ភ្នំពេញ៖អ្នកនាងយុគ ចិន្ដា បានរៀបចំធ្វើខួបកំណើតឲ្យកូនស្រីសំណព្វចិត្តរបស់នាងកញ្ញាយុគ ដាពេជ្រ ហៅស្រីអម អាយុ១៩ឆ្នាំ កាលពីថ្ងៃទី១៦ មិថុនា នៅភោជនីយដ្ឋានចងចាំ ឡោញ ដែលជាហាងរបស់អ្នកនាងផ្ទាល់តែម្ដង ស្ថិតនៅម្ដុំវិមានឯករាជ្យ ។ប្រភពបានឲ្យដឹងថាគូស្នេហ៍របស់អ្នកនាងចិន្ដា ក៍បានដើរតួនាទីដូចជាឪពុកបង្កើតរបស់ស្រីអម ដែរក្នុងការចាត់ចែងពិធីខួបកំណើតនោះ ទើបធ្វើឲ្យពិធីការិនីជើងចាស់របស់CTN រូបនេះកក់ក្ដៅក្នុងចិត្តកាន់តែខ្លាំង ។
អ្នកនាងយុគ ចិន្ដា ថ្លែងថា”រីករាយថ្ងៃខួបកំណើតកូនស្រីម្ដាយតែមួយលើលោក ។ជូនពរកូនស្រីមានសុខភាពល្អ បំពេញតួនាទីជាកូនស្រីដ៍ល្អ សម្រាប់ម៉ាក់និងគ្រួសារណា ។ក្រមុំមួយឆ្នាំទៀតហើយណាកូន សំណាងល្អរហូតណា ថៅកែអម”។
យ៉ាងណានៅមិនទាន់ដឹងច្បាស់ពីការចំណាយទាំងមូលលើជប់លៀងកូនស្រីពេញវ័យក្រមុំរបស់អ្នកនាងយុគ ចិន្ដា នៅឆ្នាំនេះឡើយ ប៉ុន្ដែតាមព័តមានថាទាំងអ្នកនាងចិន្ដា និងកូនស្រីរីករាយខ្លាំងណាស់ ។
លោកជីមមី ជំនួយការរបស់អ្នកនាងយុគ ចិន្ដា បានប្រាប់អ្នកយកព័តមាន”នគរធំ “តាមទូរស័ព្ទកាលពីរសៀលថ្ងៃទី១៩ ថាឆ្នាំនេះមេស្រី របស់លោកធ្វើខួបឲ្យកូនធំជាងឆ្នាំមុនៗ តែភ្ញៀវដែលអញ្ជើញឲ្យចូលរួមគឺមានតែអ្នកជិតដិតបំផុតប៉ុណ្ណោះ ។ជំនួយការរបស់អ្នកនាងចិន្ដា ថាសម្រាប់អ្នកសិល្បៈមេរបស់លោកហៅតែអ្នកនាងគង់ សុជាតិ ម្នាក់ទេឲ្យចូលរួម ក្រៅពីនេះសុទ្ធតែអ្នករាប់អានគ្នាស្និតស្នាលហើយសរុបទាំងអស់ភ្ញៀវមានចំនួន១០០នាក់(១០តុ)ឯណ្ណោះ ។លោកបន្ថែមថាស្រីអម មិនដែលធ្វើខួបធំដូចឆ្នាំនេះឡើយ ។
អ្នកនាងយុគ ចិន្ដា មានកូនស្រីតែម្នាក់គត់ ហើយពេលនេះនាងពេញវ័យក្រមុំស្ដូកទៅហើយ តែអ្នកណាជាឪពុករបស់ក្មេងស្រីនេះនៅតែជាអាថ័កំបាំងដដែល ព្រោះអ្នកនាងចិន្ដា មិនដែលនិយាយឬបំភ្លឺចំពោះរឿងរ៉ាវមួយនេះម្ដងណាឡើយ ។អ្នកនាងចិន្ដា ក៍ធ្លាប់ជម្រុញកូនស្រីឲ្យចូលសិល្បៈដែរតាមរយៈការធ្វើMC នៅកម្មវិធីតូចៗហើយនាងឈរមើល និងប្រាប់ពីចំណុចខ្វះខាតរបស់កូនស្រីដើម្បីឲ្យនាងឆាប់ចាប់បានចំណុចល្អៗពីម្ដាយ។ស្រីអម កាលនៅវ័យជំទង់នាងធ្លាប់រៀនផ្នែកព្យាណូ និងច្រៀងផងដែរ តែគេមិនដែលឃើញនាងចូលប្រលងចម្រៀងកម្មវិធីធំៗណាមួយដើម្បីមានឱកាសក្លាយទៅជាតារាចម្រៀងអាជីពនោះទេ ខណៈដែលអ្នកបម្រើការនៅCtn ថាអ្នកនាងចិន្ដា អាចនឹងរុញកូនស្រីឲ្យស្នងតំណែងនាងសម្រាប់អាជីពMC នាពេលដែលនាងមានអាយុច្រើនជាងនេះ ។
លោកជីមមី បានប្រាប់ទាក់ទងរឿងនេះថាបច្ចុប្បន្នស្រីអម មិនផ្ដោតលើការហ្វិកហាត់ធ្វើពិធីការិនីនោះទេ ព្រោះនាងជាប់រៀបនៅមហាវិទ្យាល័យមួយ ផ្នែកBusiness ឆ្នាំទី២ អីចឹងរវល់លើការរៀនសូត្រច្រើនជាងចង់ធ្វើMC ។ជំនួយការរូបនេះបន្ថែមទៀតថាអ្នកនាងចិន្ដា បានជ្រើសរើសសាលាល្អឲ្យកូនស្រីរៀនគឺ១ឆ្នាំចំណាយដល់ទៅខ្ទង់៥ទៅ៦ពាន់ដុល្លារឯណ្ណោះ ។
យុគ ចិន្ដា ត្រូវបានគេចាត់ទុកថាជាតារាមានទ្រព្យច្រើនដូចគ្នាទៅនិងព្រាប សុវត្ថិ ,ចា រិទ្ធី ,ខាត់ សុឃីម និងកែវ ស្រីនាង ជាដើម ប៉ុន្ដែនាងមិនដែលអួតអាងពីទ្រព្យទាំងនោះឲ្យគេដឹងឡើយ ។តាមព័តមានថាក្រៅពីមានភោជនីយដ្ឋាន នាងមានផ្ទះ និងបន្ទប់ជួល រួមទាំងដីជួលសម្រាប់សាងសង់Resort នៅខេត្តកោះកុងផងដែរ ។ពិធីការិនីជើងចាស់រូបនេះបច្ចុប្បន្នរស់នៅវីឡារនៅបុរីអង្គរភ្នំពេញ(គម្រោងទី២) ស្ថិតនៅសង្កាត់ឃ្មួញ ខ័ណ្ឌសែនសុខ រាជធានីភ្នំពេញ ជាមួយគូស្នេហ៍នាងដែលគេស្គាល់ថាជាមន្រ្ដីសុរិយោដីម្នាក់ ។យ៉ាងណាក្រោយអាកខានមង្គលការកាលពីខែមីនា ឆ្នាំ២០២០ អ្នកនាងចិន្ដា មិនទាន់កំណត់ពីពេលវេលារៀបការច្បាស់លាស់ជាថ្មីនោះទេ ខណៈដែលនាងធ្លាប់ប្រាប់អ្នកយកព័តមានយើងថាពេលកូនស្រីរបស់នាងពេញវ័យនាងនឹងរៀបការហើយពេលនោះឲ្យកូនធ្វើជាអ្នកកំដរនាងតែម្ដង។ប៉ុន្ដែពេលនេះស្រីអម អាយុគម្រប់១៩ឆ្នាំ ទៅហើយបែជាស្ងាត់រឿងអ្នកនាងចិន្ដា ដឹកដៃគូស្នេហ៍ចូលរោងការទៅវិញ ៕
