ភ្នំពេញ៖ក្នុងចំណោមតារាប្រុសល្បីៗនាពេលបច្ចុប្បន្នលោកឆាយ វីរៈយុទ្ធ មានឪក្មេកជាអ្នករកស៊ីធំម្នាក់ដែលល្បីឈ្មោះក្នុងការធ្វើជំនួញនៅខេត្តកំពង់ចាម ដែលអ្នករកស៊ីជាច្រើនបានស្គាល់លោកពិសេសគឺថ្មីៗនេះលោកហាក់ សែ បានធ្វើពិធីឡើងផ្ទះវីឡារស្កឹស្កៃ ផ្អើលក្រុងកំពង់ចាមទៀតផង។ចំណែកលោកវីរៈយុទ្ធ វិញកាលពីថ្ងៃទី២២ មិថុនា លោកបានដឹកដៃឪពុកម្ដាយ និងភរិយាលោកគ្រងឈុតបុរាណចូលរួមពិធីឡើងផ្ទះវីឡាររបស់ឪពុកក្មេកលោកហាក់ សែ និងម្ដាយក្មេកលោកស្រីគៀង ចិន្ដា នៅស្រុកជើងព្រៃ(ស្គន់)ខេត្តកំពង់ចាម។ប្រភពបានឲ្យដឹងថាឪក្មេកលោកវីរៈយុទ្ធ មានមុខជំនួញជាច្រើនក្នុងដៃ ហើយលោកក៍មានផ្ទះជាច្រើនកន្លែងផងដែរ ពោលគឺប្រៀបបានជាសេដ្ឋីនៅក្រុងកំពង់ចាម ហេតុនេះគេជឿរថាលោកឆោម នឹងដើរតាមគន្លងលោកហាក់ សែ ជាមិនខានតាមរយៈការពង្រឹងមុខជំនួញនាថ្ងៃអនាគតបន្ថែមពីលើអាជីពសិល្បៈ ខណៈដែលកាលពីឆ្នាំ២០២១ លោកបានបើកមន្ទីព្យាបាលកុមារដំរី និងហាងលក់អង្ករមានយីហោ”ស្ដេចអង្ករ” រួមទាំងរកស៊ីផ្នែកអចលនទ្រព្យដំណើរការរហូតមកដល់បច្ចុប្បន្នផងដែរ បើទោះជាវិស័យដីធ្លីពេលនេះហាក់នៅទ្រឹងក្ដី ។ប្រភពបានឲ្យដឹងថាលោកវីរៈយុទ្ធ នៅតែចង់ពង្រឹងអាជីពសិល្បៈថែមទៀត ទោះជាពេលនេះលោកមានឪពុកម្ដាយក្មេកជាអ្នកមានទ្រព្យស្ដុកស្ដមហើយពួកគាត់ចង់ឲ្យកូនប្រសាររូបនេះដើរតាមផ្លូវលោកតាមរយៈការធ្វើជំនួញធំក្ដី ។
ក្រៅពីលោកឆាយ វីរៈយុទ្ធ តារាដែលមានឪពុកម្ដាយក្មេកជាអ្នកមានទ្រព្យស្ដុកមានដូចជាលោកនី រតនា និងកែវ វាសនា ជាដើម ប៉ុន្ដែពួកគេនៅតែបន្ដអាជីពចម្រៀងដដែល ។សម្រាប់លោកចាន់ឆោម វិញក្រោយចាប់ដៃអ្នកនាងសែ ចាន់ឌី ជាង៧ឆ្នាំពេលនេះទទួលបានចំណងដៃកូនស្រី២នាក់គឺកូនទី១ឈ្មោះវីរៈយុទ្ធ អភិជាតារាទេវី ហៅAtara អាយុជាង៤ឆ្នាំ និងកូនទី២ឈ្មោះវីរៈយុទ្ធ អមរាទេវី ហៅAlinna អាយុជាង២ខែ ។លោកវីរៈយុទ្ធ ថាលោកនឹងយកកូនទី៣នៅពេលណាដែលគម្លាតអាយុកូនទី២បានច្រើនឆ្នាំបន្ដិច ដែលតាមព័តមានថាលោកចង់បានកូនប្រុស។
គួរបញ្ជាក់ថាលោកឆាយ វីរៈយុទ្ធ ជាតារាស្នូលរបស់សាន់ដេ ហើយក្រៅពីផលិតកម្មទម្លាក់បទឲ្យច្រៀងនោះភរិយាលោកក៍ជាអ្នកនិពន្ធបទចម្រៀងល្បីៗជាច្រើនបទឲ្យលោកច្រៀងផងដែរ ។ប្រភពបានឲ្យដឹងថាលោកវីរៈយុទ្ធ ជាមុខសញ្ញារបស់ផលិតកម្មរស្មីហង្សមាសជាច្រើនឆ្នាំមកហើយ ពិសេសជាង៣ឆ្នាំចុងក្រោយនេះបន្ទាប់ ពីព្រាប សុវត្ថិ និងខេមរៈ សិរីមន្ដ ដើរចេញពីផលិតកម្មធំនោះព្រមគ្នាលោកចាន់ឆោម កាន់តែមានភាគរយខ្ពស់ក្នុងការទៅជំនួសតារាល្បីទាំង២។ប៉ុន្ដែក្នុងជំនួបតាមទូរស័ព្ទកាលពីពេលថ្មីៗលោកវីរៈយុទ្ធ ថាលោកនៅតែជាតារារបស់សាន់ដេដដែល។ចំណែកអតីតតារាហង្សមាសលោកនូ ស៊ឹប ប្រាប់អ្នកយកព័តយើងថាលោកវីរៈយុទ្ធ មានសម្លេងល្អ ហេតុនេះមិនមែនតែហង្សមាសទេ ផលិតកម្មណាក៍ចង់បានដែរ ។
លោកឆាយ ចាន់ឆោម ហៅឆាយ វីរៈយុទ្ធ ជាអ្នកចម្រៀងម្នាក់ដែលមានសម្ថភាពអាចច្រៀងបានទាំងការឡើងតុងខ្ពស់បំផុត ហើយទម្លាក់មកច្រៀងទាបបំផុតក៍បាន ដែលតារាចម្រៀងផ្សេងទៀតពិបាកធ្វើបានដូចលោក។តារាកូន២រូបនេះដូចគ្នាទៅនិងលោកព្រាប សុវត្ថិ ,ខេមរៈ សិរីមន្ដ និងខេម ជាដើម ពោលគឺភរិយាលោកជាជំ នួយការឲ្យប្ដីតែម្ដង ហេតុនេះហើយបានជាលោកឆោម តែងតែសរសើរពីគុណសម្បត្តិរបស់ប្រពន្ធហើយថាពេលខ្លះលោកស្ដាប់ភរិយាច្រើនទាក់ទងការងារសិល្បៈ ។តែរយៈពេលចុងក្រោយនេះគេមិនទាន់ឃើញលោកវីរៈយុទ្ធ ចេញបទផ្ទុះខ្លាំងដូចមុនទេ ដោយពេលខ្លះលោកបានយកបទល្បីចាស់ៗមកកែច្នៃជាភ្លេងថ្មីទៀតផង ។ មហាជនរងចាំមើលថាតើលោកឆាយ ចាន់ឆោម នឹងទៅហង្សមាស ដើម្បីជំនួសព្រាប សុវត្ថិ និងខេមរៈ សិរីមន្ដ ឬសុខចិត្តនៅក្រាញសាន់ដេបន្ដទៀត ?
