ភ្នំពេញ៖តារាចម្រៀងលោកសុខ វិបុល ហៅStep ត្រូវបានគេមើលឃើញថាលោកតុបតែងមុខ ម៉ូដសក់ និងការស្លៀកពាក់យកតាមស្ទីលរបស់តារាកូរ៉េលោកRain អតីតតួលី យ៉ុងចេ រហូតមានអ្នកខ្លះរិះគន់ប្អូនប្រុសលោកសុខ សេរីវឌ្ឍនា រូបនេះថាCopy ស្ទីលពីលោកRain ទៀតផង បើទោះជាក្រុមគ្រួសារតារាចម្រៀងរូបនេះធ្លាប់អះអាងថាលោកវិបុល មានត្រេមុខពីតាមធម្មជាតិ មិនបានព្យាយាមតែងខ្លួនឲ្យដូចតារាកូរ៉េល្បីឈ្មោះរូបនោះក្ដី ។អ្វីដែលគួរឲ្យកត់សម្គាល់គេឃើញដៃគូចម្រៀងថ្មីរបស់លោកStep គឺនាងSk ក៍មានការតុបតែងខ្លួនស្រដៀង គ្នាទៅនិងតារាស្រីកូរ៉េល្បីឈ្មោះរបស់សមាជិកក្រុមBlackpink នោះគឺស្រីស្អាតកំពូលសម្រស់នាងJisoo ដែរ ហេតុនេះហើយបានជាមានការលើកឡើងថាទាំងStep និងនាងSk លេងខ្លួនដូចតារាកូរ៉េ ទាំងគូរតែម្ដង។ទោះជាយ៉ាងណាមានការសរសើរថាលោកវិបុល ទោះជាមើលទៅលោកមានគ្រាប់ភ្នែករាងតូចៗនិងលិបបន្ដិច មែន តែភ្នែកលោកមុតណាស់ ព្រោះរកបានដៃគូជាស្រីស្អាតនាងSk នេះសម្រស់ពិតជាគួរឲ្យទាក់ទាញខ្លាំង ។
អ្នកយកព័តមានយើងបានព្យាយាមទាក់ទងទៅលោកStep និងនាងSk ដើម្បីចង់ដឹងពីមូលហេតុដែលពួកគេចូលចិត្តលេងខ្លួនតាមតារាកូរ៉េ ប៉ុន្ដែទាំង២នាក់តេមិនចូលដូចគ្នាកាលពីរសៀលថ្ងៃទី៥ កក្កដា បើទោះជាលេខរបស់ពួកគេមាននៅលើផេកហ្វេសបុកដូចគ្នាក្ដី ។អ្វីដែលគួរឲ្យចាប់អារម្មណ៍នោះលោកStep ដែលឡើងកូដ មួយប្រាវពេលចាប់ដៃជាមួយពេជ្រ សោភា នោះពេលនេះលោកបានព្យាយាមលើកសង្សាររបស់ខ្លួនឲ្យបានល្បីឈ្មោះតាមរយៈការច្រៀងសម្ដែងរួមគ្នាជាមួយនាងSk ហើយភាគច្រើនបទស្រីស្អាតម្នាក់នេះច្រៀងគឺលោកជាអ្នកនៅពីក្រោយខ្នង។ប៉ុន្ដែអ្នកជំនាញសិល្បៈបានលើកឡើងថាទាំងលោកStep និងនាងSk គឺលេងសម្រស់ជាងសម្លេង ហេតុនេះហើយគេមិនដឹងថាFan របស់តារាទាំងពីរចូលចិត្តការច្រៀងរបស់ពួកគេ ឬចង់ឃើញការតែងខ្លួនរបស់តារាគូស្នេហ៍រូបនេះជាង?
គួរបញ្ជាក់ថាលោកStep ធ្លាប់ច្រៀងនៅហង្សមាសជាច្រើនឆ្នាំ តែពេលនេះលោកត្រូវបានថៅកែរុញឲ្យទៅ ច្រៀងនៅGenMusic ដែលជាសាខារបស់ផលិតកម្មធំនេះហើយលោកចាប់ដៃជាមួយនាងSk នាំឲ្យពួកគេបង្កាត់ទាំងភ្លើងស្នេហានៅក្រៅឆាកជាមួយគ្នាទៀតផង បន្ទាប់ពីលោកវិបុល ប្រកាសសារភាពស្នេហ៍នាងSk ជាសាធារណៈនៅលើឆាកតន្រ្ដីមួយ ។ប្រភពបានឲ្យដឹងថាថៅកែហង្សមាសក៍គ្រោងរុញនាងSK ឲ្យធ្វើជាតួឯកក្នុងភាពយន្ដដូចនាងរ៉េត ស៊ូហ្សាណា ដែរ ព្រោះថាសម្រស់នាងមិនចាញ់នាងហ្សាណា នោះទេ ។ប៉ុន្ដែស្រីស្អាតរូបនេះហាក់ខ្សត់ព័តមាននៅលើបណ្ដាញសង្គម ព្រោះនាងមិនធ្លាប់សម្ភាសន៍ជាមួយអ្នកកាសែតឡើយ ហេតុនេះហើយទើបគេពិបាកសន្និដ្ឋានបានថាតើនាងចេញមកធ្វើជាតារាចម្រៀងនាពេលនេះបានតែមួយប្រាវក៍បាត់ទៅវិញ ឬមួយក៍អាចអុកឡុកទីផ្សារចម្រៀង នៅហង្សមាសដែលធ្វើឲ្យតារាស្រីរៀមច្បងល្បីៗនៅផលិតកម្មមួយនេះរង្គោះរង្គើរតំណែងបានដោយសារតែការមកដល់របស់នាង ?
ក្រៅពីលោកStep និងនាងSk តារាដែលជ្រើសដៃគូស្នេហាធ្វើជាដៃគូលើឆាកដែរមានដូចជាលោកងួន ចាន់ដេវីត -ទេព បូព្រឹក្ស , ស៊ិន សុភា- គង់ច័ន្ទរដ្ឋា និងសយ រតនៈ -ប៉ាច គីមមួយ ជាដើម ។តែតារាដែលលេងស្ទីល ដូចតារាកូរ៉េ នោះគឺមានតែលោកStep និងនាងSK ប៉ុណ្ណោះ ។ជាមួយគ្នានេះដែរ អ្នកលេងបណ្ដាញសង្គមចាំមើលថាតើលោកវិបុល អាចនាំនាងSK ឲ្យល្បីឈ្មោះបានដែរ ឬទេ ព្រោះថារូបលោកផ្ទាល់តាំងពីផ្អាកចាប់ដៃ គូជាមួយពេជ្រ សោភា មកក៍មិនសូវមានសកម្មភាពសិល្បៈគួរឲ្យចាប់អារម្មណ៍ដូចមុនដែរ ។ដោយឡែកអ្នកជំនាញសិល្បៈបានលើកឡើងថាប្រសិនបើនាងSK អាចអុកឡុកទីផ្សារចម្រៀងនៅហង្សមាសមែននោះនឹងធ្វើឲ្យនាងរ៉េត ស៊ូហ្សាណា ដែលលេងសម្រស់ដូចនាងដែរ ប្រាកដជាពិបាករក្សារតំណែងជាមិនខាន ៕
