ភ្នំពេញ៖នៅក្នុងពិភពសិល្បៈតារាក្រៅពីប្រកួតប្រជែងទីផ្សារចម្រៀងគ្នាយ៉ាងខ្លាំងក្លានោះ ការលេងសម្ភារៈនិយមក៍កាន់តែបង្អួតគ្នាមិនធម្មតាឡើយ ។ដោយឡែកសម្រាប់ការរៀបអាពាហ៍ ពិពាហ៍ វិញគេឃើញតារាខ្លះលេងម៉ាអស់ដៃពោលគឺរៀបការផ្អើលមេឃដោយគ្រាន់តែចំណាយលើការតុបតែផ្កាភ្ញីក៍រាប់សែនដុល្លារដែរ ។ប៉ុន្ដែទន្ទឹមនិងនោះគេឃើញមានតារា៣ដួង ជ្រើសផ្លូវរៀបការដោយលាក់លៀមទៅវិញ…។
១៖មាស សុខសោភាៈអតីតតារាចម្រៀងរស្មីស្ទឹងសង្កែ ,U2 ,M សាន់ដេ ,ថោន និងរាម រូបនេះធ្លាប់រៀបការ២លើកមកហើយ តែពិធីនោះធ្វើដោយមិនបើកចំហដូចគ្នា ។មង្គលការរបស់មាស សោភា ជាមួយលោកអ៊ឹត រ៉ាដា អាណិកជនខ្មែរមកពីកាណាដា តាមបែបគ្រីស្ទានកាលពីឆ្នាំ២០០៨ ដែលធ្វើនៅព្រះវិហារមួយនៅកាណាដា និងការរៀបអាពាហ៍ ពិពាហ៍ ស្រដៀងពិធីសែនព្រេន នៅទីក្រុងភ្នំពេញកាលពីថ្ងៃទី២៨ ខែធ្នូ ឆ្នាំ២០០៩ គឺសុទ្ធតែធ្វើដោយលាក់លៀមដូចគ្នា ។យ៉ាងណាសោភា ដែលគេមិនដែលឃើញនាងមានផ្ទៃពោះ ឬដឹងថានាងធ្លាប់សម្រាលកូននៅមន្ទីសម្ភពណាមួយដូចតារាផ្សេងនោះ បែជានាងប្រកាសថាពេលនេះមានកូនប្រុសអាយុ១៧ឆ្នាំ ឈ្មោះBovee Hundley ទៅវិញ បើទោះជាមនុស្សជំនិតនាងថាយុវជនរូបនោះជាក្មួយនាងក្ដី ។
២៖ឌុច លីដា៖តារាសម្ដែង និងម៉ូដែល នាងឌុច លីដា មានកូនប្រុស១ឈ្មោះឡេង កិត្យានី អាយុជាង៤ឆ្នាំ ក្រោយនាងភ្ជាប់ស្នេហាជាមួយមន្រ្ដីរាជការម្នាក់កាលពីឆ្នាំ២០១៧ ។លីដា បានដឹកដៃឪពុកកូនប្រុសនាងរៀបការបែបសែនព្រេនកាលពីថ្ងៃទី១៩ ខែវិច្ឆិកា ឆ្នាំ២០២០ ប៉ុន្ដែនាងបានប្រាប់អ្នកយកព័តមានយើងថានឹងរៀបការធំដុំដូចគេ នៅពេលដែលកូននាងមានអាយុពី៥ទៅ៦ឆ្នាំ ដែលពេលនោះនាងនឹងឲ្យកូនប្រុសធ្វើជាកូនអណ្ដើកឲ្យនាងតែម្ដង ។គេកត់សម្គាល់ថាទោះមិនទាន់ហ៊ានរៀការជាសាធារណៈក៍ដោយ ប៉ុន្ដែចំណងស្នេហានាងជាមួយស្វាមីវ័យចំណាស់មានភាពផ្អែមល្ហែមគ្នាណាស់ ហើយលីដា ថែមទាំងមិនក្វល់រឿងអ្នកលេងបណ្ដាញសង្គមរិះគន់នាងថាយកប្ដីតា ឬបានប្ដីអាយុស្មើឪពុកនោះឡើយ ។
៣៖ជីមមី៖អតីតពិធីការិនីលេចធ្លោរបស់Pnn នាងម៉េង ឃុននី ហៅជីមមី ម៉េង បានរៀបការដោយមិនបើកចំហ និងមិនបានហៅតារារួមអាជីពចូលរួមឡើយ ក្នុងពិធីអាពាហ៍ ពិពាហ៍ របស់នាងជាមួយពិធីករលោកនូ ចំណាប់ ហៅជីមមី កាលពីថ្ងៃទី១៨ ខែកក្កដា ឆ្នាំ២០២៤ ។ប៉ុន្ដែក្រោយមានវីដេអូ និងរូបហ្វិច បានបែកធ្លាយនោះទើបជីមមី ព្រមសារភាពថាពិតជាបានរៀបការមែន តែធ្វើជាលក្ខណៈគ្រួសារសុទ្ធសាធ ។រហូតមកដល់ពេលនេះនាងនៅតែមិនទាន់បញ្ចេញរូបថតមង្គលការរបស់នាងគ្រប់កម្មវិធីឲ្យដូចតារាល្បីៗដ៍ទៃទៀតនោះឡើយ ខណៈដែលបន្ទាប់ពីមានស្វាមីនាងមិនសូវមានសកម្មភាពសិល្បៈដូចមុនទេ គឺងាកមករកស៊ីលក់Online កាន់តែខ្លាំង បើទោះជាចេះនិយាយដល់ទៅ៤ភាសារគឺខ្មែរ ,អង់គ្លេស ,ថៃ និងចិន ដែលធ្វើឲ្យនាងត្រូវប៉ាន់ជាមួយក្រុមហ៊ុនAgency ទាំងឡាយដូចគ្នាទៅនិងអ្នកនាងVj ណាណា និងខៀវ សានសាណា ក្ដី ។
មហាជនចាំមើលថាតារាបន្ទាប់ដែលនឹងជ្រើសផ្លូវរៀបការដោយមិនបើកចំហ ដូចតារា៣ដួងខាងលើដែរតើជាអ្នកណាទៅ ?