ភ្នំពេញ៖ពិធីករប៉ែន ចំរ៉ុង បានបង្ហាញអារម្មណ៍រីករាយខ្លាំងនៅពេលដែលភរិយាជាទីស្រលាញ់របស់លោកអ្នកនាងហ៊ុន ម៉ាណេ សម្រាលបានកូនទី២ឲ្យលោកបានដូចបំណងនិងមានសុវត្ថិភាពទាំងម្ដាយនិងកូន។ភរិយាលោកចំរ៉ុង អ្នកនាងម៉ាណេ សម្រាលកូនដោយធម្មជាតិនៅថ្ងៃទី៩ ខែ៨ ឆ្នាំ២០២៤ វេលាម៉ោង៣ និង៣៧នាទីទៀបភ្លឺ ។ប្រពន្ធលោកចំរ៉ុង បានចាត់ទុកថាសមាជិកថ្មីនេះជាកូនមាស កូនពេជ្រ ផ្កាយសំណាង និងថាការសម្រាលរបស់នាងឈឺពោះលឿន សម្រាលក៍លឿន ។នាងថាកូនម្នាក់នេះជាការមកបំពេញក្ដីសុខឲ្យគ្រួសារនាង ។ដោយឡែកលោកប៉ែន ចំរ៉ុង វិញថ្លែងថាលោករំភើបគ្មានអ្វីប្រៀបបានទេ ដែលឃើញភរិយានិងកូនមានសុវត្ថិភាព និងសុខភាពល្អទាំងពីរនាក់ ហើយអ្វីដែលលោកប៉ងគឺបាន១០០% ទៅហើយ។
យ៉ាងណាក្រៅពីទទួលបានសារជូនពរជាបន្ដបន្ទាប់នោះទាំងប៉ែន ចំរ៉ុង និងភរិយា នៅមិនទាន់ប្រាប់Fan ថាកូនទី២របស់លោកជាកូនប្រុសឬស្រីទេ គឺពួកគេចង់Surprise អ្នកជុំវិញខ្លួនទៅវិញ ។ប៉ុន្ដែតាមការអះអាងរបស់លោកចំរ៉ុង ថាអ្វីដែលលោកប្រាថ្នាបានឈានដល់គោលដៅទាំងស្រុងទៅហើយនោះមានន័យថាពួកគេអាចគ្មានគម្រោងយកកូនថែមក្នុងពេលដ៍ឆាប់នេះទៀតឡើយ ។
ទោះអ្នកនាងហ៊ុន ម៉ាណេ ទើបសម្រាលកូនឲ្យលោកប៉ែន ចំរ៉ុង បាន២មែន ប៉ុន្ដែពេលនេះពិធីកររូបសង្ហារមានកូនដល់ទៅ៣នាក់ទៅហើយ គឺកូនទី១របស់លោកជាមួយអ្នកនាងភិន សុដាលីស ឈ្មោះKaterina ដែលសម្រាលកាលពីថ្ងៃទី៦ ខែតុលា ឆ្នាំ២០១៦ ។ប៉ុន្ដែកូនស្រីមានវ័យជិត៨ឆ្នាំទៅហើយលោកចំរ៉ុង នៅតែគ្មានសិទ្ធិបានជួបមុខកូនដោយផ្ទាល់ដដែល ព្រោះសុដាលីស បានហាមដាច់ខាតមិនអនុញ្ញាត្តិឲ្យពិធីករចង្កាព្រែករូបនេះបានជួបកូននាងដោយផ្ទាល់ជាដាច់ខាតដោយសារតែរឿងរ៉ាវពួកគេបានចែកផ្លូវគ្នាទាំងចម្រូងសម្រាសកាលពីឆ្នាំ២០១៦ នោះ។
គួរំលឹកថាប៉ែន ចំរ៉ុង បានរៀបការជាមួយអ្នកនាងហ៊ុន ម៉ាណេ កាលពីថ្ងៃទី២៨ ខែវិច្ឆិកា ឆ្នាំ២០១៩ ហើយអ្នកនាងម៉ាណេ សម្រាលកូនស្រីទី១ឈ្មោះចំរ៉ុង បេឡាជុតិម៉ា ហៅBell កាលពីថ្ងៃទី២៤ ខែកញ្ញា ឆ្នាំ២០២០។មុនសម្រាលកូនទី២នេះអ្នកនាងម៉ាណេ បានបង្ហាញសកម្មភា ពត្រូវស្វាមីនាងលោកចំរ៉ុង ថ្នាក់ថ្នមខ្លាំងហើយនាងចាត់ទុកថាខ្លួនជានារីម្នាក់ដែលមានសំណាងទៀតផង។តែសម្រាប់អ្នកនាងសុដាលីស វិញទោះជាពេលនេះនាងមានគូដណ្ដឹងនឹងត្រៀមរៀបការស្វាមីថ្មីមែន ក៍រូបនាងនៅតែមិនអាចរាប់អាន ឬប្ដូរចិត្តឲ្យលោកចំរ៉ុង បានជួបកូននាងផ្ទាល់ដដែល ទើបធ្វើឲ្យចំរ៉ុង ពេលនឹកកូនទី១ពេកលោកមានតែអោបថើប និងបីកូនបានត្រឹមរូបថតប៉ុណ្ណោះ ។
សូមបញ្ជាក់ថាប៉ែន ចំរ៉ុង មិនសូវមានសកម្មភាពសម្ដែងMV និងភាពយន្ដទេ ក្រោយលោករៀបការប្រពន្ធជាង៤ឆ្នាំមកនេះ តែលោកបានចេញមុខធ្វើពិធីករជាច្រើននៅប៉ុស្ដិ៍Pnn ជាមួយពិធីករជើងថ្មីៗ។តារាសម្ដែងក្លាយជាMC ដែលមកពីខេត្តបាត់ដំបងរូបនេះក៍ធ្លាប់សាកល្បងរកស៊ីផ្នែកអចលនទ្រព្យមួយប្រាវដែរ តែបានស្ងាត់ទៅវិញ ។បច្ចុប្បន្នលោកចំរ៉ុង ស្ថិតក្នុងចំណោមពិធីករប្រុសលេចធ្លោម្នាក់ ហើយក្រោយមានប្រពន្ធនិងកូន៣នេះជីវិតលោកមានលំនឹងជាងមុន តែពេលជួបអតីតប្រពន្ធចាស់អ្នកនាងភិន សុដាលីស ដោយចៃដន្យនោះលោកនិងសុដាលីស នៅតែមិននិយាយរកគ្នាសូម្បីតែ១ម៉ាត់ បើទោះជាអ្នកនាងម៉ាណេ អត់ដែលហាមប្ដីរាប់អានអតីតប្រពន្ធទី១ ក្ដី ៕
