ខ្សែប្រយុទ្ធបារាំង គីលីយ៉ាន អឹមបាប់ប៉េ (Kylian Mbappe) បានលើកឡើងនៅថ្ងៃទី១៦ ខែកក្កដា ឆ្នាំ២០២៤ថា លោកមានការជឿជាក់ខ្លាំងណាស់ថា ថ្ងៃណាមួយ នឹងបានលេងឱ្យក្លឹប Real Madrid ដែលជាសុបិនរបស់ខ្លួនតាំងពីកុមារ ហើយនោះជាហេតុផលដែលធ្វើឱ្យលោកចាប់ផ្តើមរៀនភាសាអេស្ប៉ាញ។
![](https://norkorthom.com/wp-content/uploads/2024/07/c7-13.jpg)
យោងតាមសារព័ត៌មាន CNA ចេញផ្សាយនៅថ្ងៃទី១៧ ខែកក្កដា ឆ្នាំ២០២៤ Mbappe បានលើកឡើងនៅកីឡដ្ឋាន Bernabeu ថា «តាំងពីខ្ញុំនៅក្មេង ខ្ញុំបានដឹងពីគោលដៅរបស់ខ្ញុំ គឺលេងឱ្យក្លឹប Real Madrid»។សមាជិកឈ្នះពានរង្វាន់ World Cup ឆ្នាំ២០១៨ រូបនេះ បានធ្វើឱ្យអ្នកសារព័ត៌មាន មានភាពភ្ញាក់ផ្អើល ដោយការនិយាយភាសាអេស្ប៉ាញ បានយ៉ាងល្អ ដោយលោកបានរៀននៅសាលា ហើយក្រោយមកបានបន្តអនុវត្តភាសាជាមួយនឹងការនិយាយជាមួយអ្នកចាត់ការសញ្ជាតិអេស្ប៉ាញ ដូចជាលោក Luis Enrique និងលោក Mauricio Pochettino នៅក្លឹប Paris Saint Germain ដោយសារតែលោកបានដឹងថា លោកនឹងត្រូវប្រើ ប្រាស់នៅថ្ងៃណាមួយ នៅក្លឹបក្នុងក្តីសុបិនរបស់លោក។
![](https://norkorthom.com/wp-content/uploads/2024/07/c1-66.jpg)
កីឡាករជម្រើសជាតិបារាំង រូបនេះ និយាយថា «ខ្ញុំមិនមែនជាសិស្សពូកែបំផុតនៅសាលារៀននោះទេ ប៉ុន្តែខ្ញុំមានក្តីសុបិននេះ គឺការលេងនៅក្លឹប Real Madrid ហើយខ្ញុំដឹងថា ការនិយាយភាសា នឹងអាចជួយខ្ញុំឱ្យសម្រប ខ្លួនបាន»។
![](https://norkorthom.com/wp-content/uploads/2024/07/c4-28.jpg)
Real Madrid បានប្រកាសកាលពីខែមិថុនា ឆ្នាំ២០២៤ ថា Mbappe បានចូលរួមជាមួយក្លឹប នៅលីគ La Liga ជាមួយនឹងការផ្ទេរដោយឥតបង់ថ្លៃ លើកិច្ចសន្យារយៈពេល ៥ឆ្នាំ បិទបញ្ចប់នូវព័ត៌មាននៃការផ្ទេរដែលមានពាក្យចចាមអារ៉ាម អស់រយៈពេលជាច្រើនឆ្នាំ។
![](https://norkorthom.com/wp-content/uploads/2024/07/c3-43.jpg)
គួរបញ្ជាក់ថា Mbappe វ័យ២៥ឆ្នាំ ចូលរួមជាមួយក្លឹប Madrid ដែលមានតារាបាល់ទាត់មួយចំនួនរួចទៅហើយ ដូចជា Vinicius Jr. និង Jude Bellingham ស្ថិតក្រោមការដឹកនាំដោយអ្នកចាត់ការ Ancelotti ជាគ្រូបង្វឹកមានជោគជ័យបំផុតក្នុងប្រវត្តិសាស្ត្រ Champions League ដោយដណ្តើមបានពានរង្វាន់លីគនេះ បានចំនួន៥លើកមកហើយ៕
![](https://norkorthom.com/wp-content/uploads/2024/07/c5-17.jpg)
![](https://norkorthom.com/wp-content/uploads/2024/07/c8-7.jpg)
![](https://norkorthom.com/wp-content/uploads/2024/07/c2-54.jpg)