ភ្នំពេញ៖លោកយ៉ែម សំអូន បាននាំភរិយាអ្នកនាងយ៉ាន លីនដា ទៅថតស្ពតសម្អាងការរួមគ្នាជាលើកដំបូងឲ្យហាងមួយកាលពីថ្ងៃទី១៤ សីហា បន្ទាប់ពីពួកគេរស់នៅបែកគ្នាជាង៩ឆ្នាំ និងទើបតែវិលត្រឡប់មកត្រូវរ៉ូវគ្នា ស្អិតល្មូតជាថ្មីទើបបានជាង៣ខែនេះ។នេះជាសញ្ញាមួយបញ្ជាក់ថាលោកសំអូន និងអ្នកនាងលីនដា ផ្ដើមធ្វើការជាដៃគូសារជាថ្មីជាធម្មតាហើយ និងអ្វីដែលគួរឲ្យចាប់អារម្មណ៍គ្រាន់តែត្រូវរ៉ូវគ្នាវិញភ្លាម ប្ដីប្រពន្ធ១គូនេះអាចរកប្រាក់ចំណូលពីសិល្បៈបានដោយងាយ ។
ក្នុងជំនួបតាមទូរស័ព្ទកាលពីរសៀលថ្ងៃទី១៤ សីហា លោកយ៉ែម សំអូន បាននិយាយដោយរីករាយថា លោកនិងភរិយាពិតជាទទួលបានការងាររួមគ្នាច្រើនមែន តែទើបចេញធ្វើសកម្មភាពជាដៃគូនាពេលនេះ ។លោកសំអូន ថ្លែងថា”មិនខ្វះទេហាងសំអាងការគេទាក់ទងមកឲ្យថតឲ្យគេចង់បានគូទាំងខ្ញុំនិងភរិយា ហើយខ្ញូំបានទទួលជាបន្ដបន្ទាប់ទាំងស្ពត និងសំអាងការ ។ចំណែកការធ្វើMC រួមគ្នានៅក្រុមហ៊ុនកម្សាន្ដរបស់ខ្ញុំវិញគេកក់ កុម្មង់ច្រើនណាស់ ដែលការងារនោះទាំងរូបខ្ញុំនិងភរិយានឹងរវល់ខ្លាំងចាប់ពីខែ១១តទៅ” ។
លោកយ៉ែម សំអូន ថាមូលហេតុដែលលោកនិងភរិយាត្រូវបានភ្ញៀវចង់បានឲ្យធ្វើការរួមគ្នាច្រើននោះអាចបណ្ដាលមកពីគេគិតថាសាកសមគ្នា ល្អ ស៊ីសង្វាក់គ្នាជាដើម ។លោកថាក្រៅពីការងារខាងលើរូបលោកក៍គ្រោងផលិតជាMV សម្ដែងដោយភរិយាលោកផ្ទាល់ដែលចេញក្នុងពេលដ៍ឆាប់ខាងមុខនេះហើយ ។ប៉ុន្ដែលោកថាដោយសារតែរដូវនេះជាខែភ្លៀង ហេតុនេះលោកនឹងមិនផលិតសម្រុកទេ គឺចេញថតមួយៗសិន ។
គួររំលឹកថាលោកយ៉ែម សំអូន បានចែកផ្លូវគ្នាជាមួយអ្នកនាងយ៉ាន លីនដា កាលពីឆ្នាំ២០១៥ ដែលពេលនោះអ្នកនាងលីនដា ក្ដៅចិត្តដោយចោទប្ដីថាលួចទាក់ទងប្រុសហើយនាងមានភស្ដុតាងគ្រប់គ្រាន់ និងថាមិនយកលោកវិញជាដាច់ខាតទៀតផង។ប៉ុន្ដែនៅខែមេសា ឆ្នាំ២០២៤ លោកសំអូន និងអ្នកនាងលីនដា បានព្រមផ្សះផ្សារស្នេហាជាថ្មីដោយថែមទាំងធ្វើពិធីជលប់លៀងធំទៀតផង ។តែអ្វីដែលគួរឲ្យភ្ញាក់ផ្អើលស្រាប់តែពេលលោកសំអូន កំពុងតែចាប់ផ្ដើមផ្អែមល្ហែមជាមួយប្រពន្ធម្ដងទៀតនេះ កូនធ័មរបស់លោកឈ្មោះសំអូន ជលសារ ដែលលោកជាអ្នកបណ្ដុះបណ្ដាលឲ្យចេះជំនាញថតរូប ថតវីដេអូ និងកាត់តជាដើម និងតារាចម្រៀងក្នុងក្រុមហ៊ុនកម្សាន្ដរបស់លោកចាន់ ឡៃវលក្ខណ៍ បែជាដឹកដៃគ្នាទៅចូលរួមជាមួយក្រុមហ៊ុនកម្សាន្ដរបស់លោកអាឡិច ចាន់ត្រា ដែលជាគូប្រជែងរបស់លោកសំអូន ទៅវិញ ទើបធ្វើឲ្យលោក ស្រឡាំងកាំង បានត្រឹមតឹងណែនដើមទ្រូង ។
ឆ្លើយតបសំណួរថាតើលោកសំអូន អាចធ្វើសន្និសីទកាសែតបកសា្រយរឿងកូនធ័មលោកជលសារ ដើរចេញពីលោកទៅចាប់ដៃជាមួយលោកអាឡិច ចាន់ត្រា ដែរឬទេនោះលោកបែជាថារឿងនេះលោកសូមមិនបកស្រាយទាំងអស់ ។តែលោកសំអូន បន្ថែមថាដោយសារតែរឿងនេះផ្ទុះខ្លាំងពេក មានអ្នកកាសែតសួរច្រើនពេក អីចឹងលោកមិនដឹងថាគួរឆ្លើយទៅអ្នកសារព័តមានរូបណាមុនទេ ។
លោកយ៉ែម សំអូន ថាពេលនេះភរិយានិងកូនស្រីលោកសំអូន វិថាណា បានមកពីអូស្រា្ដលីរស់នៅជុំគ្នាជាមួយលោកនៅភ្នំពេញវិញហើយ ។ប៉ុន្ដែលោកបែជាឆ្លើយរដាក់រដុបទៅវិញនៅពេលដែលអ្នកយកព័តមានយើងសួរថាបន្ថែមលោកអាចមានផែនការណ៍រៀបការជាលើកទី២ ឬយកកូនទី២ ដើម្បីឲ្យចំណងស្នេហាកាន់តែកក់ក្ដៅជាងនេះថែមទៀតឬអត់នោះ
តារាវ័យ៤៦ឆ្នាំ រូបនេះថ្លែងដោយប្រយ័ត្ន ប្រយ៉ែង ទាក់ទងរឿងរៀបការលើកទី២ ឬយកកូនថែមនោះថា”រឿងនេះទាក់ទងវ័យរបស់ខ្ញុំដែរ ។ម្យាងដោយសារតែពេលវេលានៅខាងមុខនៅឆ្ងាយទៀត អីចឹងខ្ញុំសូមមិនទាន់ធ្វើការបកស្រាយរឿងទាំងពីរនេះទេ “៕
