ភ្នំពេញ៖នាដការីរបាំបុរាណសុខគា គីមលាង ហៅkon Ant ឬកូនស្រមោច បានឈានជើងចូលថតភាពយន្ដរឿងដុំជាលើកដំបូងរបស់ខ្លួន ឲ្យផលិតកម្មLD បន្ទាប់ពីនាងបានខកខានថតរឿងជាច្រើនមកហើយ ព្រោះតែរវល់ពេកគ្មានពេលវេលាគ្រប់គ្រាន់ ប៉ុន្ដែចាប់ពីពេលនេះតទៅនាងថានឹងចំណាយពេលលើការថតទាំងភាពយន្ដដុំ និងរឿងភាគ។ប៉ុន្ដែគេចាំបានថាកញ្ញាគីមលាង ប្រកាន់ជំហរ មិនថតស៊ិចស៊ី ឬលេងឈុតស្នេហានោះទេ ហេតុនេះតើនាងអាចគេចឈុតនេះរួចដោយរៀបណាទៅ ព្រោះតារាស្រីភាពយន្ដជាច្រើនពិតជាពិបាករំលងឈុតនេះខ្លាំងណាស់ ។
កញ្ញាដ៍ស្រស់សោភាសុខគា គីមលាង បានប្រាប់”នគរធំ” កាលពីថ្ងៃទីថ្ងៃទី១៨ កក្កដា ថារឿងថ្មីដែលនាងលេងនោះគ្មានឈុតស្នេហា ឬត្រូវស្លៀកពាក់ឈុតស៊ិចស៊ីឡើយ ខណៈការចំណាយថតរឿងមួយនេះមានរយៈពេល១ខែ នាងលេងជាតួអង្គមួយដែលបង្ហាញពីក្ដីស្រលាញ់ក្នុងគ្រួសារមួយ។នាងបន្ថែមថាបើមានឈុតស្នេហាក៍នាងសុំគិតមើលសិនដែរ ព្រោះក្នុងនាមជានាដការីរបាំបុរាណម្នាក់នាងនៅតែរក្សារគោលដំហរខ្លួនដូចដើម ។
ស្រីស្រស់គីមលាង វាចា ថា”ខ្ញុំមិនស៊ិចស៊ីទេ ប៉ុន្ដែទាន់សម័យ ហើយមុននឹងលេងរឿងនេះបើមានប៉ះឈុតទាំងនោះក៍ខ្ញុំសុំពេលពិចារណាសិនហើយ! “។
សុខគា គីមលាង បង្ហើបថាក្រៅពីថតរឿងដុំនាងក៍ចាប់ផ្ដើមសម្លឹងមើលការថតរឿងភាគផងដែរ ហើយនាងបានអរគុណដល់ផលិតករភាពយន្ដដែលកន្លងមកចាប់អារម្មណ៍ និងចង់បាននាងសម្ដែងភាពយន្ដ តែពីមុននាងគ្មានពេលវេលាគ្រប់គ្រាន់ តែពេលនេះនាងចាប់ផ្ដើមបែងចែកពេលវេលា ព្រោះនាងចង់ថតកុនដើម្បីទុកជាឯកសារស្នាដៃខ្លួនទៅថ្ងៃក្រោយ ។
តាមព័តមានថាកញ្ញាសុខគា គីមលាង ជាមុខសញ្ញានៃក្រុមផលិករ ព្រោះនាងមានសម្រស់ស្អាតពីធម្មជាតិ មិនចាំបាច់ផាត់មុខច្រើន ហើយផ្ដើមចេញពីសាលាសិល្បៈរៀនផ្នែករបាំបុរាណ និងរបាំព្រះរាជទ្រព្យតាំងពីអាយុ៩ឆ្នាំ នោះនាងពិតជាមានទេពកោសល្យមិនធម្មតានោះទេ ។
ស្រីស្រស់សុខគា គីមលាង បន្ថែមថានាងពិតជាឆាប់ចូលមនោសញ្ចេតនាបានលឿនមែន ប៉ុន្ដែរឿងដែលនាងបារម្ភនោះគឺមិនដឹងថាត្រូវធ្វើម៉េចឲ្យយំចេញពេលប៉ះឈុតកម្សត់ៗឡើយ។
គួរបញ្ជាក់ថាកញ្ញាសុខគា គីមលាង ត្រូវមហាជនចាប់អារម្មណ៍ខ្លាំងនៅពេលដែលនាងតែងខ្លួនជាអប្សរា ហើយរាំរបាំអប្សរានៅលើភ្នំទឹកកកមួយកម្ពស់ដល់ទៅ៣គីឡូពីដី នៅប្រទេសនូវែលសេឡង់ កាលពីឆ្នាំ២០២៣ ។នាងក៍ត្រូវបានជ្រើសរើសជាតួទេពធីតាឆ្នាំថ្មីក្នុងពិធីអង្គរសង្រ្កាន្ដឆ្នាំ២០២៣ នៅខេត្តសៀមរាប និងធ្វើជាតួអ្នករាំក្បាលទូក ក្នុងពិធីបុណ្យអុំទូក នៅខេត្តសៀមរាប ឆ្នាំ២០២៣ ជាដើម ។ដោយឡែកថ្មីៗនេះវិញកញ្ញាគីមលាង ក៍បានលេចមុខក្នុងស្ពតពាណិជ្ជកម្មដ៍ធំមួយរបស់រថយន្ដទំនើបRange Rover 2024 ដែលតាមព័តមានថានាងទទួលបានតម្លៃខ្លួនខ្ពស់ពីការផ្សព្វផ្សាយមួយនេះ ព្រោះកន្លងមកក្រុមហ៊ុនមួយនេះនៅខ្មែរមិនដែលជ្រើសតារាសម្ដែងណាឃោសនារថយន្ដរបស់ខ្លួនដូចក្រុមហ៊ុនផ្សេងទេ ប៉ុន្ដែពួកគេបានជ្រើសយកនាដការីដ៍ស្រស់ស្អាតដែលសាកសមជាមួយផលិតផលរបស់គេតែម្ដង ។
ឆ្លើយតបសំណួរថាតើកញ្ញាគីមលាង ស៊ីថ្លៃប៉ុន្មានក្នុងការថតស្ពតរថយន្ដRange Rover 2024 នោះនាងថាមិនអាចប្រាប់ពីតម្លៃបានទេ ព្រោះខ្លាចមានការប្រៀបធៀបគ្នារវាងនាងទៅអ្នកផ្សេង។
សុខគា គីមលាង វាចាថា”ខ្ញុំត្រូវបានខាងក្រុមហ៊ុនRange Rover ជ្រើសរើសឲ្យថតផ្សាយពីរថយន្ដមួយនេះដោយសារតែខាងគាត់អាចស្គាល់ពីBack Ground របស់ខ្ញុំ និងម្យាងខ្ញុំជាអតិថិជនរថយន្ដនិងប្រើប្រាស់រថយន្ដនេះឆ្នាំ២០២២ មុនប្ដូររូបរាង ។ខ្ញុំធ្វើការជាមួយគាត់អត់មានកុងត្រាទេ ហើយខ្ញុំក៍មិនអាចប្រាប់ពីតម្លៃខ្លួនបានដែរ សុំលាក់ ពិតជាមិនអាចប្រាប់បានមែន តែជាតម្លៃមួយជាទីគាប់ចិត្ត។ចំពោះមូលហេតុដែលខ្ញុំមិនអាចប្រាប់ពីតម្លៃបានដោយសារតែខ្ញុំមិនចង់ឲ្យមានការប្រៀបធៀប”។
សុខគា គីមលាង អាយុ២៥ឆ្នាំ ធ្លាប់ប្រាប់ថានាងមានរូបសម្រស់ពីធម្មជាតិទាំងស្រុង គ្មានការកែច្នៃ ឬវះកាត់ផ្នែកណាមួយឡើយ ។មុនឈានចូលថតភាពយន្ដស្រីស្អាតរូបនេះធ្លាប់លេចមុខតាមMV និងថតឲ្យសម្អាងការមួយចំនួន ហើយក្រៅពីការងារសិល្បៈនាងជាគ្រូរបាំបុរាណ និងរបាំព្រះរាជទ្រព្យនៅសាលាមធ្យមវិចិត្រសិល្បៈ ផងដែរ ។ស្រីសស់ថានាងមិនទាន់មានគូស្នេហ៍ឡើយ ហើយនាងក៍មិនមែនជាកូនកាត់សាសន៍ណាដូចគេសង្ស័យដែរ តែជាកូនខ្មែរសុទ្ធសាធដែលបានហាត់របាំបុរាណ និងរបាំព្រះរាជទ្រព្យរយៈពេល១៦ឆ្នាំមកហើយ មុនក្លាយទៅជាគ្រូគេដូចសព្វថ្ងៃ ៕