ភ្នំពេញ៖ស្រីស្រស់ម៉ិច ខេមម៉ា បានដកខ្លួនចេញពីការប្រកួតMiss Grand Cambodia 2024 យ៉ាងគួរឲ្យភ្ញាក់ផ្អើលកាលពីចុងខែ១ ឆ្នាំ២០២៤ ធ្វើឲ្យមានការសង្ស័យថាស្រីស្អាតរូបនេះត្រូវគូស្នេហ៍ដាក់សម្ពាធទើបនាងបោះបង់ការស្រម៉ៃគ្រងមកុដកណ្ដាលផ្លូវបែបនេះ ។ការលេចឭបែបនេះដោយសារតែនាងខេមម៉ា ជាតារាដែលមានរូបសម្រស់លេចធ្លោនាពេលបច្ចុប្បន្នទើបនាំឲ្យប្រុសៗមិនតិចនាក់ទេចង់ប្រជែងគ្នាដណ្ដើមបេះដូងនាង។
ក្នុងជំនួបតាមទូរស័ព្ទកាលពីរសៀលថ្ងៃទី១៨ មិថុនា នាងខេមម៉ា ថានាងគ្មានបានរងសម្ពាធពីអ្នកណាទាំងអស់ ប៉ុន្ដែនោះជាការសម្រេចចិត្តរបស់នាងដោយសារតែនាងគ្មានពេលវេលាគ្រប់គ្រាន់ឲ្យខាងអ្នករៀបចំកម្មវិធី។នាងថាឪពុកម្ដាយនាងមិនដែលប្រឆាំងនាងលេងសិល្បៈនោះទេ ហើយនាងក៍គ្មានសម្ពាធពីគូស្នេហ៍ដែរ ព្រោះពេលនេះអត់សង្សារ ពោលគឺអ្វីៗកើតឡើងដោយការសម្រេចចិត្តរបស់នាងប៉ុណ្ណោះ គឺនាងស្រលាញ់ចូលចិត្តធ្វើជាតារាម៉ូដែល ,ថតស្ពត និងសំអាងការ ជាដើម ហេតុនេះអាជីពសម្ដែងនាងមិនចង់ចាប់ជាអាជីពទេ ព្រោះនាងមិនសូវចេះសម្ដែងដូចគេ ហើយកន្លងមកមានខាងផលិតកម្មបានទាក់ទងហៅនាងថតភាពយន្ដជាហូហែរ តែនាងមិនទទួលគឺព្រោះតែនាងមិនសូវជំនាញខាងសម្ដែង និងអត់មានពេលគ្រប់គ្រាន់ឲ្យខាងផលិតកម្មនេះតែម្ដង។
ថ្វីត្បិតតែនាងម៉ិច ខេមម៉ា ថានាងមិនសូវប៉ិនប្រសព្វខាងសម្ដែង ពោលគឺលេងហាក់ឆ្គងៗមែន ប៉ុន្ដែកាលពីខែ៤នាងបានថតMV បទខេមរៈ សិរីមន្ដ “មហាសង្រ្កាន្ដឆ្នាំថ្មី “និងថ្មីៗនេះនាងបានថតបទឲ្យតារាGalaxy រូបនេះ១បទទៀតនោះគឺបទ”គួរទៅខេត្តណា ទើបអាចភ្លេចអូនបាន?” ដែលការសម្ដែងរបស់នាងមិនចាញ់តារាសម្ដែងអាជីពឡើយ។
ស្រីស្អាតខេមម៉ា បន្ថែមថានាងបានថតបទលោកខេមរៈ សិរីមន្ដ ព្រោះការសម្ដែងMV ទាំងនោះមិនជាឧបស័គ្គនោះទេ ដោយគ្រាន់តែប្រើកាយវិការ និងទឹកមុខ ខុសពីថតភាពយន្ដពិបាកជាងថតខារ៉ាអូខេ។នាងថាក៍មានតារាផ្សេងៗទៀតបានហៅនាងថតបទថ្មីៗដែរតែនាងមិនទាន់ទទួល ព្រោះតែមិនពូកែសម្ដែងហ្នឹងតែម្ដង។
ម៉ិច ខេមម៉ា ធ្លាប់ប្រកួតMiss Cambodia 2016 ហើយក៍ជាបេក្ខភាពលេចធ្លោម្នាក់ក្នុងកម្មវិធីMiss Grand Cambodia 2024 ផងដែរ តែនាងបានសម្រេចចិត្តរត់ចោលការប្រជែងសម្រស់មួយនេះកណ្ដាលទី ហើយរយៈពេលជាង៥ខែ បន្ទាប់ពីចាកចេញពីការប្រកួតនោះពេលនេះនាងខេមម៉ា ថានាងមិនទាន់ត្រៀមខ្លួនចូលប្រកួតកម្មវិធីថ្មីណាផ្សេងទៀតទេ ។
ឆ្លើយតបសំណួរថាបើនាងខេមម៉ា លែងចង់ប្រកួតបវរកញ្ញា ហើយមិនចាប់អាជីពសម្ដែងពេញទំហ៊ឹងបែបនេះ តើនាងអាចនឹងឈានទៅធ្វើជាMC អាជីពបានឬអត់នោះនាងថាការងារនោះក៍នាងមិនដែលចង់ធ្វើជាអាជីពបានទេ ព្រោះនាងក៍មិនមែនជាអ្នកពូកែនិយាយ ហេតុនេះមិនមែនស្រួលឡើយ ។នាងថានៅឆ្នាំ២០២៤ នេះការងារដែលនាងផ្ដោតគឺមានតែថតសម្អាងការ និងជាតារាម៉ូដែលម្នាក់ប៉ុណ្ណោះ ។
ម៉ិច ខេមម៉ា បានប្រឡូកអាជីពសិល្បៈរយៈពេលជាង៥ឆ្នាំមកហើយ និងបច្ចុប្បន្ននាងស្ថិតក្នុងចំណោមតារាដែលមានរូបសម្រស់ស្អាតផូផង់ដូចគ្នាទៅនិងនាងឆឹង ច័ន្ទមុនីរស្មី ,សឹម ស្រីនិច្ច និងនែប ព្រំរិទ្ធិកា ជាដើម ។តារាម៉ូដែលស្រស់សោភា រូបនេះមិនដែលបណ្ដើរប្រុសណាជាចំហបែបគូស្នេហ៍ឡើយ ហេតុនេះគេចាំមើលថាប្រុសណាទៅអាចយកបានបេះដូងនាង?