ភ្នំពេញ៖ដួង វីរៈសិទ្ធ ពេលនេះធ្វើថៅកែខ្លួនឯងផង ច្រៀងឲ្យគេផង បន្ទាប់ពីអតីតតារាចម្រៀងហង្សមាសរូបនេះបានបើកវង្សតន្រ្ដីផ្ទាល់ខ្លួនមួយ”ដួង វីរៈសិទ្ធ តន្រ្ដី “ដែលមានទទួលការប្រគុំតន្រ្ដីនិងរៀបចំតារាចម្រៀងទៅតាមម្ចាស់កម្មវិធីកុម្មង់។យ៉ាងណាគេឃើញថៅកែក្មេងរូបនេះនៅតែបន្ដចេញច្រៀងតាមបណ្ដារកម្មវិធីរបស់ក្រុមហ៊ុនAgency របស់លោកអាឡិច ចាន់ត្រា និងយ៉ែម សំអូន ដដែល ទើបធ្វើឲ្យវាសនា ត្រូវប៉ាន់កើបលុយមូលតែម្ដង បើទោះជាលោកមិនសូវចេញច្រៀងតាមConcerts ធំៗមែន ប៉ុន្ដែការលេចមុខតាមកម្មវិធីMini Concerts លោកសិទ្ធ ឆក់ឱកាសនេះប្រមូលលុយល្អិតបានប្រាក់ជាច្រើនក្នុង១ឆ្នាំៗ នារដូវក្ដៅ ព្រោះលោកអាចច្រៀងបានជាច្រើនទម្រង់ ពិសេសបទមរតកដើម ។
ទោះជាយ៉ាងណានារយៈពេលប៉ុន្មានខែចុងក្រោយនេះគេមិនទាន់ឃើញលោកដួង វីរៈសិទ្ធ ចេញបទថ្មីៗដែលលេចធ្លោនោះទេ បន្ទាប់ពីថៅកែផលិតកម្មរាម លោកឧកញ៉ាឈាង រ័ត្ន បានទទួលមរណភាពកាលពីខែតុលា ឆ្នាំ២០២៣ ។ចំណែកការទាក់ទងទៅលោកវីរៈសិទ្ធ កាលពីពេលថ្មីៗនេះទូរស័ព្ទតេចូលតែលោកមិនទទួលឡើយ ទើបមិនទាន់ដឹងថាតើអតីតតារាផលិតកម្មមហាហង្ស និងហង្សមាសរូបនេះនៅតែបន្ដក្រាញច្រៀងឲ្យរាម ទៀតឬយ៉ាងណានោះទេ ។ប៉ុន្ដែក្នុងជំនួបកន្លងមកលោកសិទ្ធ ថាលោកនៅតែជាតារារាម និងថាការច្រៀងមានផលិតកម្មឬអត់ផលិតកម្មជារឿងធម្មតារបស់លោកទៅហើយ ព្រោះទោះជាទៅច្រៀងនៅឯណាក៍លោកនៅតែជាអ្នកនិពន្ធបទចម្រៀង និងធ្វើភ្លេងដោយខ្លួនឯងដដែល ។
ប្រភពបានឲ្យដឹងថាផលិតកម្មរស្មីហង្សមាសនៅតែបើកទ្វាចាំទទួលលោកដួង វីរៈសិទ្ធ ម្ដងទៀតបើលោកចង់”ទៅហើយវិលវិញ” ។ប៉ុន្ដែភាគរយតិចបំផុតដែលលោកសិទ្ធ អាចទៅជ្រកនៅហង្សមាសជាលើកទី២នោះ ព្រោះថាក្រោយចេញពីហង្សមាសជិត៤ឆ្នាំនេះលោកនៅតែមានទីផ្សារចម្រៀង និងរកប្រាក់ចំណូលបានពីការច្រៀងសម្ដែងដូចមុន ព្រមទាំងគ្មានសម្ពាធទៀតផង។ប្រភពថាបើលោកសិទ្ធ ចង់ទៅGalaxy ក៍ផលិតកម្មនោះរីករាយនិងទទួលដែរ ហេតុនេះលោកធ្លាប់ជ្រកនៅហង្សមាសជាច្រើនឆ្នាំ តែបានត្រឹមជាតួរងនោះតើចង់ទៅសាកល្បងធ្វើជាតួរងលើកទី២ឬយ៉ាងណា ?
ទោះជាអាជីពរបស់លោកម៉ម វាសនា ហៅដួង វីរៈសិទ្ធ ស្ថិតនៅមានភាពស្រពិចស្រពិលមិនដឹងថាត្រូវបន្ដនៅរាម ទៀត ឬគួរតែវេចបង្វេចទៅណាមែន តែម្ចាស់ពានI Am A Singer Cambodia រដូវកាលទី១ ដែលមានជំនាញអាចនិពន្ធMelody និងធ្វើភ្លេង រួមទាំងMIX ដោយខ្លួនឯងនោះអាចនឹងបន្ដការច្រៀងCover បទមរតកដើមឡើងវិញក៍លោកនៅតែមានទីផ្សារ ។ប៉ុន្ដែអ្នកនិយមស្ដាប់បទលោកសិទ្ធ មួយចំនួនចង់ឃើញលោកចេញបទជាច្រើនទម្រង់ មិនមែនបទណាក៍សុទ្ធតែមនោសញ្ចេតនាស្នេហាខូចចិត្តនោះទេ ព្រោះទស្សនិកជនចង់ឃើញលោកច្រៀងមានការបត់បែនដូចលោកព្រាប សុវត្ថិ ,ឆាយ វីរៈយុទ្ធ និងខេមរៈ សិរីមន្ដ ជាដើម ។
ដួង វីរៈសិទ្ធ ឬម៉ម វាសនា មានឪពុកជាតន្រ្ដីករ(ស្លាប់) ម្ដាយជាតារាចម្រៀងបុរាណ ហើយបងប្រុសលោកឈ្មោះម៉ម សំនៀង ជាតារាចម្រៀង និងពិធីករ ព្រមទាំងចេះលេងតន្រ្ដីបុរាណយ៉ាងស្ទាត់ជំនាញផងដែរ។ដោយឡែកប្អូនប្រុសលោកម្នាក់ទៀតឈ្មោះម៉ម ពេជ្ជរិទ្ធ ជាតារាចម្រៀងដែលល្បីបទ”មិនអាចឃាត់ទេ “ ហើយចេះជំនាញនិពន្ធទំនុកច្រៀង ,លេងឧបករណ៍តន្រ្ដី ទាំងសម័យ និងបុរាណផងដែរ ។សម្រាប់លោកវីរៈសិទ្ធ វិញការច្រៀងបទមរតកដើមបានយ៉ាងពិរោះនោះក៍ធ្វើឲ្យលោកមានទីផ្សារចម្រៀងនៅក្រៅស្រុកផងដែរ តែអ្វីដែលគួរឲ្យកត់សម្គាល់គេមិនដែលឃើញតារាសំនៀងស្រទន់ ផ្អែម រូបនេះបណ្ដើរគូស្នេហ៍ជាចំហម្ដងណាទេ ទើបធ្វើឲ្យអ្នកខ្លះសង្ស័យថាលោកដែលមានទាំងស្រីនិងប្រុសតាមស្រលាញ់នោះសិទ្ធ កំពុងលាក់កំណាន់ចិត្តជាច្រើនឆ្នាំមកហើយ ៕
