ខេត្តសៀមរាប ៖ ក្រុមអ្នកបុរាណវិទ្យា នៃអាជ្ញាធរអប្សរា បានធ្វើកំណាយស្រាវជ្រាវ នៅស្ថានីយស្លដែកបុរាណ មួយកន្លែង នៅក្នុងភូមិស្រែចង្ហូត សង្កាត់រុនតាឯក ក្រុងរុនតាឯកតេជោសែន ជិតជើងភ្នំបូក។
![](https://norkorthom.com/wp-content/uploads/2024/07/q1-6.jpg)
បុរាណវិទូ នៃអាជ្ញាធរអប្សរា លោក សួម សុភា ឱ្យដឹងថា ការធ្វើកំណាយស្រាវជ្រាវ នៅស្ថានីយស្លដែកសម័យ បុរាណ ក្នុងតំបន់អតីតរាជធានីអង្គរនេះ គឺបំណងដើម្បសិក្សាឱ្យស៊ីជម្រៅ ពីឧស្សាហកម្មស្លដែក ការផលិតដែក ព្រមទាំងចង់ដឹងពីរចនាសម្ព័ន្ធនៃចង្រ្កានស្លដែករបស់ខ្មែរបុរាណ កាលពីសម័យអង្គរផង ព្រមទាំងជួយបណ្ដុះ បណ្ដាលយុវជនខ្មែរជំនាន់ក្រោយ ឱ្យយល់ដឹងពីជំនាញទាំងនោះផង។
![](https://norkorthom.com/wp-content/uploads/2024/07/q2-8.jpg)
ក្នុងការធ្វើកំណាយនៅស្ថានីយស្លដែកសម័យបុរាណនេះ គឺមានយុវជនមកពីវិទ្យាល័យស្រុកប្រាសាទបាគង ចំនួនជាង២០នាក់ ចូលរួមទស្សនាស្វែងយល់ និងសិស្សមកពីសាលាអន្តរជាតិ JPA ចំនួន៤នាក់ទៀត បានចូលរួមហ្វឹកហ្វាត់ផងដែរ។
![](https://norkorthom.com/wp-content/uploads/2024/07/q3-8.jpg)
លោក សួម សុភា បញ្ជាក់ទៀតថា ក្នុងការធ្វើកំណាយស្រាវជ្រាវស្ថានីយស្លដែកបុរាណនេះ ក្រុមការងារបានជីករណ្ដៅ ទំហំ៣ម៉ែត្រ គុណនិង៤ម៉ែត្រ។ នៅក្នុងរណ្ដៅកំណាយ បានប្រទះឃើញរ៉ែដែកតូចៗ បំណែកអាចម៍ដែក បំណែកចង្ក្រាន្ត និងបំណែកកុលាលភាជន៍ផ្សេងៗជាដើម។
![](https://norkorthom.com/wp-content/uploads/2024/07/q4-6.jpg)
ជាលទ្ធផល ក្រុមអ្នកបុរាណវិទ្យា បានសន្និដ្ឋានថា ស្ថានីយស្លដែកបុរាណ នៅក្នុងអតីតរាជធានីអង្គរ ដែលគេបានធ្វើកំណាយស្រាវជ្រាវនេះ បានដំណើរការនៅសម័យអង្គរ។
![](https://norkorthom.com/wp-content/uploads/2024/07/q5-7.jpg)
អ្នកស្រាវជ្រាវយល់ថា ឧស្សាហកម្មស្លដែក សម័យអង្គរ គឺជាវិស័យយ៉ាងសំខាន់មួយ ដែលបានផលិតដែក ធ្វើ ជាឧបករណ៍ប្រើប្រាស់សម្រាប់កសិកម្ម គ្រឿងសាស្ត្រាវុធ ព្រមទាំងបម្រើការឱ្យវិស័យស្ថាបត្យកម្ម ជាដើម ដែលជួយឱ្យចក្រភពខ្មែរ សម័យនោះ មានការរីកចម្រើនជឿនលឿន និងជាកត្តាមួយដែលជំរុញអារ្យធម៌អង្គរថ្កុំថ្កើង។
![](https://norkorthom.com/wp-content/uploads/2024/07/q6-6.jpg)
សូមបញ្ជាក់ថា មុនពេលដែលក្រុមអ្នកបុរាណវិទ្យា បើកកំណាយស្រាវជ្រាវស្ថានីយស្លដែកបុរាណ នៅភ្នំបូកនោះ គឺអ្នកស្រាវជ្រាវបានសិក្សាតាមវិធីវាស់ស្ទង់ ប្រើឧបករណ៍ Gradiometer ដោយបានជំនួយពីសាកលវិទ្យាល័យ Flinders University, Australia ជាមុន ដើម្បីសិក្សាបឋមពីវត្តមាននៃទីតាំងចង្ក្រាន នៅលើស្ថានីយនេះ៕ ខៀវទុំ
![](https://norkorthom.com/wp-content/uploads/2024/07/q7-5.jpg)