សហរដ្ឋអាមេរិក ៖ អ្នកប្រដាល់ទម្ងន់ធ្ងន់ ម៉ៃ ថៃសាន់ (Mike Tyson) អាយុ ៥៧ឆ្នាំ បានទទួលការសង្គ្រោះបន្ទាន់ផ្នែកវេជ្ជសាស្ត្រភ្លាមៗ ក្នុងអំឡុងពេលហោះហើរពីទីក្រុងម៉ៃអាមី (Miami) ទៅកាន់ទីក្រុងឡូសអែនចេឡេស (Los Angeles) កាលពីថ្ងៃអាទិត្យ ទី២៦ ខែឧសភា ឆ្នាំ២០២៤ មុនពេល ២ខែ ដែលគាត់ត្រូវឡើងសង្វៀនប្រកួតជាមួយកីឡាករប្រដាល់ ជែក ប៉ូល (Jake Paul) ។
អ្នកតំណាងរបស់ម៉ៃ ថៃសាន់ បានបញ្ជាក់ថា អំឡុងពេលធ្វើដំណើតតាមយន្តហោះ ទៅកាន់ទីក្រុងឡូសអែនចេឡេស ម៉ៃ ថៃសាន់ មានអារម្មណ៍ចង្អោរ និងវិលមុខ ហើយអ្នកដំណើរបានសួរថា តើមានគ្រូពេទ្យនៅលើយន្តហោះដែរឬទេ មុនពេលគ្រូពេទ្យប្រញាប់មកពិនិត្យអាការរបស់កីឡាករប្រដាល់នេះ។ អាការរបស់គាត់ រួមមាន ចង្អោរ និងក្អួត ហើមពោះ ក្រហាយទ្រូង ឈឺទ្រូង និងអស់កម្លាំង។
អតីតម្ចាស់ខ្សែក្រវាត់ទម្ងន់ធ្ងន់អាយុ ៥៧ ឆ្នាំរូបនេះ ក្អួតចង្អោរ និងវិលមុខ ដោយបង្ខំឱ្យបុគ្គលិកជើងហោះហើរសួរអ្នកដំណើរថាតើមានគ្រូពេទ្យនៅលើយន្តហោះផ្តល់ជំនួយដែរឬទេ។
ក្រុមគ្រូពេទ្យបានឡើងយន្តហោះ ដែលពន្យារពេលពីរម៉ោងក្នុងទីក្រុងម៉ៃអាមី ដោយសារតែកំដៅ នៅពេលដែលវាបានចុះមកក្នុងទីក្រុង Los Angeles ដើម្បីផ្តល់ការព្យាបាល។
ករណីនេះបានកើតឡើងតែពីរខែប៉ុណ្ណោះ មុនពេលដែលអ្នកប្រដាល់ជើងចាស់នេះ នឹងត្រូវប្រកួតជាមួយកីឡាករ ជែក ប៉ូល (Jake Paul) នៅអារលីងតុន ( Arlington) ។
អ្នកតំណាងរបស់ម៉ៃ ថៃសាន់ បានប្រាប់កាសែត The New York Post ថា “អរគុណដែលលោក ម៉ៃ ថៃសាន់ ធ្វើបានល្អណាស់” ។
អ្នកបម្រើការលើយន្តហោះ បាននិយាយ «ពួកគេបានសុំឱ្យពួកយើងនៅលើយន្តហោះ ចុះចតដើម្បីឱ្យគ្រូពេទ្យអាចមកព្យាបាលបាន។ គាត់គឺជាអ្នកដំណើរដ៏សំខាន់ម្នាក់ ដូច្នេះយើងចង់ធ្វើឱ្យប្រាកដថា គាត់មិនអីទេ។ ខ្ញុំដឹងថាវាគឺជាគាត់ ប៉ុន្តែខ្ញុំគ្រាន់តែនិយាយពាក្យ “ម៉ៃ ថៃសាន់” ហើយគាត់ងក់ក្បាលរបស់គាត់។
នៅពេលដែលយន្តហោះបានចុះចតនៅ LAX មានការពន្យារពេលប្រហែល ២៥នាទី ខណៈពេលដែលក្រុមគ្រូពេទ្យបានព្យាបាលម៉ៃ ថៃសាន់ ។
ម៉ៃ ថៃសាន់ ដែលធ្លាប់បានសារភាពថា ខ្លួនបានប្រើប្រាស់កញ្ឆា ជារៀងរាល់ថ្ងៃនោះ បានបោះបង់ចោលរុក្ខជាតិនេះ ខណៈពេលដែលកំពុងហ្វឹកហាត់ដើម្បីត្រៀមប្រកួតជាមួយ ជែក ប៉ូល ព្រោះវាស្ថិតនៅក្នុងបញ្ជីនៃសារធាតុហាមឃាត់ដែលប្រើប្រាស់ដោយនាយកដ្ឋានអាជ្ញាប័ណ្ណ និងបទប្បញ្ញត្តិនៃរដ្ឋតិចសាស់។ គាត់ក៏បានបង្ហាញដែរថា គាត់បានផ្អាកការរួមភេទ ជាបណ្ដោះអាសន្នផងដែរក្នុងអំឡុងពេលហ្វឹកដើម្បីឡើងសង្វៀនប្រកួតឡើងវិញជាថ្មីនេះ។ ប៉ុន្តែគាត់នៅតែជាអ្នកតស៊ូមតិដ៏រឹងមាំសម្រាប់អត្ថប្រយោជន៍ឱសថនៃកញ្ឆា សម្រាប់សុខុមាលភាពផ្ទាល់ខ្លួនរបស់គាត់ និងអ្នកដទៃ។
គួរបញ្ជាក់ថា កីឡាករប្រដាល់ទម្ងន់ធ្ងន់ ម៉ៃ ថៃសាន់ ដែលធ្លាប់ល្បីខាំស្លឹកត្រចៀកគូប្រកួត ហូលីហ្វៀល នេះ បានចូលនិវត្តន៍ពីវិស័យកីគាប្រដាល់ ក្នុងឆ្នាំ២០០៥ ប៉ុន្តែថ្មីៗនេះ លោកបានបានប្រកួតនៅក្នុងការតាំងពិព័រណ៌មួយ ក្នុងខែវិច្ឆិកា ឆ្នាំ២០២០0 ជាមួយកីឡាករ រ៉យ ចូនស៍ (Roy Jones) នៅរដ្ឋកាលីហ្វ័រញ៉ា។ នៅថ្ងៃទី២០ ខែកក្កដា ឆ្នាំ២០២៤ ខាងមុខនេះ បើគ្មានអ្វីប្រែប្រួលទេ ម៉ៃ ថៃសាន់ នឹងឡើងសង្វៀនប្រកួតជាមួយកីឡាករវ័យក្មេង ជែក ប៉ូល ។
ចំពោះប្រវត្តិក្នុងវិស័យប្រដាល់ ម៉ៃ ថៃសាន់ ធ្លាប់បានឈ្នះការប្រកួត ចំនួន ៥០ដង ជាមួយនិងការផ្តួលដៃគូឱ្យសន្លប់ ចំនួន ៤៤ដង មុនពេលចូលនិវត្តន៍៕
