ភ្នំពេញ៖នៅក្នុងពិភពសិល្បៈតារាប្រុសស្រីជាច្រើនតែងតែចង់ឲ្យខ្លួនមានការទាក់ទាញថែមទៀតតាមរយៈការជ្រើសវិធីកែកុនសម្រស់ដោយតារាស្រីៗនិយមជ្រើសវិធីកែពង្រីកដើមទ្រូងឲ្យទ្រលុកទ្រលន់ដើម្បីមើលទៅឲ្យកាន់តែស្រស់ស្អាត កែច្រមុះ និងចាក់ចង្កា ជាដើម ។ដោយឡែកសម្រាប់ស្រីស្រស់តូចតន់នាងតន់ ច័ន្ទសីម៉ា វិញកាលពីចុងឆ្នាំ២០២១ នាងបានសារភាពថាបានកែសម្រស់ដល់ទៅ៣កន្លែងគឺធ្វើច្រមុះ ,ចាក់ចង្កា និងពត់ធ្មេញ ប៉ុន្ដែរយៈពេលជាង២ឆ្នាំមកនេះគ្មានដំណឹងថាច័ន្ទសីម៉ា កែសម្រស់ត្រង់ចំណុចដែលតារាស្រីៗភាគច្រើននិយមជាងគេគឺការពង្រីកដើមទ្រូងនោះឡើយ ។ប្រភពបានឲ្យដឹងថានាងសីម៉ា ខ្លាចមានបញ្ហាធំដោយសារតែរឿងកែសម្រស់នេះទើបនាងលែងហ៊ានកែផ្នែកផ្សេងៗទៀតដើម្បីឲ្យគេមើលទៅកាន់តែក្នក់ក្នាញ់ ព្រោះខ្លាចកែខុសខាតដើម ។
តន់ ច័ន្ទសីម៉ា មិនលើកទូរស័ព្ទឡើយកាលពីពេលថ្មីៗនេះទើបមិនអាចសុំការបំភ្លឺពីនាងទាក់ទងរឿងការកែ សម្រស់នេះបានទេ ។ប៉ុន្ដែគេកត់សម្គាល់ថាសម្រស់អតីតអ្នកស្មូតជាប់លេខ១នៅខេត្តតាកែវរូបនេះគឺប្រែប្រួលទៅតាមទឹកលុយពោលគឺកាលនាងច្រៀងនៅហាងវីហ្វេ្រននាពេលរាត្រីដែលបានតម្លៃ១យប់តែជាង១០ដុល្លារនោះគេឃើញនាងនៅស្បែកខ្មៅស្រអែម និងមិនចេះលេងខ្លួនស្បែកឡើងសខ្ចីដូចពេលនេះឡើយ ។យ៉ាងណាមិនមែនតែនាងច័ន្ទសីម៉ា ម្នាក់ទេសដែលUpdate សម្រស់ទៅតាមទឹកលុយនេះគឺតារាផ្សេងៗទៀតក៍ជ្រើសវិធីដូចនាងដែរដោយខ្លះបានកែលើសពី៣ចំណុចដែលនាងធ្វើនេះទៀតផង គ្រាន់តែពួកគេមិនសារភាពប៉ុណ្ណោះ ។
តន់ ច័ន្ទសីម៉ា បានឡើងកូដ១ប្រាវកាលពីឆ្នាំ២០២០-២០២១ តែនៅឆ្នាំ២០២២-២០២៣ នាងបានចុះខ្សោយទៅវិញបន្ដិចព្រោះមិនសូវមានបទល្បីនិងផ្ទុះខ្លាំងដូចមុន និងជាពិសេសគឺនាងបានចេញមុខយ៉ាងសកម្មការពារថៅកែរបស់ខ្លួនទើបមានភាពចម្រូងចម្រាសជាមួយFan រហូតអ្នកខ្លះព្រមានធ្វើពហិការ លែងស្ដាប់បទចម្រៀងរបស់នាងទៀតផង ។តែនៅឆ្នាំ២០២៤ នេះច័ន្ទសីម៉ា បានប្ដូរយុទ្ធសាស្រ្ដថ្មីលែងសូវចេញមុខការពារថៅកែដូចមុនទៀត ហើយនាងបានវិលទៅច្រៀងជាមួយដៃគូចាស់លោកខេម វិញបន្ទាប់ពីនាងជាប់ដៃជាមួយលោកព្រាប សុវត្ថិ និងខេមរៈ សិរីមន្ដ ។
អ្នកជំនាញសិល្បៈលើកឡើងថា៣ឆ្នាំចុងក្រោយនេះនាងតន់ ច័ន្ទសីម៉ា ជាតារាស្រីវ័យក្មេងដែលមានដៃគូល្អជាងតារាស្រីផ្សេងៗទៀតព្រោះព្រាប សុវត្ថិ ,ខេមរៈ សិរីមន្ដ និងខេម នៅតែជាដៃគូតែម្នាក់របស់នាងដដែល ដរាបណាGalaxy បោះបង់ចោលការតាមទិញពេជ្រ សោភា និងមាស សុខសោភា មកប្រជែងនាង។តែតារាវ័យ២៦ឆ្នាំដែលច្រៀងស្ទីលខាត់ សុឃីម ពោលគឺច្រៀងកន្ទ្រឹមទៅសម្លេងស្រដៀងគ្នានោះ អាចនឹងធ្លាក់ចុះទៅវិញភ្លាមប្រសិនបើផលិតកម្មមួយនេះទិញតារាស្រីល្បីរូបណាចូលមកចាប់ដៃតារាប្រុសទាំង៣ខាងលើ ហេតុនេះតំណែងតួឯករបស់នាងក៍ប្រឈមហានិភ័យខ្ពស់ផងដែរ ។ប៉ុន្ដែនាងច័ន្ទសីម៉ា ធ្លាប់ចេញសារដោយត្រៀមខ្លួនរួចជាស្រេចថានៅលើលោកនេះគ្មានអ្វីថិតថេរទេ ហើយ១០ឆ្នាំខាងមុខទៀតមិនដឹងជាមានរឿងអីកើតឡើងឡើយ ។
គួរបញ្ជាក់ថាទោះជានាងតន់ ច័ន្ទសីម៉ា បានកែកុនសម្រស់ដល់ទៅ៣កន្លែងហើយធ្វើឲ្យនាងស្រស់ស្អាតជាងមុនក្ដី តែគ្រប់ពេលវេលានាងតែងតែថ្ងូរថាអត់សង្សារ ឬតូចចិត្ត រកតែ១បណ្ដើរដូចគេអត់បាន …។ការវាចាបែបនេះក្រោយមានដំណឹងថាអតីតបេក្ខភាពThe Voice Cambodia រដូវកាលទី២នេះដែលធ្លាប់មានដំណឹងថាលោកឧកញ៉ាពោះម៉ាយម្នាក់តាមស្នេហ៍ស្និតជាច្រើនខែនោះពេលនេះឧកញ៉ាបែជាទៅផ្សារភ្ជាប់ស្នេហ៍ជាមួយពោះម៉ាយទ្រព្យស្ដុកម្នាក់ទៅវិញ ។តែនាងសីម៉ា ដែលល្បីល្បាញនិងមានរូបសម្រស់ស្អាតប៉ុណ្ណឹងដែរនោះគេជឿរថានាងមិនខ្វះប្រុសៗចង់ធ្វើជាម្ចាស់ចិត្តនាងឡើយ ហេតុនេះការវាចាថារកតែក្ដឹបសង្សារ១ធ្វើថ្នាំមិនបាននោះគ្រាន់តែជាDrama ប៉ុណ្ណោះ ។
តន់ ច័ន្ទសីម៉ា ស្ថិតក្នុងចំណោមតារាដែលសាងស្នេហាដោយមិនបើកចំហនៅឆ្នាំ២០២៤ នេះមានដូចជានាងសុខ សោម៉ាវត្តី ,ថន លក្ខិណា,រ៉េត ស៊ូហ្សាណា ,សឹម ស្រីនិច្ច និងសុខ ពិសី ជាដើម ៕