តូក្យូ (ជប៉ុន) ៖ ការប្រកួត K-1 World Max 2024 នៅទីក្រុងតូក្យូ ប្រទេសជប៉ុន កាលពីថ្ងៃទី០៧ ខែកក្កដា ឆ្នាំ២០២៤ កីឡាករស្តេចប្រដាល់ថៃ បួខាវ បាន់ឆាមេក បានឡើងសង្វៀនជួបកីឡាករប៊ុលហ្គារី ស្តូយ៉ាន កូព្រីវឡិន ស្គី (Stoyan Koprivlensky) ក្នុងទម្ងន់ ៧០គីឡូ ដោយលទ្ធផលនៃការប្រកួតគឺបួខាវ ត្រូវកីឡាករប៊ុលហ្គារី ទាត់ចំមុខ ១ជើង បាត់ជំហរ ហើយត្រូវបានអាជ្ញាកណ្តាលរាប់ដល់៨ ក្នុងទឹកទី២ ត្រូវធ្លាក់ពីការប្រកួត មិនអាចបន្តទៅដណ្តើមជើងឯកបានទេ។
![](https://norkorthom.com/wp-content/uploads/2024/07/z2-7.jpg)
នៅទីបំផុត ក្រោយការប្រកួតបាន ៣ទឹក អាជ្ញាកណ្តាលប្រកាសលទ្ធផល ឱ្យស្តូយ៉ាន កូព្រីវឡិនស្គី ជាអ្នកឈ្នះពិន្ទុ។
ក្រោយពេលចាញ់ក្នុងការប្រកួតជុំទី១នោះ បួរខាវ បានបង្ហោះសារក្នុងទំព័របណ្តាញសង្គម ហ្វេសប៊ុក របស់ខ្លួន ទទួលស្គាល់ថា ខ្លួនពិតជាចាញ់ អត់មានលេសទេ ដោយត្រូវអាជ្ញាកណ្តាល់រាប់ ១ដង ព្រមាន ៣ដង ដកពិន្ទុ ហើយចៅក្រមទាំង៣ បានផ្តល់ពិន្ទុឲ្យកីឡាករប៊ុលហ្គារី ឈ្នះជាឯកច្ឆន្ទ គឺ : 30/28 30/27 30/28 ។
![](https://norkorthom.com/wp-content/uploads/2024/07/z5-4.jpg)
មនុស្សភាគច្រើន បានផ្តល់យោបល់លើកទឹកចិត្ត បួខាវ ថាការឈ្នះនិងចាញ់ ក្នុងកីឡា គឺជារឿងធម្មតា។ ប៉ុន្តែបួខាវ បានបើកចិត្តសុំទោសប្រជាជនថៃ ដោយទទួលស្គាល់កំហុសរបស់ខ្លួន ដែលធ្វើមិនបានល្អ មិនអាចដណ្តើមជើងឯកពិភពលោកបាន ក្នុងការប្រកួតប្រដាល់ K-1 World Max 2024 នៅទីក្រុងតូក្យូ ។
យ៉ាងណា អ្នកប្រដាល់ថៃ អាយុ៤២ឆ្នាំ រូបនេះ ជាអតីតជើងឯក ២សម័យកាល ឆ្នាំ២០០៤ និង២០០៦ នៃការប្រកួត K-1 World Max នេះ ។
![](https://norkorthom.com/wp-content/uploads/2024/07/z3-2.jpg)
សូមបញ្ជាក់ថា ការប្រកួត K-1 World Max 2024 នៅទីក្រុងតូក្យូ ប្រទេសជប៉ុន ជាទម្រង់នៃការប្រកួតប្រ ដាល់បែបម៉ារ៉ាតុង ដោយប្រកួតក្នុងមួយថ្ងៃ ឈ្នះ ៣ដង នឹងឈ្នះជើងឯក ដោយក្នុងមួយទឹក គឺ៣នាទី និងសម្រាក ១នាទី ។
![](https://norkorthom.com/wp-content/uploads/2024/07/z6-4.jpg)
តាមប្រភពបណ្តាញព័ត៌មានថៃ បានបញ្ជាក់ថា តម្លៃខ្លួណរបស់បួខាវ ក្នុងការប្រកួតមួយជុំ (១លើក) ទទួលបានចំនួន ១០លានបាត ដូច្នេះប្រសិនបើបួខាវ ប្រកួតឈ្នះ បានឡើងដល់ជុំចុងក្រោយ ឈ្នះពានជើងឯក គេនឹងទទួលបានប្រាក់ឧបត្ថម្ភយ៉ាងតិច ៣០លានបាត។ ប៉ុន្តែក្តីស្រមៃ របស់បួខាវ បានរលាយអស់ក្រោមកណ្តាប់ដៃ និងថ្វីជើងរបស់កីឡាករប៊ុលហ្គារី ត្រឹមការប្រកួតជុំទី១ប៉ុណ្ណោះ៕ ខៀវទុំ
![](https://norkorthom.com/wp-content/uploads/2024/07/c1-24.jpg)