីព្រឹក០៥ ខែកុម្ភះ ឆ្នាំ២០១៧ ស្ថិតនៅបន្ទប់ជួលភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ។
ស្រ្តីរងគ្រោះមានឈ្មោះមាន អ៊ឹម ស្រីម៉ៅ អាយុ៣០ឆ្នាំ ស្នាក់នៅបន្ទប់ជួលកើតហេតុខាងលើ មានស្រុកកំណើតនៅភូមិត្រពាំងស្រង៉ែ ឃុំអង្គតាសោម ស្រុកត្រាំកក់ ខេត្តតាកែវ ។ ចំណែកជនបង្កមានឈ្មោះ ឆេង លី ជាអ្នកបើកបររថយន្តរបស់ក្រុមហ៊ុន K-cement ស្នាក់នៅបន្ទប់ជួលក្បែរគ្នា មានស្រុកកំនើតស្រុកពញាក្រែកខេត្តត្បូងឃ្មុំ។
តាមសម្តីរបស់ស្រ្តីរងគ្រោះបានឲ្យដឹងថា គាត់មានប្តីបានកូន2នាក់ កូនបងអាយុ៧ឆ្នាំ កន្លងមកគាត់និងជនបង្កស្នាក់នៅបន្ទប់ជិតគ្នា និងបានរាប់អានជាបងប្អូនធម៌ជិតមួយឆ្នាំមក ហើយតែងតែទៅផឹកស៊ីដើរជាលក្ខណៈគ្រួសារជាមួយ ទើបតែកន្លងមកថ្មីៗនេះស្រាប់តែមានគំនុំអ្វីជាមួយគាត់ ។
ប្រភពដដែលបន្តទៀតថា នៅមុនពេលកើតហេតុស្រ្តីរងគ្រោះបានរើបន្ទប់ជួល គោលបំណងត្រឡប់ទៅស្រុកកំណើតវិញ ខណៈពេលកំពុងតែជូតសម្អតបន្ទប់ ស្រាប់តែលេចមុខជនបង្ក បានស្រែកឡូឡាដាក់គាត់ថា និងបានទាញអំបោសមកវាយលើរូបគាត់ទាំងកម្រោលដោយមិនដឹងមូលហេតុសោះ បន្ទាប់មកជននោះ ក៍បានទាញយកកូនកាំបិត តូចប៉ងចាក់សម្លាប់លើជនរងគ្រោះ ប៉ុន្តែបានអ្នកជិតខាងជួយទាន់ពេលវេលា ។
ក្រោយពីមានការភ្ញាក់ផ្អើលជនបង្ក បានបើករថយន្តម៉ាកវីហ្គោគេចខ្លួនទៅបាត់ព្រមទាំងបានគំរាម តាមទូរស័ព្ទថា ទោះនាងទៅដល់ទីណា ក៏តាមសម្លាប់នាងចោលដែរនិងគំរាមថា នឹងដាក់ពាក្យប្ដឹងពីបទជេរប្រមាថមើលងាយទៅលើរូបគាត់ទៀត ។
យោងតាមសំដីផ្ទាល់ស្ត្រីជនរងគ្រោះ បានអះអាងអោយដឹងថា រូបគាត់បានស្គាល់គ្នាតាមមិត្អភិត្តរយះពេលមួយឆ្នាំហើយមិនដែនមានរឿងរ៉ាវអ្វីឡើយទើបថ្ងៃកើតហេតុនេះឯង។
ក្រោយកើតហេតុស្ដ្រីរងគ្រោះបានទូរស័ព្ទទៅសុំអន្តរាគមន៍ពីកម្លាំងនគរបាលប៉ុស្ដិ៍ចោមចៅ ចុះទៅភ្លាមៗ ប៉ុន្តែជនបង្ កបានគេចខ្លួនបាត់រហូតដល់ម៉ោង៨យប់ ទើបជនបង្កបើករថយន្ត ត្រឡប់មកវិញត្រូវសមត្ថកិច្ចឃាត់ខ្លួនតែម្តង ។
ដោយឡែកបើតាមសម្តីរបស់ជនបង្កបានអះអាងថា មូលហេតុដែលឈានឲ្យមានទំនាស់ កើតឡើងដោយសារតែជនរងគ្រោះបរិហារកេរ្តិ៍រូបគាត់តាមរយៈហ្វេសប៊ុក ហើយរូបគាត់ក៏គាត់បានដាក់ពាក្យបណ្តឹងរួចហើយ និងមានបំណងហៅជនរងគ្រោះទៅប៉ុស្តិ៍ ខណៈពេល ដែលឃើញនាងកំពុងរើឥវ៉ាន់ទៅស្រុកកំណើត ស្រាប់តែស្រ្តីរងគ្រោះបានជេរប្រមាថរូបគាត់ ធ្វើឲ្យគាត់ខឹងស្ទុះទៅយកកូនកាំបិតបម្រុងចាក់សម្លាប់ស្រ្តីរងគ្រោះត្រូវបានអ្នកជិតខាងជួយ ឃាត់ ។ ជនបង្កត្រូវបានសមត្ថកិច្ចឃាត់ខ្លួន កសាងសំណុំរឿងបញ្ជូនទៅអធិការដ្ឋានខណ្ឌពោធិ៍សែនជ័យ ដើម្បីធ្វើការដោះស្រាយតាមច្បាប់ ៕ នូ ផាន់ណា