ភ្នំពេញ៖ម្ចាស់ពានThe Voice Cambodia រដូវកាលទី២ លោកធែល ថៃ ជ្រកនៅហង្សមាស៨ឆ្នាំមកហើយដែលលោកថៃ ជាប់កុងត្រាជាមួយផលិតកម្មនេះតែ២ឆ្នាំទៀតប៉ុណ្ណោះ ខណៈដែលការចចារលើកុងត្រាថ្មីនៅមិនទាន់បានត្រៀមនៅឡើយ ។ដោយឡែកអ្នកគាំទ្រលោកធែល ថៃ ថាតារាចម្រៀងរូបនេះនៅមិនទាន់បានបញ្ចេញសម្ថភាពអស់ទេ ព្រោះតែបទចម្រៀងមិនមានដិតដល់លើទីផ្សារ ។
ក្នុងជំនួបតាមទូរស័ព្ទកាលពីរសៀលថ្ងៃទី២៣ កក្កដា លោកថៃ ថានៅឆ្នាំ២០២៤ នេះលោកទទួលបានបទចម្រៀងថ្មីជាបន្ដបន្ទាប់ទាំងនៅដើមនិងចុងឆ្នាំនេះ តែក្នុងនោះបទខ្លះក៍លោត ខ្លះក៍មិនសូវស្ទុះ ដែលនេះជារឿងធម្មតាទៅហើយ ។ប៉ុន្ដែលោកថាថ្មីៗខ្លួនបានអភិវឌ្ឍន៍សម្ថភាពបន្ថែមពីលើច្រៀងនោះគឺចេះធ្វើភ្លេងដោយខ្លួនឯងទម្លាក់ទៅឲ្យខាងក្រុមហ៊ុន ។
ទាក់ទងរឿងថាលោកធែល ថៃ នៅហង្សមាសជិត១០ឆ្នាំ មិនទាន់បញ្ចេញសម្ថភាពអស់នោះលោកបានឆ្លើយថាបទខ្លះមានការគាំទ្រច្រើន បទខ្លះការគាំទ្រមានកម្រិត តែនៅឆ្នាំ២០២៤ នេះលោកទទួលបានបទចម្រៀងច្រើនជាងឆ្នាំមុនៗ។ចំណែករឿងថាតើលោកថៃ នឹងបន្ដច្រៀងឲ្យហង្សមាសតទៅទៀត ឬចាកចេញពេលផុតពីកុងត្រានៅឆ្នាំ២០២៦ ខាងមុខនេះលោកថាដោយសារតែពេលវេលានៅច្រើនដែរ ហេតុនេះលោកមិនទាន់គិតដល់ចំណុចនេះទេ ។
ធែល ថៃ លើកពានThe Voice Cambodia 2016 បន្ទាប់ពីលោកប៊ុត សីហា ហើយបទដែលលោកល្បីជាងគេគឺ”ចង់ទៅ ទៅៗ” ខណៈលោកថៃ ក៍ឈានទៅថតភាពយន្ដបាន២រឿងផងដែរ គឺរឿង”រាជបុត្រកង្កែប “និងរឿង”រាជនីយភូមិគ្រិះ “។ប៉ុន្ដែលោកថៃ ថាគ្មានគម្រោងថតរឿងទី៣ នោះទេ ព្រោះថាការថត២រឿងកន្លងមកលោកឃើញខ្លួនឯងឆ្គងៗច្រើន។
តារាហង្សមាសរូបនេះថ្លែងថា”ការថតភាពយន្ដចំណាយពេលច្រើន ចុះខេត្តទៀត ហេតុនេះយើងត្រូវការពេលវេលាគ្រប់គ្រាន់ មិនដូចច្រៀងConcerts ទេ។ខ្ញុំថត២រឿងនោះហើយអត់មានគម្រោងថតរឿងទី៣ទេ ព្រោះខ្ញុំមើលទៅខ្លួនឯងនៅឆ្គងៗច្រើន ប៉ុន្ដែខ្ញុំគិតថាខ្លួនលេងរឿងបុរាណ”រាជនីយភូមិគ្រិះ”បានល្អជាងរឿងសម័យ”រាជបុត្រកង្កែប ។ខ្ញុំចង់ផ្ដោតនិងពង្រឹងវិស័យចម្រៀង ច្រើនជាងថតភាពយន្ដ ព្រោះយើងជាអ្នកចម្រៀង មិនមនថតអាជីពទេ” ។
ក្រៅពីគ្មានផែនការណ៍លេងរឿងថ្មីៗថែមទៀតនោះលោកធែល ថៃ ដែលពីមុនធ្លាប់ច្រៀងនាពេលរាត្រីតាមPub មួយចំនួននោះថាលោកមិនមានការធ្វើការងារនោះពេលយប់ទេ ព្រោះតែគ្មានពេលវេលាគ្រប់គ្រាន់ មិនមែនលោកខ្លាចថាម្ចាស់ពានច្រៀងពេលយប់ធ្លាក់កូដ ឬប្រឈមភ្ញៀវហៅផឹកស្រវឹងនោះទេ តែមកពីលោកមិនទាន់មានពេលវេលាធ្វើការយប់ តែការងារប្រភេទនេះពីមុនលោកបានឆ្លងកាត់អស់ហើយ ។
គួរបញ្ជាក់ថាធែល ថៃ ក្រោយក្លាយទៅជាតារាហង្សមាស៨ឆ្នាំនេះលោកថាធ្លាប់បានចេញទៅច្រៀងសម្ដែងនៅក្រៅស្រុកតែប្រទេសកូរ៉េ និងថៃ ប៉ុន្ដែមិនទាន់បានចេញទៅច្រៀងនៅប៉ែកអ៊ឺរ៉ុបទេ បើទោះជាលោកអាចច្រៀងបទមរតកដើមបានក្ដី ។
លោកថៃ ថ្លែងថា”ធ្លាប់មានគេទាក់ទងហៅឲ្យទៅច្រៀងនៅអ៊ឺរ៉ុបដែរ តែគេសួរចោលៗ អត់ច្បាស់លាស់ ។ខ្ញុំចង់ទៅច្រៀងនៅអ៊ឺរ៉ុបដែរ ព្រោះចង់ស្គាល់ស្រុកគេផង ចង់ជួបជុំបងប្អូនខ្មែរនៅទីនោះដែរ តែឱកាសមិនទាន់ហុចឲ្យ។
ធែល ថៃ ជាបុរសស្លូតបូតសុភាពរាបសារម្នាក់ដែលមិនធ្លាប់មានរឿងអាស្រូវទេ តែលោកធ្លាប់បង្ហើបថាមានម្ចាស់ស្នេហ៍ហើយ។យ៉ាងណាគេមិនដែលឃើញលោកថៃ បណ្ដើរគូស្នេហ៍ជាចំហម្ដងណាឡើយ ស្របពេលដែលមិត្តរួមអាជីពលោកនី រតនា ការប្រពន្ធ៦ឆ្នាំ បានកូន៣នាក់ទៅហើយ ៕