Wednesday, July 17, 2024
Homeតារាខ្មែរសារ៉ាយ សក្ខណា ៖ត្រៀមសម្រាលកូនទី៣

សារ៉ាយ សក្ខណា ៖ត្រៀមសម្រាលកូនទី៣

ភ្នំពេញ៖សារ៉ាយ សក្ខណា បានពពោះកូនទី៣ ជាង៤ខែមកហើយ តែនាងនៅបន្ដការងារ​សិ​ល្បៈជាហូហែរ និងអាចឈានចូលដល់ជាង៦ខែទើបសម្រាកពីអាជីពចាស់ ។ការយកកូន​ថែម​របស់សក្ខណា នេះជាបំណងដ៍ធំ​មួយ​​​របស់នាងដែលបានសម្រេចនៅឆ្នាំរោង ប៉ុន្ដែមិន​បាន​ដូចចិត្តទាំងស្រុងនោះទេ ព្រោះនាងចង់បានកូនភ្លោះ ដើម្បីកុំឲ្យពិបាកបង្កើតច្រើនដង តែ​ឥឡូវបានម្ដងតែមួយសិនប៉ុណ្ណោះ ។សក្ខណា ធ្លាប់និយាយប្រាប់អ្នកយក​ព័តមានយើងថានាង​មាន​កូន២នាក់(ស្រី១) ហើយអីចឹងបើអត់បានកូនទៀតគឺអត់បញ្ហាទេ ប៉ុន្ដែបើជ្រុលជាមាន​ហើយ ចិត្តនាងចង់បានម្ដងពីរ(កូនភ្លោះ) ។ឥឡូវសក្ខណា បានកូនថែមទៀតមែន តែមិនបាន​២​នោះទេ គឺបានតែ១ ប៉ុណ្ណោះ ដែលតាមគម្រោងនាងត្រូវសម្រាលចុងឆ្នាំ២០២៤ ឬដើមឆ្នាំ​២០២៥ ខាងមុខ ហើយពេលនោះនាងនឹងបានកូនសរុបទាំងអស់ចំនួន​៣នាក់។តែសម្រាប់​កូន​ទី៣ នេះសក្ខណា មិនទាន់ប្រាប់ថាជាកូនប្រុសឬស្រី​ឡើយ ។

គួរបញ្ជាក់ថាសារ៉ាយ សក្ខណា បានចេញទៅរស់នៅតាមប្ដីនាងជាអាណិកជន​ខ្មែរអា​មេរិកលោកមេធាវីប៊ុន កែវមេត្រី រយៈពេលជាង១០ឆ្នាំមកហើយ តែនាងបានចុះឡើងមកខ្មែរ​ជាញឹកញាប់ ព្រោះមានហាងកែសម្ផស្សដ៍ធំមួយនៅខណ្ឌទួលគោក។ការមកលើកនេះ​សក្ខ​ណា នៅខ្មែរបានយូជាងសព្វដង ព្រោះជាង១ឆ្នាំហើយនាងមិនទាន់វិលទៅវិញ ហើយ​ស្រាប់​តែស្ងាត់ៗបានកាដូធំគឺកូនទី៣ តែម្ដង។ប៉ុន្ដែតាមព័តមានថាសក្ខណា នឹងហោះទៅ​សម្រា​ល​កូននៅអាមេរិកនាពេលខាងមុខនេះ ដើម្បីឲ្យកូននាងកើតមកភ្លាមបានសញ្ជាតិអាមេរិកភ្លែត ដូច​កូន​មុនៗ បើទោះជាកូនទី១ និងកូនទី២ កំពុងរស់នៅខ្មែរនិងរៀនភាសារខ្មែរក្ដី ។

សូមរំលឹកថាសារ៉ាយ សក្ខណា បានរៀបការកាលពីថ្ងៃទី១២ ខែធ្នូ ឆ្នាំ២០១៣ ដោយ​មានកូនស្រីឈ្មោះMataysia អាយុជាង៨ឆ្នាំ  និងកូនប្រុសឈ្មោះព្រីនស្ទីន អាយុជា៣ឆ្នាំ តែ​នាង​នៅតែអាចបន្ដអាជីពសិល្បៈដូចកាលនៅក្រមុំដដែល អំឡុងពេលដែលចុះមកខ្មែរ តាម​រយៈ​ការ​ថតភាពយន្ដ ខារ៉ាអូខេ និងស្ពតជាដើម ព្រោះស្វាមីនាងបើកចិត្តយ៉ាងទូលាយសម្រាប់​រូបនាង​​ក្នុងការលេងសិល្បៈ។សក្ខណា ទោះជាមានប្ដីនិងកូន៣មែន តែមុនមានផ្ទៃពោះនាង​រក្សារ​បានរាងស្វែល មិនឡើងគីឡូជ្រុល និងអត់សូវបែកសាច់ទេ ទើបធ្វើឲ្យនាងនៅតែ​មាន​ទីផ្សារសិល្បៈ ។តែក្រោយសម្រាលកូនទី៣ គេជឿរថាសក្ខណា អាចនឹងដកខ្លួនពីសិល្បៈ​ស្ទើតែទាំងស្រុង ព្រោះបើនាងវិលវិញគឺអាចអ្នកដឹកនាំរឿងតម្រូវឲ្យនាងលេង​ជាតួម្ដាយដូច​ឌុច សុភា ជាមិនខាន ។យ៉ាងណាការមានកូន៣នាក់ នឹងធ្វើឲ្យសក្ខណា មានសុ​ភមង្គល​រឹត​តែខ្លាំងជាមិនខាន ហើយពេលនេះនាងមានមុខជំនួញផ្ទាល់ខ្លួន ហេតុនេះទោះជានាងលែង​ថត ហើយមកបើកផលិតកម្ម ធ្វើថៅកែខ្លួនឯងក៍អាចទៅរួចដែរ ។

 ក្រៅពីសារ៉ាយ សក្ខណា តារាដែលយកស្វាមីជាអាណិកជនខ្មែរនៅអាមេរិក​មានដូចជា​អ្នកនាងអម្ពរ ទេវី ,គឹម លក្ខិណា ,វ៉េត រតនា ,សុគន្ធ និសា និងខៀវ សុខារ៉ាវី ជាដើម ហើយក្នុង​ចំណោម​តារាខាងលើពេលនេះមានតែសក្ខណា និងសុគន្ធ និសា ប៉ុណ្ណោះដែលនាំប្ដី​មករស់​នៅ​ខ្មែរ ហើយខ្លួនបន្ដអាជីពចាស់ ។សក្ខណា ធ្លាប់ប្រាប់ថាមូលហេតុដែលនាងនាំកូនៗ​មក​រស់នៅខ្មែរ ព្រោះតែចង់ឲ្យពួកគេរៀនភាសារខ្មែរឲ្យស្ទាត់សិន ព្រោះបើនៅបរទេសតែកូន​អត់ចេះខ្មែរនោះនាងនឹងពិបាកឲ្យកូនស្គាល់ពីអ្វីជាខ្មែរ ។ប៉ុន្ដែទាក់ទងមុខ​ជំនួញផ្នែក​Cosmetic នោះនាងថាគ្មានគម្រោងពង្រីកសាខានោះទេ គឺប្រឹងតែរក្សារ​សាខាទី១ឲ្យនៅ​ដំ​ណើរ​ការល្អ​តែប៉ុណ្ណោះ ។សក្ខណា ក៍ចង់បណ្ដុះកូនស្រីច្បងរបស់នាងឲ្យលេងសិល្បៈ​បន្ដវេន​ពីរូបនាងដែរ តែនាងថាមិនបង្ខំកូនទេ ពោលគឺឲ្យគេធ្វើអ្វីទៅតាមឆន្ទៈរបស់គេ ហើយនាង​ជម្រុញ​ពីក្រោយ ។

 គេចាំមើលថាក្រោយបានកូនទី៣ សារ៉ាយ សក្ខណា នៅតែប៉ងតាមយកកូន​ភ្លោះម្ដង​ទៀត ឬយ៉ាងណា  ខណៈដែលអ្នកនាងគង់ សុជាតិ ,នៅ​ សុនិតា និងលី ម៉ារីណា ជាដើមពួក​គេ​សុទ្ធតែចង់បានកូនភ្លោះដែរ តែពេលនេះគ្មានអ្នកណា១បានសម្រេចបង្កើត​កូនម្ដងបាន២​ ដូចប្រពន្ធលោកនី រតនា អ្នកនាងហេង សុវណ្ណភក្ដិណា ដែលសម្រាលកូនភ្លោះ​កាលពីថ្ងៃទី​៣០ ខែមករា ឆ្នាំ២០២៤ នោះឡើយ ៕

RELATED ARTICLES