ភ្នំពេញ៖នៅថ្ងៃខួបកំណើតរបស់ខ្លួនកាលពីថ្ងៃ២៦ ខែកក្កដា អតីតតារាសម្ដែងគឹម ច័ន្ទបរមី បានថើបថ្ពាល់គូស្នេហ៍របស់នាងលោកហ៊ុន បញ្ញាបុត្រ ហៅពេជ្រ ខណៈដែលនាងទទួលបានកាដូជាច្រើនពីសង្សារក្នុងនោះមានដូចជាអ៊ឺវ៉ាន់ម៉ាក ប្រេន ប្រេន Louis Vuitton និងលុយដុល្លារជិត១០ដុំដែល១ខ្ទាស់នោះខ្ទង់១ម៉ឺនដុល្លារ ទាញចេញពីនំខេក ។អ្នកលេងបណ្ដាញសង្គមជាច្រើនបានចាប់អារម្មណ៍ចំពោះខួបកំណើតច័ន្ទបរមី នៅឆ្នាំនេះថានាងទទួលបានកាដូពីម្ចាស់ស្នេហ៍មិនក្រោម១០ម៉ឺនដុល្លារឡើយ ប៉ុន្ដែក៍ធ្វើឲ្យបុរសជាច្រើនបានរងសម្ពាធពីគូស្នេហ៍ផងដែរ ព្រោះពួកគេគ្មានលទ្ធភាពធ្វើដាក់សង្សារដូចម្ចាស់ចិត្តរបស់ច័ន្ទបូរមី ទេ។
សូមបញ្ជាក់ថាគឹម ច័ន្ទបូរមី ត្រូវគូស្នេហ៍ធ្វើខួបកំណើតឲ្យនាងជារៀងរាល់ឆ្នាំក្រោយពួកគេភ្ជាប់ស្នេហាជាមួយគ្នាជាង៥ឆ្នាំមកនេះ ប៉ុន្ដែសម្រាប់ខួបនាងនៅឆ្នាំ២០២៤ នេះហាក់ទទួលបានកាដូច្រើនជាងឆ្នាំមុនៗនោះគឺលុយដុល្លារទាំងបាច់ៗតែម្ដង។
នៅលើហ្វេសបុករបស់លោកហ៊ុន បញ្ញាបុត្រ បានថ្លែងសារជូនពរសង្សារនៅថ្ងៃខួបកំណើតថា”រីករាយថ្ងៃកំណើតអូន បងជូនពរអូនអោយជួបតែសេចក្ដីសុខ ជីវិតមានតែស្នាមញញឹម “។ចំណែកគឹម ច័ន្ទបរមី វិញបានតបទៅគូស្នេហ៍ថា”អរគុណបងហ៊ុន បញ្ញាបុត្រ និងមិត្តល្អគ្រប់ៗគ្នា”។
ក្រោយប្រារពខួបកំណើតចប់នៅថ្ងៃទី២៨ ខែកក្កដា គឹម ច័ន្ទបរមី បណ្ដើរលោកហ៊ុន បញ្ញាបុត្រ ទៅមន្ទីពេទ្យកុមារគន្ធបុប្ផា ខេត្តសៀមរាប និងបរិច្ចាគថវិការចំនួន៥ពាន់ដុល្លារផងដែរ ហើយស្រីស្រស់ថានោះជាថ្ងៃកំណើតដ៍មានន័យ ។
គួរបញ្ជាក់ថាគឹម ច័ន្ទបរមី បានបញ្ចេញស្នេហានាងជាមួយលោកហ៊ុន បញ្ញាបុត្រ កាលពីឆ្នាំ២០១៨ ហើយនៅឆ្នាំ២០២០ នាងក៍ដកខ្លួនពីសិល្បៈស្ទើតែទាំងស្រុងតែម្ដង។អតីតFreshie រូបនេះត្រូវបានគេចាត់ទុកថានាងកំពុងរស់នៅដល់ត្រើយសុខសាន្ដ ព្រោះមានអ្វីៗគ្រប់យ៉ាងទាំងអស់ដែលគូស្នេហ៍ផ្គាប់ចិត្តក្នុងនោះមានដូចជានាងជិះរថយន្ដទំនើបៗតម្លៃចាប់ពីរាប់សែនដុល្លារមានដូចជាLamborghini ,Mercedes –Benz Ag ,Porsche និងJeep Rubicon ជាដើម ។ មិនត្រឹមតែប៉ុណ្ណោះនៅពេលដែលច័ន្ទបរមី ទៅដើរលេងកម្សាន្ដនៅប្រទេសអូស្រា្ដលីគេឃើញលោកហ៊ុន បញ្ញាបុត្រ បានយកយន្ដហោះផ្ទាល់ខ្លួនម៉ាកអ៊ាប៊ើស៧២ (Air Bus 72) ដឹកនាងទៅមកដូចតារាហូលីវូដ អីចឹង។កាន់តែគួរឲ្យចាប់អារម្មណ៍ផងដែរនៅថ្ងៃMerry Christmas កាលពីឆ្នាំមុនលោកបញ្ញាបុត្រ បានយកឧត្ថម្ភាគចក្រ ដឹកនាងមើលទេសភាពជុំវិញក្រុងភ្នំពេញហើយចុះចតផ្អើលកោះពេជ្រ ព្រោះតែពេលនាងចុះពីលើឧត្ថម្ភាគចក្រនោះមានរថយន្ដទំនើប២គ្រឿងបើកទៅចាំទទួលនាងដល់កាំជណ្ដើរយន្ដហោះខ្នាតតូចនោះតែម្ដង។មើលទៅជីវិតរបស់ច័ន្ទបរមី ពេលនេះមិនខុសពីព្រះនាងទេ ហេតុនេះឱកាសនៃការវិលត្រឡប់មកចាប់អាជីពចាស់ ប្រមូលលុយល្អិតវិញគឺសឹងតែបញ្ចប់ទៅហើយ។
តាមព័តមានថាអនាគតម្ដាយក្មេករបស់គឹម ច័ន្ទបរមី អ្នកស្រីហ៊ុន ចន្ទូ ជាពាណិជ្ជករមួយរូបដែលមានមុខជំនួញធំៗ និងក្រុមហ៊ុនជាច្រើននៅកម្ពុជា។ចំណែកគូស្នេហ៍របស់ច័ន្ទបរមី លោកហ៊ុន បញ្ញាបុត្រ ដែលត្រូវជាកូនរបស់អ្នកស្រីហ៊ុន ចន្ទូ ត្រូវជាចៅរបស់លោកហ៊ុន ណេង ជាបងប្រុសរបស់អតីតនាយករដ្ឋមន្រ្ដីលោកហ៊ុន សែន ។ច័ន្ទបរមី ធ្លាប់ប្រាប់អ្នកយកព័តមានយើងដោយផ្ទាល់ថាសង្សាររបស់នាងមានស្រីៗតាមស្រលាញ់ច្រើនណាស់ ប៉ុន្ដែលោកមានភាពស្មោះត្រង់តែលើនាងម្នាក់ ព្រោះសូម្បីតែស្រីឆាតទៅរកលោកក៍គូស្នេហ៍បង្ហាញឲ្យនាងបានឃើញដែរ ។យ៉ាងណារហូតមកដល់ពេលនេះមិនទាន់មានដំណឹងថាច័ន្ទបរមី នឹងគ្រោងដឹកដៃលោកបញ្ញាបុត្រ រៀបការនៅពេលណាឡើយ ប៉ុន្ដែតាមព័តមានថាស្រីស្រស់តូចច្រឡឹងរូបនេះអាចនឹងឈានទៅរកស៊ីធ្វើជំនួញធំនាពេលខាងមុខនេះក្រោមការបណ្ដុះបណ្ដាលពីអនាគតម្ដាយក្មេកនាងលោកស្រីហ៊ុន ចន្ធូ ។
នៅឆ្នាំ២០២៤ នេះដែរក្រៅពីគឹម ច័ន្ទបរមី គេឃើញអ្នកនាងហ៊ិន ច័ន្ទនីរ័ត្ន ក៍មានភ័ព្វវាសនាមិនខុសនាងដែរក្រោយនាងរៀបការជាមួយលោកឌី ពេជ្រ ជាក្មួយសម្ដេចតេជោកាលពីថ្ងៃទី២២ ខែធ្នូ ឆ្នាំ២០២៣ ពេលនេះនីរ័ត្ន ដេកលើគនរទ្រព្យ ។គេជឿរថានៅពេលច័ន្ទបរមី រៀបការច្បាស់ជាផ្អើលមេឃជាមិនខាន ព្រោះគ្រាន់តែនៅថ្ងៃខួបកំណើតសោះនាងទទួលបានកាដូខ្ទង់១សែនដុល្លារពីបណ្ដូលចិត្តទៅហើយ ៕
