ប៉ែង អនជិរ៉ា ឡែមវិឡៃ និងណែម រណៈដេត វង្សារ៉ូត ស្នេហារីស្រស់បំព្រង

ក្រោយពេលចែកផ្លូវជាមួយលោកអនុសេនីយឯកប៉ូលិស សុង ផាន់ និងក្លាយជាអ្នកមេម៉ាយក្តៅស្រួយមួយរយៈមក ពេលនេះ ប៉ែង អនជិរ៉ា រកបានបុរសសង្ហាម្នាក់ទៀត មកស្អំដើមទ្រូងហើយ…។

បុរសថ្មីរបស់នាង គឺជាតារាសម្តែង តារាចម្រៀង និងជាតន្ត្រីករ ណែម រណៈដេត វង្សារ៉ូត។ គេជាបុរសសង្ហា និងមានមន្តស្នេហ៍ ហើយកន្លងមក គេពុំធ្លាប់មានសង្សារជាអ្នកសិល្បៈដូចគ្នាទេ។ តែនៅពេលបានអ្នកមេម៉ាយសិចស៊ី ប៉ែង អនជិរ៉ា ឡែមវិឡៃ គេក៏ប្តូរទម្លាប់ចាស់ចោល ងាកមកកសាងស្នេហ៍ក្នុងពិភពសិល្បៈជាលើកទី១។

មុននេះបន្តិច ប្រិយមិត្តក្នុងពិភពអ៊ីនធើរណេត ផ្តោតចំណាប់អារម្មណ៍ទៅលើអ្នកទាំងពីរ និងកើតមានក្តីសង្ស័យថា អ្នកទាំងពីរមានការពាក់ព័ន្ធគ្នាក្នុងរឿងស្នេហាឬអត់ បន្ទាប់ពីឃើញពួកគេទៅលេងនៅកន្លែងតែមួយ ហើយបង្ហោះរូបថតក្នុង Instagram ផ្ទាល់ខ្លួន។

មិនបាច់ឱ្យប្រិយមិត្តសង្ស័យយូរ និងមិនចាំបាច់អំពល់ឱ្យភាគីស្រីចេញមុខបំភ្លឺ លោកណែម ក្នុងឋានៈជាបុរសដើមទ្រូង៥ហត្ថ ចេញមកប្រកាសថា លោកនិងអ្នកមេម៉ាយសិចស៊ី ពិតជាបានបង្កាត់ភ្លើងស្នេហ៍ អស់រយៈពេល២ខែ ក្រោយពីបានស្គាល់គ្នារាប់ឆ្នាំ។

សម្រាប់លោកណែម អាចចាត់ទុកជាបុរសដែលច្បាស់លាស់ និងគ្មានអ្វីលាក់លៀម។ បើស្រលាញ់នរណា លោកប្រាប់ថា ស្រលាញ់។ ពេលចូលប្រឡូកក្នុងសិល្បៈថ្មីៗ លោកធ្លាប់ផ្តល់បទសម្ភាសន៍ពីរឿងមានសង្សារក្រៅរង្វង់សិល្បៈ។ លុះពេលក្លាយជាតារាល្បី និងមានសមិទ្ធផលចម្រៀងតូរ្យតន្ត្រីផង លោកក៏ក្លាយជាបុរសមានប្រជាប្រិយក្នុងចំណោមប្រិយមិត្តស្រីៗ។ ទីបំផុត លោកក៏ឡើងស៊េរីមកទាក់ទងស្ត្រីក្នុងរង្វង់សិល្បៈដូចគ្នា ហើយជាអ្នកមេម៉ាយសិចស៊ីទៀតផង។ លើកនេះក៏ដូចលើកមុន លោកគ្មានអ្វីត្រូវលាក់លៀមទេ ដោយលោកចេញមុខប្រកាសថា កំពុងទាក់ទងជាមួយប៉ែង ២ខែមកហើយ។ លោកប្រាប់ថា ស្រីស្អាតប៉ែង មានលក្ខណៈ ត្រូវតាមក្តីប្រាថ្នារបស់លោកគ្រប់យ៉ាង ពោលគឺនាងមាននេត្រាមូលក្លំធំៗ ស្បែកសម៉ដ្ឋខៃ និងមាននិស្ស័យដូចមនុស្សប្រុសដែលលោកណែម ពុំធ្លាប់បានឃើញចំពោះស្ត្រីណាពីមុនមកឡើយ។ នេះជាមូលហេតុធ្វើឱ្យលោកផ្តើមស្នេហ៍ជាមួយអ្នកសិល្បៈដូចគ្នា ជាលើកដំបូងក្នុងជីវិត។

សម្រាប់ជីវិតស្នេហាអ្នកមេម៉ាយសិចស៊ី ប៉ែង អនជិរ៉ា វិញ នាងធ្លាប់រលកព្យុះស្នេហាច្រើនលើកមកហើយ ដោយមានទាំងបុរសក្នុង និងក្រៅ វិស័យសិល្បៈចម្រុះគ្នា។ មុននេះ នាងធ្លាប់មានគូជីវិតជាអនុសេនីយឯកប៉ូលិស ឈ្មោះ សុង ផាន់ តែក៏ត្រូវចែកផ្លូវគ្នា កាលពីថ្ងៃទី២៥ ខែមីនា ឆ្នាំ២០១៥ បន្ទាប់ពី អ្នកទាំងពីរឆ្លងកាត់ជីវិតអាពាហ៍ពិពាហ៍បាន៣ឆ្នាំ។

នាងហាក់មិនឈឺចាប់ខ្លាំងក្នុងការចែកផ្លូវជាមួយស្វាមីទេ ព្រោះគេឃើញនាងត្រឡប់ចូលមកក្នុងពិភពសិល្បៈវិញភ្លាមៗ ហើយថតម៉ូដលួចបង្ហាញរូបសម្រស់សិចស៊ី គួរឱ្យក្នាញ់។ ស្នេហាគ្រានោះ ត្រូវបញ្ចប់ តែជីវិតរបស់នាងត្រូវបន្តដំណើរទៅមុខទៀត។ នេះជាសច្ចធម៌ជីវិត ហើយទីបំផុ តនាងក៏គោចរមកជួបបុរសសង្ហា ណែម ដែលធ្វើឱ្យបេះដូងនាងរីកស្រស់បំព្រងម្តងទៀត។

ពេលនេះសាធារណជនដឹងថា ប៉ែង មានស្នេហាទៀតហើយ តែគ្មានអ្នកណា រួមទាំងអ្នកសារព័ត៌មានផង ហ៊ានកំណត់ថា នេះជាស្នេហ៍ចុងក្រោយសម្រាប់នារីសិចស៊ីម្នាក់នេះឡើយ៕