ភ្នំពេញ៖គៀត សុវណ្ណាឡាង វាចាថានាងគ្មានអារម្មណ៍ភ្ញាក់ផ្អើល ឬខកចិត្តចំពោះបុរសដែលជាដៃគូនាងស្និតដូចគូស្នេហ៍លោកមាស វឌ្ឍនៈសម្បត្តិ ហៅប៊ឺរី (berryy) ដែលកំពុងតែបង្កាត់ភ្លើងស្នេហាជាមួយអ្នកលក់Online ម៉ាដាម ដា នោះឡើយ ព្រោះនាងបានប្រាប់អស់ទៅហើយថាគ្មានទំនាក់ទំនងស្នេហាជាមួយបុរសម្នាក់នេះតាំងពីមុនម្លេះ ។ការលើកឡើងរបស់ស្រីស្អាតណាឡាង នៅពេលនេះក្រោយពីអ្នកលេងបណ្ដាញសង្គមលើកឡើងថាពួកគេមានការអាណិតដល់អតីតតារាហង្សមាសរូបនេះដែលគួរណាស់តែក្លាយទៅជាដៃគូស្នេហារបស់លោកប៊ឺរី តែចុងក្រោយបែជា អ្នកលក់ឡេ ឆក់ប្រុសស្អាតពីនាងបាត់ទៅវិញបែបនេះ ។
គៀត សុវណ្ណាឡាង ប្រាប់”អង្គរធំ”កាលពីរសៀលថ្ងៃទី១២ សីហា ថា”ដូចខ្ញុំបានប្រាប់ហើយថាប៊ឺរី ហ្នឹងខ្ញុំគ្រាន់តែជាដៃគូធម្មតាៗហ្នឹង អត់មានទាក់ទងស្នេហា អីទេ ។ខ្ញុំគ្មានការខកចិត្ត ដូចគេនិយាយទេ ព្រោះមនុស្សអត់ទាក់ទងគ្នាផង គ្រាន់តែយើងជាដៃគូផលិតមាតិកា ធ្វើវីដេអូជាមួយគ្នាតើ”។
គៀត សុវណ្ណាណាង តាំងចិត្តថានៅតែរាប់អានប៊ឺរី ដូចមុនដដែល ព្រោះពេលនេះទោះជាលែងសូវនៅជិតគ្នាដូចមុន តែឆាតតាមហ្វេសបុក និងតេរកគ្នារាល់ថ្ងៃ។ប៉ុន្ដែណ្ណាឡាង ហាក់មិនច្បាស់លាស់ទេ ថាតើនាងនឹងប៊ឺរី នឹងផលិតវីដេអូរួមគ្នាជាដៃគូទៀតនៅពេលណាដោយនាងថាពេលនេះប៊ឺរី កំពុងរវល់ជាមួយម៉ាដាម ដា ហេតុនេះប្រហែលជាគ្មានពេលវេលាច្រើនដូចមុនទេមើលទៅ ។
អតីតតារាចម្រៀងហង្សមាសរូបនេះបន្ថែមថា”គាត់(ប៊ឺរី )រវល់ជាមួយម៉ាដាម ដា ហើយដឹងកាលបានធ្វើវីដេអូរួមគ្នាដូចមុនទេ មើលទៅ ។តែខ្ញុំអត់ទាន់មានគម្រោងជ្រើសតារាប្រុសណាផ្សេង ជំនួសគាត់ទេ ក្នុងពេលឆាប់ៗនេះ”។
មិនត្រឹមតែសន្យាថានៅតែរាប់អានគ្នាជាមួយលោកប៊ឺរី នោះទេ តែគៀត សុវណ្ណាឡាង ថែមទាំងថាបើមានផលិតករតម្រូវឲ្យនាងលេងរឿងជាមួយលោកberryy នោះនាងនៅតែទទួលថតដូចមុន ពោលគឺគ្មានរឿងអ្វីជាមួយគ្នាទាំងអស់ ។
គៀត សុវណ្ណាឡាង បានបង្ហាញភាពស្និតស្នេហ៍ជាមួយលោកប៊ឺរី ក្រោយពេលនាងនិងអតីតសង្សារតារាសម្ដែងឆឹម វត្តី រូបនេះបានថតភាពន្ដរួមគ្នានៅហង្សមាស”ប្រពន្ធ ចិត្តព្រះ” ហើយតាំងពីពេលនោះមកពួកគេច្រើនតែទៅណាតែ២នាក់ដូចជាការមើលកុន និងដំណើរកម្សាន្ដជាដើម ។មានពេលខ្លះលោកប៊ឺរី ថែមទាំងថើបណ្ណាឡាង ពេលLive លើហ្វេសបុកទៀតផង ប៉ុន្ដែពួកគេនៅតែថារាប់អានគ្នាដូចជាពួកម៉ាកទៅវិញ ហើយពេលនេះលោកberryy ប្រកាសរៀបការជាមួយម៉ាដាម ដា នាពេលខាងមុខក៍ណ្ណាឡាង ថាអត់បញ្ហា ឬគ្មានរឿងអីពាក់ព័ន្ធជាមួយរូបនាងឡើយ ។
គួរបញ្ជាក់ថាគៀត សុវណ្ណាឡាង ធ្លាប់មានដំណឹងថាមានទំនាក់ទំនងស្នេហាជាមួយតារាសម្ដែងលោកលឹម ជាឡាយ ព្រោះជាឡាយ ក៍ធ្លាប់ស្នេហ៍ស្និតនាងមិនចាញ់ប៊ឺរី ដែរដែលជាញឹកញាប់គឺថើបណ្ណាឡាង ពេលកំពុងLive ហ្វេសបុក។អ្នកសិល្បៈជិតដិតបានលើកឡើងថាប្រសិនបើអ្វីៗដូចស្រីស្អាតណ្ណាឡាង ថានាងគ្មានទំនាក់ទំនងស៊ីជម្រៅជាមួយប៊ឺរី ឬជាឡាយ នោះទេ គឺអត់បញ្ហាចោទទេ ប៉ុន្ដែបើប្រុសទាំងពីរសុទ្ធតែមានទំនាក់ទំនងស្នេហាជាមួយនាង ហើយម្នាក់ៗគិតតែពីរត់ចោលនាងទៅរកថ្មីរៀងៗខ្លួនដូចគេសង្ស័យមែននោះ គឺណ្ណាឡាង ហាក់ដូចជាអភ័ព្វស្នេហ៍បន្ដិចហើយ ។តែគេជឿរថារូបសម្រស់ដូចណ្ណាឡាង នេះបើសិនជានាងព្រមស្ម័គ្រឲ្យបុរសដែលចូលស្អំរបួសបេះដូងនោះគឺពិតជាមិនលំបាកសម្រាប់រូបនាងឡើយ ពោលគឺរកថ្មីបានភ្លែតតែម្ដងដែលអាចនិងប្រុសរូបសង្ហារហើយមានទ្រព្យជាងប្រុសទាំងពីរនាក់ទៀតផង ។
គៀត សុវណ្ណាឡាង ថាពេលនេះFan ចង់ឲ្យនាងចូលច្រៀងឡើងវិញ ហើយនាងសប្បាយចិត្ត ព្រោះគ្រាន់តែផុសបទចាស់ៗពីមុន មានគេគាំទ្រច្រើន ។នាងថានឹងយកបទចាស់ៗរបស់ខ្លួនមកច្រៀងCover តែធ្វើភ្លេងថ្មី និងផុសនៅផេក ផ្ទាល់ខ្លួន គឺអត់មានគម្រោងចូលច្រៀងនៅផលិតកម្មណាទាំងអស់ ។ចំណែកទាក់ទងការថតភាពយន្ដថ្មីវិញណ្ណាឡាង ថានៅចុងឆ្នាំ២០២៤នេះនាងអត់ទាន់ត្រៀមថតរឿងថ្មីទេ ហើយរឿងស្នេហាក៍មិនមានដូចគេដែរ ។
គេចាំមើលថាគៀត សុវណ្ណាឡាង នៅតែស្អិតល្មូតជាមួយលោកប៊ឺរី ដូចមុន ឬនាងរយាលៗពីគ្នាដូចទំនាក់ទំនងជាមួយលឹម ជាឡាយ ដែរ ?