ខេត្តព្រះសីហនុ ៖ អគារស្នាក់នៅរបស់កម្មករ ចំនួន៤អគារ ស្មើនឹង៤៣បន្ទប់ ត្រូវបានអគ្គិភ័យឆាបឆេះអស់ទាំងស្រុង និងឆេះអស់ម៉ូតូហុងដា ឌ្រីម ១គ្រឿងទៀត សង្ស័យផ្តើមចេញពីទុស្សេចរន្តអគ្គិសនី (ទុស្សេខ្សែភ្លើង)។
![](https://norkorthom.com/wp-content/uploads/2024/07/d6-2.jpg)
ហេតុការណ៍អគ្គិភ័យនេះ បានកើតឡើង កាលពីវេលាម៉ោង៨និង៣០នាទីព្រឹក ថ្ងៃទី២៥ ខែកក្កដា ឆ្នាំ២០២៤ ស្ថិតនៅតំបន់ហ្វាងជិង ០៩ យិជា ក្បែរឆ្នេរមាស ឆ្នេរប្រាក់ ស្ថិតក្នុងភូមិរាម ឃុំរាម ស្រុកព្រៃនប់។
![](https://norkorthom.com/wp-content/uploads/2024/07/d8-1.jpg)
អគារដែលទទួលរងនូវអគ្គិភ័យឆាបឆេះ ជាប្រភេទទូកុងតឺន័រតម្រៀបគ្នា ប្រក់ស័ង្កសី ចំនួន៤អគារ ស្មើនឹង៤៣ បន្ទប់ សម្រាប់បងប្អូនកម្មករស្នាក់នៅ។
![](https://norkorthom.com/wp-content/uploads/2024/07/d3-3.jpg)
តាមប្រភពពីកន្លែងកើតហេតុ បានឱ្យដឹងថា អគ្គិភ័យនេះបានកើតឡើងក្នុងពេលដែលកម្មករ-កម្មការិនីបានចេញទៅធ្វើការអស់។ រីឯ មូលហេតុត្រូវបានសង្ស័យផ្តើមចេញទុស្សេខ្សែភ្លើង។ បន្ទាប់ពីកើតមានអគ្គិភ័យឆាបឆេះយ៉ាងសន្ធោសន្ធៅ បានបង្កឱ្យភ្ញាក់ផ្អើលដល់សមត្ថកិច្ច បញ្ជូនរថយន្តពន្លត់អគ្គិភ័យ ចំនួន៤គ្រឿង ក្នុងនោះ មានរថយន្តពន្លត់អគ្គិភ័យរបស់ស្នងការដ្ឋាននគរបាលខេត្ត ចំនួន៣គ្រឿង របស់រថយន្តពន្លត់អគ្គិភ័យរបស់អធិការដ្ឋាន ចំនួន១គ្រឿង បានចេញទៅអន្តរាគមន៍បាញ់ទឹកពន្លត់ភ្លាមៗ។
![](https://norkorthom.com/wp-content/uploads/2024/07/d9-1.jpg)
នៅក្នុងហេតុការណ៍គ្រោះអគ្គិភ័យខាងលើ បានបង្កឱ្យខូចខាត រួមមាន អគារចំនួន៤ ស្មើនឹង៤៣បន្ទប់ ត្រូវបានភ្លើងឆាបឆេះខ្ទេចទាំងស្រុង និងឆេះម៉ូតូម៉ាកហុងដា ឌ្រីម សេ១២៥ ចំនួន១គ្រឿង តែមិនបង្កឱ្យមនុស្សណាម្នាក់រងរបួសឡើយ ។ យ៉ាងណា សមត្ថកិច្ចកំពុងធ្វើការស្រាវជ្រាវបន្តទៀត។ បន្ទាប់ពីកើតមានហេតុការណ៍អគ្គិភ័យខាងលើ កម្មករ-កម្មការិនីទាំងអស់ ត្រូវបានលោកអភិបាលស្រុក និងសមត្ថកិច្ច ព្រមទាំងអាជ្ញាធរមូលដ្ឋាន បានហៅមកតម្រង់ជួរ នៅចំណុចកើតហេតុ ដើម្បីរាប់ចំនួន ក្រែងមានបាត់កម្មករណាដែលមិនទាន់ចេញពីបន្ទប់៕
![](https://norkorthom.com/wp-content/uploads/2024/07/d7-1.jpg)
![](https://norkorthom.com/wp-content/uploads/2024/07/d5-6.jpg)
![](https://norkorthom.com/wp-content/uploads/2024/07/d4-3.jpg)
![](https://norkorthom.com/wp-content/uploads/2024/07/d1-9.jpg)
![](https://norkorthom.com/wp-content/uploads/2024/07/v2-4-1024x576.jpg)