ភ្នំពេញ៖បើទោះជាមិនទាន់ក្លាយទៅជាប្ដីប្រពន្ធគ្នាស្របច្បាប់ក្ដី ប៉ុន្ដែតារាចម្រៀងឃីន ស្រីនាថ ហៅអ៊ីវ៉ា ចិត្ត១ថ្លើម១និងគ្នាទៅហើយ ព្រោះថ្មីៗនេះនៅក្នុងមុខរបរOnline របស់អ៊ីវ៉ា ដែលនាងលក់សម្លៀកបំពាក់ជាប្រចាំទាំងមានទីតាំងហាងផ្ទាល់នៅខេត្តកំពង់ស្ពឺ និងLive តាមហ្វេសបុកនោះស្រីនាថ បានប្រកាសអ្នកទិញអ៊ឺវ៉ាន់ នាងអាចផ្ញើរលុយឲ្យនាងតាមរយៈការបាញ់ទៅកុងធនាគារនាងដោយផ្ទាល់ក៍បាន ទៅអាខោនរបស់លោកលី សេងហួរ ក៍បានដែលនេះបញ្ជាក់ថាអ្នកទាំងពីរកំពុងតែបោះទុនរកស៊ីរួមគ្នាមុនពេលពួកគេដឹកដៃគ្នារៀបការ។ការបង្ហាញនូវការសន្សំលុយរួមគ្នានេះដោយសារតែពួកគេមានទំនុកចិត្តគ្នាខ្លាំងណាស់ ហើយមិនត្រឹមតែដាក់លុយរកស៊ីចូលគ្នានោះទេ ប៉ុន្ដែសូម្បីតែរថយន្ដម៉ាកFord Everest Titanium 4 x 4 ដែលអ៊ីវ៉ា កំពុងជិះរាល់ថ្ងៃនេះក៍មានដាក់អក្សរជាស្លាកឈ្មោះរួមគ្នារវាងនាងនិងគូស្នេហ៍ដែរនោះគឺកម្ពុជាNH.LSH .9 ។ពិតណាស់សកម្ម ភាពរបស់អ៊ីវ៉ា បែបនេះបញ្ជាក់ថា នាងនិងថៅកែច្បាស់លាស់និងគ្នា១០០ % ទៅហើយ បើទោះជាមកដល់ពេលនេះថ្ងៃរៀបការរបស់ពួកគេមិនទាន់បានកំណត់ច្បាស់លាស់ក្ដី ។
អ៊ីវ៉ា បានភ្ជាប់ស្នេហ៍ជាមួយលោកលី សេងហួរ ជាម្ចាស់ក្លិបបាល់ទាត់សៀមរាប យូណាយធីត កាលពី២០១៦ តែចំណងស្នេហាមួយនេះទើបបែកធ្លាយជាសាធារណៈកាលពីពាក់កណ្ដាលឆ្នាំ២០២៣ បន្ទាប់ពីមានព័តមានថាពួកគេបានភ្ជាប់ពាក្យជាមួយគ្នាស្ងាត់ៗ ។ប្រភពបានឲ្យដឹងថាអនាគតឪពុកម្ដាយក្មេករបស់អ៊ីវ៉ា ជាអ្នកមានទ្រព្យស្ដុកស្ដមនៅខេត្តសៀមរាបហើយពួកគាត់ពេញចិត្តតារាចម្រៀងរូបនេះឲ្យក្លាយជាកូនប្រសាររបស់គាត់តាមរយៈការរៀបការតាមប្រពៃណីខ្មែរ ដែលចំណុចនេះលោកអ៊ូ វ៉ាវ ឪពុករបស់អ៊ីវ៉ា ចង់បានបំផុត។ប៉ុន្ដែការលើកមង្គលការនៅដើមឆ្នាំ២០២៤ នេះដោយសារតែរឿងម្យាងគត់នោះគឺស្រីនាថ ខ្លាចការប្ដីទៅនាងលែងមានទីផ្សារចម្រៀmងទើបធ្វើឲ្យលោកវ៉ាវ មិនសប្បាយចិត្ត ខណៈដែលលី សេងហួរ វិញក៍មិនចង់ពន្យាពេលរៀបការតទៅទៀតដែរ ព្រោះតែការស្វែងយល់ចិត្តគ្នាជិត៨ឆ្នាំមកនេះពួកគេចុះសម្រុងគ្នាល្អណាស់ និងមិនមានភាគីខាងណាប្រ ឆាំងរឿងស្នេហាមួយនេះទេ ។
ប្រភពបានឲ្យដឹងថាក្រៅពីគាំទ្រមុខរបរOnline របស់អ៊ីវ៉ា ដែលមានភាគហ៊ុនលោកដែរនោះលោកលី សេងហួរ ក៍កំពុងសម្លឹងមើលមុខរបរផ្សេងទៀត ឲ្យតែស្រីនាថ ចង់រកស៊ីអ្វីមួយច្បាស់លាស់លោកមិនរារែកក្នុងការចូលទុនឡើយ ។អ្វីដែលស្រីនាថ កាន់តែមានភាពកក់ក្ដៅនោះគឺលោកថៅកែវ័យក្មេងរូបនេះថែមទាំងមិនចេះប្រណ្ឌនាងផ្ដែសផ្ដាសនោះទេ ពោលគឺលោកបើកដៃឲ្យនាងលេងសិល្បៈដោយសេរី មិនដែលដើរតាមនាងដល់ឆាកតន្រ្ដីដូចប្ដីតារាខ្លះទេ ប៉ុន្ដែលោកហួរ តែងតែតាមដានរាល់សកម្មភាពច្រៀងសម្ដែងរបស់គូស្នេហ៍ដូចជាលោកត្រូវតែដឹងថាថ្ងៃនេះអ៊ីវ៉ា ទៅច្រៀងនៅកម្មវិធីអី ខេត្តណា និងទៅដល់ផ្ទះនៅម៉ោងប៉ុន្មានជាដើម ដែលនេះជាការយកចិត្តទុកដាក់មិនមែនហួងហែងនាងឡើយ ។
គួររំលឹកថាអ៊ីវ៉ា អាយុ៣០ឆ្នាំធ្លាប់ខកចិត្តម្ដងរួចទៅហើយ ព្រោះកាលពីឆ្នាំ២០១០-២០១៣ នាងត្រូវប្អូនប្រុសលោកផ្កាយ៣ម្នាក់ឈ្មោះៗ”ប” ដែលជាថៅកែក្លឹប និងហាងបញ្ចាំនៅក្រុងសៀមរាប បានតាមប្រម៉ាញ់ស្នេហ៍នាងរហូតចង់ដឹកដៃស្រីស្រស់រូបនេះរៀបការទៀតផង។តែអ៊ីវ៉ា មិនពេញចិត្តប្អូនមន្រ្ដីធំរូបនោះទេ ព្រោះលោកពូកែប្រចណ្ឌ និងហួងហែងនាងជ្រុលពេក ដូចជាមិនអនុញ្ញាត្តិឲ្យនាងថតMV កៀកកើយជាមួយតារាប្រុសរូបណា និងហាមរាំបទញាក់លើឆាកជាដើម ពោលគឺអនុញ្ញាត្តិឲ្យតែច្រៀងរាំបទស្លូវ ទើបធ្វើឲ្យស្រីនាថ មិនព្រមផ្សះផ្សារស្នេហ៍ តែនាងលេងមួយក្បាច់ដាក់ថៅកែវិញនោះគឺការភ្ជាប់ស្នេហ៍ថ្មីជាមួយបុរសនៅខេត្តសៀមរាប ម្ដងទៀត ។
អ៊ីវ៉ា ធ្លាប់ប្រាប់អ្នកយកព័តមានយើងថាមនុស្សស្រីរៀបការនៅអាយុ៣០ឆ្នាំ គឺសាកសមបំផុត ព្រោះមិនក្មេងពេក មិនចាស់ពេក ហើយនាងក៍ចង់រៀបការនៅអាយុប៉ុណ្ណេះដែរ ។ប៉ុន្ដែពេលនេះដល់ពេលត្រូវចូលរោងការស្រីនាថ បែជារារែកចិត្តអត់ចង់គ្រងឈុតកូនក្រមុំមែនទែន នៅឆ្នាំ២០២៤ នេះទៅវិញ ។គេចាំមើលថាតើអ៊ីវ៉ា គេចការប្ដីបានប៉ុន្មានឆ្នាំទៀត ព្រោះពេលនេះទាំងឪពុកនាងលោកអ៊ូ វ៉ាវ និងអនាគតស្វាមីនាងលោកលី សេងហួរ មិនចង់ឲ្យនាងលើកពេលរៀបការម្ដងទៀតទេ ៕
